រាជធានីភ្នំពេញ ៖ ព្រះមហាក្សត្រនៃព្រះរាជាណាចក្រកម្ពុជា សម្តេចព្រះនរោត្តម សីហមុនី បានយាងជាធិបតីភាពសម្រាប់ការប្រារព្ធពិធីបុណ្យឯករាជ្យជាតិលើកទី ៦៤ (៩វិច្ឆិកា ១៩៥៣- ៩…
រាជធានីភ្នំពេញ ៖ ព្រះមហាក្សត្រនៃព្រះរាជាណាចក្រកម្ពុជា សម្តេចព្រះនរោត្តម សីហមុនី បានយាងជាធិបតីភាពសម្រាប់ការប្រារព្ធពិធីបុណ្យឯករាជ្យជាតិលើកទី ៦៤ (៩វិច្ឆិកា ១៩៥៣- ៩ វិច្ឆិកា២០១៧) នៅព្រឹកថ្ងៃទី៩ វិច្ឆិកា ឆ្នាំ២០១៧ ដែលមានថ្នាក់ដឹកនាំរាជរដ្ឋាភិបាល មន្ត្រីរាជការ កងកម្លាំងប្រមាណអាវុធគ្រប់ប្រភេទ គ្រូបង្រៀន សិស្សានុសិស្សរាប់រយនាក់បានអញ្ជើញចូលរួម។
ទិវាបុណ្យឯករាជ្យជាតិ គឺមានសារះសំខាន់បំផុត ព្រោះវាបង្ហាញនូវការរំលឹកគុណដល់វីរក្សត្រ វីរជន កងកម្លាំង ប្រជាពលរដ្ឋកម្ពុជាដែលបានពលីជីវិតដើម្បីទាមទារឯករាជ្យពីអាណានិគមបារាំងក្រោមស្នាព្រះហត្ថរបស់ព្រះករុណា ព្រះបាទសម្តេចនរោត្តម សីហនុ ព្រះមហាវីរៈក្សត្រ ព្រះបីតាឯករាជ្យជាតិខ្មែរ ព្រះបរមរតនកោដិ រហូតទទួលបានឯករាជ្យនៅថ្ងៃទី៩ខែ វិច្ឆិកាឆ្នាំ១៩៥៣។
ស្នាព្រះហស្ថនេះបាននាំប្រជារាស្ត្រកម្ពុជាបានទទួលនូវសិទ្ធិសេរីភាព ប្រទេសជាតិមានសុខសន្តិភាពមានកិត្យានុភាពស្មើមុខស្មើមាត់នៅលើឆាកតំបន់និងអន្តរជាតិ ។ រយៈពេល៦៤ឆ្នាំនៃការទទួលបានឯករាជ្យ សន្តិភាពស្ថេរភាព ការពួតដៃគ្នាអភិវឌ្ឍប្រទេសក្នុងស្មារតីជាធ្លុងមួយក្រោមឱវាទរបស់សម្តេចឪព្រះបីតាឯករាជ្យជាតិគឺ«ខ្មែររួមរួមគ្នាខ្មែរខ្លាំង»។
ទិវាបុណ្យឯករាជ្យជាតិ គឺត្រូវបានប្រារព្ធឡើងជារៀងរាល់ឆ្នាំ ដើម្បីរំលឹកដល់ស្នាព្រះហស្ថរបស់ព្រះមហាវិរៈក្សត្រខ្មែរ សម្តេចព្រះ នរោត្តម សីហនុ ព្រះបរមរតនកោដ្ឋ ដែលព្រះអង្គបានដឹកនាំព្រះរាជបូជនីយកិច្ចទាមទារបាននូវឯករាជ្យពីអាណានិគមបារាំង នៅថ្ងៃទី ៩ វិច្ឆិកា ឆ្នាំ១៩៥៣ ដែលធ្វើអោយកម្ពុជាទទួលបានឯករាជ្យមកដល់សព្វថ្ងៃនេះ។
ក្រោយពេលថ្វាយភ្លើងជ័យរួច ព្រះករុណាព្រះបាទសម្តេច ព្រះបរមនាថ នរោត្តម សីហមុនី ព្រះអង្គបានសព្វព្រះហឫទ័យយាងសួរសុខទុក្ខកូនចៅ ប្រជារាស្ត្ររបស់ព្រះអង្គជុំវិញវិមានឯករាជ្យ ក្នុងបរិយាកាសរីករាយក្រៃលែងនៅក្នុងថ្ងៃប្រវត្តិសាស្ត្រនេះ៕
ចែករំលែកព័តមាននេះ