ការស្រាវជ្រាវ១បានរកឃើញថា កោសិកាទងផ្ចិតរបស់ទារកទើបនឹងកើតអាចផ្តល់នូវការសង្គ្រោះជីវិតសម្រាប់អ្នកជំងឺខ្សោយបេះដូង ។
របាយការណ៍ពីសមាគមបេះដូងអាមេរិកបានបង្ហាញថា កោសិកានេះជួយដល់មុខងារបេះដូងរបស់អ្នកជំងឺនៅពេលដែលពួកគេចាក់វាចូលក្នុងសរសៃឈាមវ៉ែនរបស់អ្នកមានជំងឺបេះដូង ។
ការព្យាបាលលក្ខណៈពិសោធន៍ដែលមិនមានការរាតត្បាតនេះបានបង្ហាញថាមានសុវត្ថិភាពព្រោះថាវាគ្មានផលប៉ះពាល់អ្វីកើតឡើងបន្ទាប់ពីការចាក់បញ្ចូលកោសិការទាំងនេះ ។
ក្រុមអ្នកជំនាញសង្ឃឹមថា ការសិក្សានេះអាចជួយធ្វើឲ្យជីវិតរបស់មនុស្ស៣៧លាននាក់នៅទូទាំងពិភពលោកដែលរស់នៅជាមួយជំងឺខ្សោយបេះដូងមានភាពប្រសើរឡើង ខណៈដែលការព្យាបាលស្តង់ដារនាពេលបច្ចុប្បន្ន គឺជាវិធីព្យាបាលរាតត្បាត និងថ្នាំមានផលប៉ះពាល់យ៉ាងច្រើនចំពោះរាងកាយរបស់អ្នកជំងឺ ។
សម្រាប់ការសិក្សានេះក្រុមអ្នកស្រាវជ្រាវបានសង្កេតលើអ្នកជំងឺខ្សោយបេះដូងចំនួន៣០នាក់មានអាយុពី១៨ឆ្នាំទៅ៧៥ឆ្នាំ ។ ទងផ្ចិតទារកដែលត្រូវបានប្រើសម្រាប់ការស្រាវជ្រាវនេះគឺយកចេញពីសុកដែលមានអាយុពេញលេញ (៩ខែ១០ថ្ងៃ) ហើយអ្នកបរិច្ចាគសុទ្ធតែមានសុខភាពល្អ ។
ក្រុមអ្នកស្រាវជ្រាវបានចាក់បញ្ចូលកោសិកាដែលយកចេញពីទងផ្ចិតទារកនេះចូលទៅក្នុងសរសៃវ៉ែនរបស់អ្នកចូលរួមក្នុងការសិក្សា ហើយអ្នកផ្សេងទៀតត្រូវបានចាក់ថ្នាំ placebo (ថ្នាំគ្មានប្រសិទ្ធភាពអ្វីទាំងអស់ ) ។
ពួកគេបានសន្និដ្ឋានថាសាច់ដុំបេះដូងរបស់អ្នកដែលត្រូវបានគេចាក់បញ្ចូលកោសិកាទងផ្ចិតមានភាពប្រសើរឡើងយ៉ាងខ្លាំង ។
បេះដូងរបស់អ្នកជំងឺទាំងនេះអាចច្របាច់ឈាមបានល្អ ហើយវាដំណើការមុខងារបានក្នុងកម្រិតខ្ពស់ ។ ការស្រាវជ្រាវបាននិយាយថា ឥទ្ធិពលរបស់ការចាក់បញ្ចូលកោសិកានេះធ្វើឲ្យជីវិតអ្នកជំងឺមានគុណភាពជាងមុន ។
លើសពីនេះក្នុងចំណោមអ្នកជំងឺទាំងនេះមិនមានផលប៉ះពាល់អវិជ្ជមានណាមួយកើតឡើងក្រោយពេលការចាក់នេះឡើយ ។
អ្នកដឹកនាំការស្រាវជ្រាវលោកវេជ្ជបណ្ឌិត Jorge Bartolucci បាននិយាយថាការព្យាបាលប្រភេទនេះអាចផ្លាស់ប្តូរវិធីព្យាបាលរបស់វេជ្ជបណ្ឌិតអំពីជំងឺខ្សោយបេះដូងដោយសារតែជម្រើសព្យាបាលនាពេលបច្ចុប្បន្ននេះសម្រាប់ការព្យាបាលជំងឺធ្ងន់ធ្ងរនេះគឺមានភាពស្មុគស្មាញ និងគ្មានប្រសិទ្ធភាព ៕
ចែករំលែកព័តមាននេះ