រាជធានីភ្នំពេញ ៖ នារីម្នាក់ជិះម៉ូតូមួយគ្រឿងចេញធ្វើការត្រឡប់ទៅផ្ទះត្រូវបានជនសង្សយ័មួយក្រុមជិះម៉ូតូបីគ្រឿងមកពីក្រោយធ្វើសកម្មភាពឆក់កាបូបស្ពាយពីជនរងគ្រោះបានសម្រេចហើយជិះគេចខ្លួនបាត់ស្រមោល ហេតុការណ៍នេះកើតឡើងកាលពីវេលាម៉ោង៨និង៣០នាទីយប់ថ្ងៃទី៣០ ខែតុលា ឆ្នាំ២០១៧ ត្រង់ចំណុចខាងមុខក្រសួងការងារ តាមបណ្តោយផ្លូវមហាវិថីសហព័ន្ធរុស្ស៉ី ក្នុងសង្កាត់ទឹកល្អក់១ ខណ្ឌទួលគោក ។
នារីរងគ្រោះមានឈ្មោះ ក.ណ.គ អាយុ២៦ឆ្នាំ មុខរបរជាបុគ្គលិកក្រុមហ៊ុន ស្នាក់នៅក្រោយផ្សារទឹកថ្លាក្នុងសង្កាត់ទឹកថ្លា ខណ្ឌសែនសុខ មានស្រុកកំណើតនៅភូមិចំការចេក ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ ។
បើតាមសម្តីពីជនរងគ្រោះបានរៀបរាប់ប្រាប់ឲ្យដឹងថា មុនកើតហេតុជនរងគ្រោះជិះម៉ូតូមួយគ្រឿងម៉ាកស្កុបពី ពណ៌ក្រហម ពាក់ស្លាកលេខ ភ្នំពេញ ១DJ-១៧៨៦ ទើបតែជិះចេញមកពីកន្លែងធ្វើការនៅម្តុំទួលគោកបំណងជិះត្រឡប់ទៅផ្ទះវិញទិសដៅពីកើតទៅលិច ។ លុះមកដល់ចំណុចកើតហេតុខាងលើស្រាប់តែលេចមុខជនសង្ស័យមួយក្រុមមានគ្នា៥ទៅ៦នាក់ជិះម៉ូតូ៣គ្រឿងមិនចាំម៉ាកជិះមកពីក្រោយហើយបានធ្វើសកម្មភាពឆក់កាបូបដែលជនរងគ្រោះស្ពាយនៅខាងមុខបានសម្រេចហើយនាំគ្នាជិះគេចខ្លួនបាត់ស្រមោលបន្សល់ទុកជនរងគ្រោះយំសោកស្តាយដែលបានបាត់បង់ទ្រព្យសម្បត្តិរបស់ខ្លួននៅនឹងកន្លែងកើតហេតុ ។ នៅក្នុងកាបូបរបស់ជនរងគ្រោះដែលត្រូវជនសង្ស័យឆក់យកទៅរួមមានទូរសព្ទ័ដៃ១គ្រឿង កាតATM ២សន្លឹក អត្តសញ្ញាណប័ណ្ណ១មួយសន្លឹក និងលុយជាង៥០ដុល្លារផងដែរ ។ ក្រោយកើតហេតុជនរងគ្រោះបានទៅដាក់ពាក្យបណ្តឹងនៅប៉ុស្តិ៍នគរបាលរដ្ឋបាលទឹកល្អក់ទី១ដើម្បីឲ្យសមត្ថកិច្ចស្វែងរកចាប់ខ្លួនជនសង្ស័យមកផ្តន្ទាទោសទៅតាមផ្លូវច្បាប់ ៕
ចែករំលែកព័តមាននេះ