ជំងឺរលាកថ្លើមប្រភេទ B គឺជាការបង្ករោគក្នុងថ្លើមដោយវីរុស។ ជំងឺនេះមានគ្រោះថ្នាក់ព្រោះមនុស្សភាគច្រើនដែលឆ្លងវីរុសនេះ អាចក្លាយជាអ្នកផ្ទុកវីរុសពេញមួយជីវិត ដែលអាចនាំឱ្យខូចថ្លើម, ខ្សោយថ្លើម និងមហារីកថ្លើម។ អ្វីដែលគួរឱ្យព្រួយបារម្ភនោះគឺ មនុស្សភាគច្រើនមិនមានរោគសញ្ញាអ្វីគួរឱ្យកត់សម្គាល់នោះទេ…
ជំងឺរលាកថ្លើមប្រភេទ B គឺជាការបង្ករោគក្នុងថ្លើមដោយវីរុស។ ជំងឺនេះមានគ្រោះថ្នាក់ព្រោះមនុស្សភាគច្រើនដែលឆ្លងវីរុសនេះ អាចក្លាយជាអ្នកផ្ទុកវីរុសពេញមួយជីវិត ដែលអាចនាំឱ្យខូចថ្លើម, ខ្សោយថ្លើម និងមហារីកថ្លើម។ អ្វីដែលគួរឱ្យព្រួយបារម្ភនោះគឺ មនុស្សភាគច្រើនមិនមានរោគសញ្ញាអ្វីគួរឱ្យកត់សម្គាល់នោះទេ ហើយក៏មិនដឹងថាខ្លួនមានជំងឺនេះដែរ ប៉ុន្តែនៅតែអាចចម្លងទៅអ្នកដទៃបាន។ សម្រាប់ហេតុផលនេះហើយ ទើបស្ត្រីមានផ្ទៃពោះគ្រប់រូបគួរតែធ្វើតេស្តរកជំងឺរលាកថ្លើមប្រភេទ B។
ហេតុអ្វីបានជាស្ត្រីមានផ្ទៃពោះចាំបាច់ត្រូវធ្វើតេស្ត?
ប្រសិនបើអ្នកមានផ្ទៃពោះ ហើយធ្វើតេស្តឃើញមានវិជ្ជមានជំងឺរលាកថ្លើមប្រភេទ B នោះ គ្រូពេទ្យអាចចាត់វិធានការការពារទារករបស់អ្នកភ្លាមៗក្រោយពេលកើត។ ទារកដែលត្រូវបានការពារត្រឹមត្រូវ គឺកម្រនឹងឆ្លងជំងឺនេះណាស់។ ផ្ទុយទៅវិញ ប្រសិនបើទារកឆ្លងមេរោគនេះ ពួកគេទំនងជានឹងវិវត្តទៅជាអ្នកផ្ទុកមេរោគពេញមួយជីវិត។
ត្រូវធ្វើអ្វីខ្លះបើអ្នកមានផ្ទៃពោះ ហើយកើតជំងឺនេះ?
ប្រសិនបើអ្នកធ្វើតេស្តឃើញវិជ្ជមាន អ្នកត្រូវតែពិភាក្សាជាមួយគ្រូពេទ្យដើម្បីទទួលបានការព្យាបាលត្រឹមត្រូវ។ គ្រូពេទ្យអាចណែនាំវិធីព្យាបាលដើម្បីកាត់បន្ថយហានិភ័យនៃការចម្លងមេរោគទៅទារកក្នុងផ្ទៃ។
វិធីការពារទារករបស់អ្នកមិនឱ្យឆ្លងជំងឺនេះ
ប្រសិនបើអ្នកមិនទាន់ធ្វើតេស្ត: សូមស្នើសុំគ្រូពេទ្យឱ្យធ្វើតេស្តឈាមរកវីរុសរលាកថ្លើមប្រភេទ B។
ប្រសិនបើលទ្ធផលអវិជ្ជមាន: អ្នកអាចសួរគ្រូពេទ្យអំពីការចាក់វ៉ាក់សាំងការពារជំងឺនេះ។
ប្រសិនបើលទ្ធផលវិជ្ជមាន: គ្រូពេទ្យនឹងតាមដានសុខភាពរបស់អ្នក និងផ្តល់ការព្យាបាលត្រឹមត្រូវ។ ក្រោយពេលកើត កូនរបស់អ្នកនឹងទទួលបានវ៉ាក់សាំងដូសដំបូងភ្លាមៗ និងថ្នាំ HBIG ដើម្បីការពារ។ កូនរបស់អ្នកត្រូវបន្តចាក់វ៉ាក់សាំងតាមការកំណត់ដើម្បីឱ្យមានប្រសិទ្ធភាពពេញលេញ។
បន្ទាប់ពីកូនរបស់អ្នកចាក់វ៉ាក់សាំងគ្រប់ចំនួន គ្រូពេទ្យនឹងធ្វើតេស្តឈាមដើម្បីបញ្ជាក់ថាកូនរបស់អ្នកមានភាពស៊ាំនឹងវីរុសនេះ។ គួរបញ្ជាក់ផងដែរថា ការបំបៅដោះកូនមិនអាចចម្លងមេរោគរលាកថ្លើមប្រភេទ B បានឡើយ។
ប្រសិនបើអ្នកមានរោគសញ្ញា ឬការព្រួយបារម្ភណាមួយ សូមទៅពិគ្រោះជាមួយវេជ្ជបណ្ឌិតឯកទេសដើម្បីទទួលបានការពិនិត្យ និងការព្យាបាលប្រកបដោយប្រសិទ្ធភាព៕
ប្រភព៖ មន្ទីរពេទ្យកាល់ម៉ែត
ចែករំលែកព័តមាននេះ