ខេត្តប៉ៃលិន ៖ ដោយឃើញករណីគ្រោះថ្នាក់ចរាចរកើតឡើងស្ទើររាល់ថ្ងៃជាបន្តបន្ទាប់បណ្តាលឱ្យមនុស្សរបួស និងស្លាប់ជាច្រើននាក់ដោយសារមិនគោរពច្បាប់ចរាចរ ជាពិសេសបញ្ហាមិនពាក់មួកសុវត្ថិភាពក្នុងការបើកបរម៉ូតូទៅមកនៅលើដងផ្លូវ និងបើកបរលើសល្បឿនកំណត់ ព្រមទាំងស្រវឹងជោកជាំផងដែរ ដែលជាក្តីព្រួយបារម្ភយ៉ាងខ្លាំងរបស់រាជរដ្ឋាភិបាលក៏ដូចជាអាជ្ញាធរខេត្ត ។
ទើបនៅព្រឹកថ្ងៃទី៣០ ខែតុលា អនុគណៈកម្មការសុវត្ថិភាពចរាចរផ្លូវគោកខេត្តប៉ៃលិន បានបើកយុទ្ធនាការ អនុវត្តរឹតបន្តឹងការពាក់មួកសុវត្ថិភាពចរាចរណ៍ផ្លូវគោកខេត្តប៉ៃលិន និងចែកជូនមួកសុវត្ថិភាព ដោយឥតគិតថ្លៃ ដល់ប្រជាពលរដ្ឋ ដើម្បីចូលរួមគោរពច្បាប់ចរាចរណ៍គ្រប់ៗ គ្នានិងអនុវត្ថច្បាប់ចរាចរណ៍ ឱ្យកាន់តែមានប្រសិទ្ធភាពខ្ពស់ ដែលយុទ្ធនាការនេះ ស្ថិតក្រោមអធិបតីភាពឯកឧត្តម សៅ សារ៉ាត់ អភិបាលរងខេត្ត និងជាអនុប្រធានអចិន្ត្រៃយ៍ នៃអនុគណៈកម្មការសុវត្ថិភាពចរាចរណ៍ផ្លូវគោកខេត្តប៉ៃលិន ព្រមទាំងមានការចូលរួមពីសមត្ថកិច្ចចរារណ៍ផ្លូវគោកនៃស្នងការនគរ បាលខេត្ត មន្ទីរសាធារណៈការ និងដឹកជញ្ជូនខេត្ត រដ្ឋបាលសាលាខេត្ត ព្រមទាំងសហភាពសហព័ន្ធយុវជនកម្ពុជាខេត្តប៉ៃលិនផងដែរ ។
លោក សៅ សារ៉ាត់ អនុប្រធានអចិន្ត្រៃយ៍នៃអនុគណៈកម្មការសុវត្ថិភាពផ្លូវគោកខេត្ត បានឲ្យដឹងថា ការបង្កើតយុទ្ធនាការមួកសុវត្ថិភាព ចរាចរផ្លូវគោករបស់អនុគណៈកម្មការសុវត្ថិភាពចរាចរណ៍ផ្លូវគោកខេត្តប៉ៃលិន បានបង្ហាញយ៉ាងច្បាប់នូវចរាចរណ៍ ពិតជាមានសារៈសំខាន់ក្នុងការធ្វើឱ្យមានភាពងាយស្រួលសម្រាប់អ្នកបើកបរយាន្តជំនិះ និងទោចក្រយាន្តយន្ត ក៏ដូចជាអ្នកប្រើប្រា ស់ ផ្លូវផ្សេងៗ ទៀតដើម្បីអនុវត្តការធ្វើដំណើរជាប្រចាំរបស់ពួកគេឲ្យកាន់តែមានភាពងាយស្រួល និងសុវត្ថិភាពផងដែរ ។ ម្យ៉ាងវិញទៀតវាជាផ្នែកមួយ ដែលចូលរួមផ្សព្វផ្សាយ និងកាត់បន្ថយគ្រោះថ្នាក់ចរាចរណ៍ផ្លូវគោកដល់បងប្អូនប្រជាពលរដ្ឋក្នុងខេត្តប៉ៃលិន ក៏ដូចជាសុវត្ថិភាពនៅទូទាំងប្រទេសកម្ពុជា ។
សូមបញ្ជាក់ផងដែរថា៖ ក្នុងការបើកយុទ្ធការនេះអនុគណៈកម្មការសុវត្ថិភាពចរាចរណ៍ផ្លូវគោកខេត្តប៉ៃលិន បានរឹតបន្តឹងការពាក់មួកសុវត្ថិភាព និងធ្វើការផាកពិន័យ ព្រមទាំងផ្តល់មួកសវត្ថិភាពដល់ប្រជាពលរដ្ឋ ដែលធ្វើចរាចរណ៍នៅលើដងផ្លូវ ពុំបានមានមួកសុវត្ថិភាព និងផ្តល់មួកជូនពួក គាត់ចំនួន១៥២មួកផងដែរ ៕
ចែករំលែកព័តមាននេះ