នៅ​ពេល​កូន​យំគាំង​គួរ​ធ្វើ​ដូច​ម្តេច ?


ស្ត្រី​វ័យ​កណ្តាល​ម្នាក់​ឈ្មោះ​ស្រី​មុំ រស់នៅ​ខេត្តស្វាយរៀង មានកូន​ប្រុស​៣​នាក់ និយាយ​ថា កូន​យំគាំង​គឺជា​បញ្ហា​គួរ​ឱ្យ​ខ្លាច​បំផុត​សម្រាប់​គាត់ ប៉ុន្តែ យូរ​ៗ​ទៅ​វា​ប្រែជា​ទម្លាប់​ទៅ​ហើយ​។ ពេល​ពួក​គេ​ធំ​ឡើង​បញ្ហា​យំគាំង​នេះ​លែង​កើត​មាន​ទៀត​ចំពោះ​កូន​របស់​គាត់។

ស្ត្រី​រូប​នេះ​ឲ្យ​ដឹង​ថា ក្នុង​ចំណោម​កូន​ទាំង​បី​របស់​អ្នកស្រី គឺ​កូនពៅ​កើត​មាន​បញ្ហា​យំ​គាំង។ កាលពី​កូន​ទើបនឹង​កើត មិន​ដែល​មាន​បញ្ហា​យំគាំង​ទេ រហូត​ដល់​បាន​១​ខួប​ទើប​កូន​អ្នកស្រី​កើត​មាន​បញ្ហា​យំគាំង​នេះ​ឡើង ។ រាល់ពេល​ដែល​កូន​របស់​អ្នក​ស្ត្រី​យំ ម្តង​ៗ គឺ​មាន​សភាព​យំ​រហូត​គាំង​បាត់​សំឡេង និង​ឡើង​ស្វាយបបូរមាត់ មុខមាត់​ឡើង​ស្លេក ទន់ដៃទន់ជើង ។ ខណៈ​ពេល​យំ ម្តង​ៗ​អ្នកស្រី​ភ័យ​ណាស់ និង​បាន​ច្របាច់​ដៃជើង ហៅ​ឈ្មោះ​កូន និង​អង្រួន​កូន ដើម្បី​ឱ្យ​គេ​ដឹងខ្លួន​មក​វិញ ។

សភាព​ដែល​គួរ​ឱ្យ​ភ័យ​ខ្លា​ចបែប​នេះ កើត​មាន​ជា​រាល់​លើក​នៅ​ពេល​ដែល​កុមារ​រូប​នេះ​យំ ម្តង​ៗ ហើយ​ប្រហែលជា​៥​ទៅ​១០​នាទី​គេ​ក៏​ដឹងខ្លួន​ឡើង​វិញ ។ អ្នក​ស្ត្រី​មិន​បាន​ទៅ​ព្យាបាល​នៅ​តាម​មន្ទីរពេទ្យ​អ្វី​ទេ រហូត​ដល់​កូន​មាន​អាយុ​៤​ឆ្នាំ​ទើប​លែង​មាន​បញ្ហា​យំគាំង​ទៀត ។

ជា​ការណ៍​ពិត​អាការ​យំ​ដូចដែល​អ្នក​ស្ត្រី​មុំ​បាន​រៀបរាប់​នេះ គឺជា​ការ​យំគាំង​មិន​មាន​ផល​ប៉ះពាល់​ធ្ងន់ធ្ងរ​ទេ ប៉ុន្ដែ​បើ​យំ​ជាប់​គាំង​រហូត​ដល់​ប្រកាច់​រឹងខ្លួន ឬ​ក៏​យំ​ជាប់​គាំង​នៅ​ក្នុង​មួយ​ថ្ងៃ​ច្រើន​ដងនោះ វា​អាច​នឹង​មាន​បញ្ហា​ធ្ងន់ ដែល​ទាក់ទង​ទៅ​នឹង​សុខភាព​កូន​របស់​លោក​អ្នក និង​ទាមទា​ឱ្យ​លោក​អ្នក​ដែល​ជា​ឪុ​ក​ម្តាយ​គួរតែ​ទៅ​ពិភាក្សា​ជាមួយ​គ្រូពេទ្យ​ជំនាញ ។

មក​ដល់​ពេល​នេះ​នៅ​មិន​ទាន់​មាន​អ្នក​ណា​ដឹង​ពី​ដើមហេតុ​នៃ​ការ​យំគាំង​នេះ​ទេ តែ​មាន​កត្ដា​មួយ​ចំនួន​បង្ក​ឱ្យ​កើតជា​ការ​យំគាំង​នេះ​ឡើង ដូច​ជា ការ​ឈឺចាប់ ការ​រំជួលចិត្ដ ការ​ភ័យ​ខ្លាច ឬ​ការ​រារាំង​មិន​ឱ្យធ្វើ​អ្វីមួយ​ដែល​ចង់​ធ្វើ ។ ចំពោះ​ក្មេង​មួយ​ចំនួន ការ​យំគាំង​អាច​​ទាក់ទង​នឹង​កង្វះ​ជាតិ​ដែក​ផង​ដែរ ។ យ៉ាងណាមិញ​ដើម្បី​ការពារ​ពី​គ្រោះថ្នាក់​ផ្សេង នៅ​ពេល​ដែល​កូន​របស់​លោក​អ្នក​យំគាំង​បាត់​សំឡេង លោក​អ្នក​ត្រូវ​ដាក់​ក្មេង​ដេក​ផ្អៀង ហើយ​ត្រូវ​តាមដាន​អំពី​អាការ​របស់​ក្មេង ។ មិន​ត្រូវ​អង្រួន ឬ​ដាក់​អ្វី​ក្នុង​មាត់ ឬ​ជះ​ទឹក​ដាក់​ក្មេង​ឡើយ ។ បន្ទាប់​ពី​ដឹងខ្លួន​ធម្មតា​វិញ ត្រូវ​ប្រព្រឹត្ដ​ចំពោះ​ក្មេង​ដូច​ធម្មតា មិន​ត្រូវធ្វើ​ទណ្ឌ​កម្ម ឬ​ទំរើស​ពេក​ទេ ព្រោះ​អាច​ធ្វើ​ឱ្យ​ក្មេង​ងាយ​មាន​ទម្លាប់​យំគាំង ។ ត្រូវ​ចាំ​ថា​ការ​យំគាំង​នេះ​នឹង​ត្រឡប់​មក​ធម្មតា​វិញ​ដោយ​ឯកឯង ។ បើសិនជា​កូន​របស់​លោក​អ្នក​កើត​មាន​បញ្ហា​ធ្ងន់​ត្រូវ​នាំ​ទៅ​ពិគ្រោះ​បញ្ហា​នេះ​ជាមួយ​គ្រូពេទ្យ​ដើម្បី​ឱ្យ​ដឹង​ថា ពួក​គេ​គ្មាន​បញ្ហា​អ្វី ផ្សេង​ៗ​ទៀត ដូច​ជា​បេះដូង​ដើរ​មិន​ទៀងទាត់​ជាដើម ។

ដើម្បី​ជៀស​ផុត​ពី​បញ្ហា​យំ​គាំ​នេះ​លោក​អ្នក​គួរតែ ឱ្យ​កូន​សម្រាក​ឱ្យ​បាន​គ្រប់គ្រាន់ ធ្វើ​ឱ្យ​កូន​មាន​អារម្មណ៍​ថា​មាន​សុវត្ថិភាព កាត់​បន្ថយ​ការ​ធ្វើ​ឱ្យ​ក្មេង​ខឹង​មិន​សប្បាយចិត្ដ​ជា​ដើម៕

សុខភាព

Sponsored News

ការស្ទង់មតិគេហទំព័រថ្មី




សូម​អរគុណ