រាជធានីភ្នំពេញ ៖ គ្រឹះស្ថានធនាគារ និងមីក្រូហិរញ្ញវត្ថុដែលកំពុងប្រតិបត្តិផ្ដល់សេវាហិរញ្ញវត្ថុនៅកម្ពុជា គឺជាប្រភពមូលធនមួយយ៉ាងសំខាន់សម្រាប់សហគ្រិន អាជីវករ ពាណិជ្ជករ ក៏ដូចជាកសិករ ដើម្បីបង្កើត និងពង្រីកមុខរបរ…
រាជធានីភ្នំពេញ ៖ គ្រឹះស្ថានធនាគារ និងមីក្រូហិរញ្ញវត្ថុដែលកំពុងប្រតិបត្តិផ្ដល់សេវាហិរញ្ញវត្ថុនៅកម្ពុជា គឺជាប្រភពមូលធនមួយយ៉ាងសំខាន់សម្រាប់សហគ្រិន អាជីវករ ពាណិជ្ជករ ក៏ដូចជាកសិករ ដើម្បីបង្កើត និងពង្រីកមុខរបរ ឬអាជីវកម្មរបស់ពួកគេ ប៉ុន្ដែប្រសិនបើការខ្ចីពុំមានគោលដៅពិតប្រាកដ ឬពុំមានទំនួលខុសត្រូវក្នុងការសងត្រឡប់ ហានិភ័យនៃបំណុលនឹងកើតមាន ។
ថ្លែងក្នុងសន្និសីទសារព័ត៌មាននាឱកាសគម្រប់ខួប៥ឆ្នាំនៃដំណើរការការិយាល័យឥណទានកម្ពុជា លោកជំទាវ ជា សិរី អគ្គនាយកបច្ចេកទេសធនាគារជាតិនៃកម្ពុជា និងជាប្រធានក្រុមប្រឹក្សាភិបាលការិយាល័យឥណទានកម្ពុជា បានឲ្យដឹងថា ការទទួលបានឥណទានពីគ្រឹះស្ថានហិរញ្ញវត្ថុ គឺជារឿងសំខាន់ណាស់ ប៉ុន្ដែអ្នកខ្ចីត្រូវមានគំនិត និងគោលដៅច្បាស់លាស់ ។
លោកជំទាវថ្លែងថា ៖« កុំយល់ថាខ្ចីលុយគេ សុទ្ធតែមិនល្អ ។ ប្រជាជននៅប្រទេសណាក៏មានការខ្ចីលុយដែរ អ្នកខ្លះបើអត់ខ្ចីទេ ក៏អត់មានលទ្ធភាពពង្រីក ឬបង្កើតមុខរបរបានដែរ ហើយអ្នកខ្លះទៀត បើមិនខ្ចីទេ ក៏ពុំមានលទ្ធភាពបញ្ជូនកូនទៅសិក្សានៅក្រៅប្រទេសដែរ ប៉ុន្ដែអ្នកខ្ចីត្រូវមានគំនិត និងត្រូវគិតថា ខ្ចីលុយគេយកទៅធ្វើអី ? ចាំបាច់ដែរឬទេ ? កន្លែងហ្នឹងហើយដែលយើងត្រូវគិត » ។
លោកជំទាវថ្លែងយ៉ាងដូច្នេះថា ៖« បើមិនចាំបាច់ទេ កុំខ្ចីលុយគេ តែអ្នកខ្លះខ្ចីយកទៅជប់លៀងកូនប្រឡងជាប់ ឬខ្ចីលុយទិញម៉ូតូឲ្យកូនជិះជាដើម ដែលវាអត់មានចំណូលមកវិញ នោះហើយគឺជាហានិភ័យដែលនាំឲ្យមានបំណុល។ ដូច្នេះ យើងត្រូវសិក្សាពីលទ្ធភាពខ្លួនឯង បើកាលណាខ្ចីលុយហើយ គឺត្រូវតែមានកាតព្វកិច្ចសងគេ ។ ត្រូវដឹងខ្លួនឯងថា ខ្ចីគេចាំបាច់ឬអត់ បើចាំបាច់ហើយ ត្រូវតែមានកាតព្វកិច្ចសងគេ » ។
លោកបណ្ឌិត ង៉ែត សុវណ្ណារិទ្ធ អគ្គនាយករងត្រួតពិនិត្យធនាគារជាតិនៃកម្ពុជា ធ្លាប់លើកឡើងថា ការខ្ចីលុយពីគ្រឹះស្ថានហិរញ្ញវត្ថុ ក៏មានសារប្រយោជន៍ដែរ ដើម្បីយកទៅពង្រីកអាជីវកម្មឲ្យកាន់តែដំណើរការល្អប្រសើរថែមមួយកម្រិតទៀត តែត្រូវប្រើប្រាស់ឲ្យចំគោលដៅ និងមានប្រសិទ្ធភាព ។
លោកថ្លែងថា ៖« បើយើងពឹងពាក់តែលើប្រាក់សន្សំម្ដងបន្ដិចៗនោះ យើងអត់មានដើមទុនគ្រប់គ្រាន់ក្នុងការពង្រីកមុខរបរទេ អីចឹងយើងត្រូវតែខ្ចី ឲ្យតែយើងយកកម្ចីទាំងនោះទៅប្រើចំគោលដៅ និងប្រើប្រាស់ឲ្យទទួលបានប្រភពចំណូលមកវិញ » ។
ទោះបីយ៉ាងណាលោកថា ៖« ខ្មែរយើងនៅមានផ្នត់គំនិតមួយ គឺខ្មាសគេ មិនចង់ឲ្យគេដឹងថាខ្លួនឯងខ្ចីលុយគេ ហើយកន្លងមក មានអតិថិជនខ្លះយកអចលនទ្រព្យពីរឬបីកន្លែងទៅដាក់នៅគ្រឹះស្ថានផ្សេងៗគ្នា ។ ចំណែកគ្រឹះស្ថានហិរញ្ញវត្ថុ ប្រាកដជាមិនដឹងលម្អិតពីអតិថិជនរបស់ខ្លួនឡើយ។ ដូច្នេះហើយទើបមានបញ្ហាអតិថិជនជំពាក់បំណុលជាន់គ្នា រហូតក្លាយជាបំណុលវ័ណ្ឌកនោះ » ។
ចំណែកគ្រឹះស្ថានហិរញ្ញវត្ថុបានដើរតួជាអ្នកផ្ដល់កម្ចី និងជាអ្នកប្រមូលប្រភពទុនយកឲ្យអតិថិជនខ្ចី ដើម្បីបង្កើត ឬពង្រីកមុខរបររកស៊ី ។ យ៉ាងណាក៏ដោយ ការឲ្យខ្ចីប្រាក់នេះ វាមានហានិភ័យខ្ពស់ ប្រសិនបើមិនបានសិក្សាពីប្រាក់ចំណូល ពីលទ្ធភាពនៃការសងត្រឡប់ និងឈ្វេងយល់ពីអតិថិជនឲ្យបានជាប់ជាប្រចាំ ដែលនឹងក្លាយជាបំណុលវ័ណ្ឌកនៅថ្ងៃអនាគត ។
លោកជំទាវជា សិរី ក៏បានស្នើឲ្យគ្រឹះស្ថានហិរញ្ញវត្ថុទាំងអស់មានយុទ្ធនាការ ឬសិក្ខាសាលាផ្សព្វផ្សាយដល់អាជ្ញាធរមូលដ្ឋាន ដើម្បីឲ្យពួកគាត់ពន្យល់ទៅប្រជាពលរដ្ឋពីភាពចាំបាច់នៃកម្ចី និងទំនួលខុសត្រូវចំពោះបំណុលផងដែរ ព្រោះអ្នកខ្ចី និងអ្នកឲ្យខ្ចី គឺមានការទទួលខុសត្រូវដូចគ្នា ។
លោកជំទាវលើកឡើងថា ៖« កាតព្វកិច្ចរបស់អ្នកឲ្យខ្ចីក៏អីចឹងដែរ ប្រសិនបើដឹងថា អតិថិជនគ្មានលទ្ធភាព ឬជំពាក់បំណុលគេច្រើនហើយ នៅតែឲ្យខ្ចីទៀតនោះ នឹងធ្វើឲ្យអតិថិជនកាន់តែមានបំណុលកើនឡើងថែមទៀត ហើយនេះគឺជាការខ្វះទំនួលខុសត្រូវមួយ»។
ដើម្បីការពារផលប្រយោជន៍ទាំងអ្នកខ្ចី និងគ្រឹះស្ថានហិរញ្ញវត្ថុនានាដែលផ្ដល់កម្ចី និងគ្រប់គ្រងហានិភ័យពីបំណុល ក៏ដូចជាធ្វើឲ្យវិស័យនេះរីកចម្រើនប្រកបដោយនិរន្ដរភាព កាលពីខែមីនា ឆ្នាំ២០១២ ធនាគារជាតិនៃកម្ពុជាបានផ្ដល់អាជ្ញាប័ណ្ណឲ្យក្រុមហ៊ុនក្រេឌីតប្យួរ៉ូ (ខេមបូឌា) ខូអិលធីឌី ហៅកាត់ថា (ស៊ីប៊ីស៊ី) បើកដំណើរការការិយាល័យប្រតិបត្តិការរបស់ខ្លួននៅកម្ពុជា ដែលមានតួនាទីស្នូលក្នុងការប្រមូលទិន្នន័យពីស្ថាប័នហិរញ្ញវត្ថុទាំងអស់ ដើម្បីផ្តល់ព័ត៌មានអំពីឥណទានដែលពេញលេញអាចជឿទុកចិត្តបាននៅប្រទេសកម្ពុជា ។
លោក អឿ សុធារ័ត្ន ប្រធាននាយកប្រតិបត្តិការិយាល័យឥណទានបានឲ្យដឹងថា ក្រុមហ៊ុនស៊ីប៊ីស៊ី ជាកូនសោមួយយ៉ាងសំខាន់នៅក្នុងវិស័យហិរញ្ញវត្ថុ ។ ស្ថាប័ននេះបានប្រមូលទិន្នន័យពីបណ្តាធនាគារ គ្រឹះស្ថានមីក្រូហិរញ្ញវត្ថុ ក្រុមហ៊ុនភតិសន្យា និងប្រតិបត្តិករឥណទានទាំងអស់ ដើម្បីធ្វើការវិភាគ និងចងក្រងទិន្នន័យទាំងនោះទុកផ្ដល់ជាចក្ខុវិស័យច្បាស់លាស់ និងមានតម្លាភាពអំពីប្រវត្តិឥណទានរបស់ស្ថាប័នទាំងនោះ ។
លោកថ្លែងថា ៖« គិតចាប់ពីឆ្នាំ២០១២មក ក្រុមហ៊ុនបានធ្វើរបាយការណ៍ជាង១៣លានរបាយការណ៍ដោយផ្អែកទៅលើព័ត៌មានដែលផ្តល់ដោយស្ថាប័នហិរញ្ញវត្ថុនីមួយៗ ជួយឲ្យមានទិន្នន័យជារួមមួយដើម្បីអាចយល់យ៉ាងច្បាស់ពីស្ថានភាពឥណទានជាសកលរបស់បុគ្គលម្នាក់ៗ » ។
វិស័យធនាគារ និងមីក្រូហិរញ្ញវត្ថុ មិនត្រឹមតែដើរតួនាទីស្នូលក្នុងការផ្ដល់ប្រាក់កម្ចី និងទទួលប្រាក់បញ្ញើប៉ុណ្ណោះទេ ថែមទាំងជួយបង្កើតការងារ ចូលរួមចំណែកកាត់បន្ថយភាពក្រីក្រ និងជំរុញកំណើនសេដ្ឋកិច្ចជាតិយ៉ាងរឹងមាំថែមទៀត ហើយបច្ចុប្បន្នកំពុងតែរីកចម្រើនយ៉ាងខ្លាំង ពិសេសគ្រឹះស្ថានមីក្រូហិរញ្ញវត្ថុបានកើនឡើងគួរឲ្យកត់សម្គាល់ ។
គិតត្រឹមចុងខែកក្កដា ឆ្នាំ២០១៧នេះ ចំនួនគ្រឹះស្ថានធនាគារបានកើនឡើងដល់៣៩, ធនាគារឯកទេស១៥, គ្រឹះស្ថានមីក្រូហិរញ្ញវត្ថុទទួលប្រាក់បញ្ញើ៧ និងគ្រឹះស្ថានមីក្រូហិរញ្ញវត្ថុមិនទទួលប្រាក់បញ្ញើកើនដល់៦៦ ។ ចំណែកទ្រព្យសកម្មរបស់គ្រឹះស្ថានធនាគារមានប្រមាណ២៧,៣ប៊ីលានដុល្លារ កើនឡើងជិត៥ដង ខណៈដែលទ្រព្យសកម្មនៅគ្រឹះស្ថានមីក្រូហិរញ្ញវត្ថុមានប្រមាណ៤,៧ប៊ីលានដុល្លារ កើនឡើងជិត១០ដង ។ នេះបើយោងតាមរបាយការណ៍ធនាគារជាតិនៃកម្ពុជា ៕
ចែករំលែកព័តមាននេះ