រាជធានីភ្នំពេញ ៖ ការផ្ដល់សេវាឥណទាននៅកម្ពុជា ត្រូវបានគេមើលឃើញថាកាន់តែមានវិសាលភាពទូលំទូលាយនៅទូទាំងប្រទេស ។ ដោយសារតែកម្ពុជាឈរលើច្បាប់ផ្ដល់ឥណទានមានភាពច្បាស់លាស់ និងមានប្រព័ន្ធប្រតិបត្តិការចែករំលែកព័ត៌មានបានត្រឹមត្រូវ ឯករាជ្យ អព្យាក្រឹត និងមានតម្លាភាព នៅក្នុងឆ្នាំ២០១៧នេះត្រូវបានធនាគារពិភពលោកវាយតម្លៃថា ជាប្រទេសដែលមានភាពងាយស្រួលក្នុងការទទួលបានសេវាឥណទានជាប់ចំណាត់ថ្នាក់ទី៧ ក្នុងចំណោម១៩០ប្រទេសនៅលើពិភពលោក ។ នេះបើតាមការលើកឡើងរបស់មន្ត្រីជាន់ខ្ពស់ក្នុងវិស័យហិរញ្ញវត្ថុ ។
នៅក្នុងពិធីខួប៥ឆ្នាំនៃដំណើរការការិយាល័យឥណទានកម្ពុជា ដែលមានឈ្មោះថា ក្រេឌីតប្យួរ៉ូ (ខេមបូឌា) ខូអិលធីឌី ឬហៅកាត់ថា(ស៊ីប៊ីស៊ី) កាលពីថ្ងៃទី២៧ តុលា នៅសណ្ឋាគារសូហ្វីតែល ភ្នំពេញ ភូគីត្រា ប្រធាននាយកប្រតិបត្តិការិយាល័យឥណទាន លោក អឿ សុធារ័ត្ន បានឲ្យដឹងថា ដោយសារតែកម្ពុជាឈរ លើច្បាប់ និងមានប្រព័ន្ធចែករំលែកព័ត៌មានហិរញ្ញវត្ថុបានត្រឹមត្រូវ ធ្វើឲ្យប្រទេសកម្ពុជាទទួលបានចំណាត់ថ្នាក់កាន់តែប្រសើរឡើងតាមរយៈការវាយតម្លៃប្រចាំឆ្នាំរបស់ធនាគារពិភពលោក ស្ដីពីភាពងាយស្រួកលក្នុងការធ្វើជំនួញ។ ក្នុងនោះ ក្រុមហ៊ុនស៊ីប៊ីស៊ី គឺជាកូនសោមួយយ៉ាងសំខាន់នៅក្នុងវិស័យហិរញ្ញវត្ថុ និងបានរួមចំណែកជួយជំរុញឱ្យប្រទេសកម្ពុជាកាន់តែមានមុខមាត់លើឆាកអន្តរជាតិ ។
លោកថ្លែងថា ៖« មុនពេលបង្កើតការិយាល័យឥណទានកម្ពុជា ប្រទេសយើងស្ថិតនៅចំណាត់ថ្នាក់ទី៩០ជាង បន្ទាប់ពីមានវត្តមានការិយាល័យនេះនៅឆ្នាំ២០១២មក ចំណាត់ថ្នាក់របស់យើងកាន់តែប្រសើរឡើងជាលំដាប់ ហើយនៅឆ្នាំ២០១៧នេះ កម្ពុជាបានជាប់ចំណាត់ថ្នាក់ជាប្រទេសល្អបំផុតទី៧នៅលើពិភពលោកក្នុងចំណោម១៩០ប្រទេស ចំពោះភាពងាយស្រួលក្នុងការទទួលបានឥណទាន » ។
លោកបញ្ជាក់ថា ៖« ពិន្ទុសម្រាប់ប្រទេសនីមួយៗនេះ ត្រូវបានគណនាតាមលក្ខណៈវិនិច្ឆ័យជាច្រើនរួមមាន ការបង្កើតការិយាល័យឥណទាន និងការអនុលោមទៅតាមបទដ្ឋានអន្ដរជាតិ ជាដើម » ។
លោកជំទាវ ជា សិរី ប្រធានក្រុមប្រឹក្សាភិបាលក្រុមហ៊ុនស៊ីប៊ីស៊ី បានថ្លែងដែរថា ក្នុងរយៈពេលប្រតិបត្តិការ៥ឆ្នាំកន្លងមកនេះ ស៊ីប៊ីស៊ីពិតជាបានចូលរួមចំណែកយ៉ាងសកម្មក្នុងការលើកកម្ពស់សុខុមាលភាពវិស័យធនាគារ និងហិរញ្ញវត្ថុនៅកម្ពុជា និងបានចូលរួមចំណែកលើកកម្ពស់មុខមាត់ប្រទេសកម្ពុជានៅលើឆាកអន្តរជាតិ ។
លោកជំទាវថ្លែងថា ៖« ប្រព័ន្ធចែករំលែកព័ត៌មានឥណទានបានក្លាយជាឧបករណ៍មួយយ៉ាងសំខាន់ក្នុងការវិភាគពីស្ថានភាពបំណុលរបស់អតិថិជន ជួយដល់ធនាគារ និងគ្រឹះស្ថានហិរញ្ញវត្ថុគ្រប់គ្រងហានិភ័យឥណទាន និងជំរុញ ក៏ដូចជាបង្កភាពងាយស្រួលក្នុងការផ្ដល់ប្រាក់កម្ចីប្រកបដោយការទទួលខុសត្រូវ និងផ្ដល់ភាពងាយស្រួលដល់អតិថិជនខ្ចីប្រាក់ដែលមានប្រវត្តិឥណទានល្អ ក្នុងការទទួលបានឥណទានឆាប់រហ័សពីគ្រឹះស្ថានធនាគារ និងហិរញ្ញវត្ថុ » ។
ក្នុងឱកាសនោះ លោកជំទាវ នាវ ច័ន្ទថាណា ទេសាភិបាលរងធនាគារជាតិនៃកម្ពុជា បានលើកឡើងថា បច្ចុប្បន្ន ស៊ីប៊ីស៊ីបាននិងកំពុងប្រមូលទិន្នន័យឥណទានរបស់រូបវ័ន្តបុគ្គលទូទាំងប្រទេសពីគ្រឹះស្ថានជាសមាជិកដែលមានចំនួនជាង១៤០ ដើម្បីជាជំនួយដល់សមាជិកនីមួយៗក្នុងការវាយតម្លៃ និងកាត់បន្ថយហានិភ័យឥណទានបានប្រសើរជាងមុន ព្រមទាំងកាត់បន្ថយគម្លាតព័ត៌មាន និងពង្រីកមូលដ្ឋានអតិថិជន ព្រមទាំងកាត់បន្ថយចំណាយប្រតិបត្តិការ ដែលទាំងនេះផ្ដល់លទ្ធភាពឲ្យគ្រឹះស្ថានបង្កើតប្រាក់ចំណេញ និងជំរុញតម្លាភាពនៃការផ្ដល់កម្ចី ។
លោកជំទាវបញ្ជាក់ថា ៖« គិតមកត្រឹមដំណាច់ត្រីមាសទី៣ឆ្នាំនេះ ទិន្នន័យអតិថិជនខ្ចីប្រាក់ដែលបានបញ្ចូលទៅក្នុងប្រព័ន្ធកើនឡើងដល់ជាង២លាននាក់ ជាមួយអត្រាកំណើនប្រមាណ២៥% ។ សមិទ្ធផលសំខាន់មួយទៀតគឺក្រុមហ៊ុនបានជួយទាក់ទាញវិនិយោគិនឲ្យចូលមកក្នុងប្រទេសកម្ពុជាកាន់តែច្រើន តាមរយៈការចូលរួមធ្វើឲ្យមានភាពប្រសើរឡើងចំពោះស្ថានភាពនៃការធ្វើពាណិជ្ជកម្ម ផ្អែកតាមចំណាត់ថ្នាក់ «Doing Business» របស់ធនាគារពិភពលោក » ។
គិតត្រឹមចុងខែកក្កដា ឆ្នាំ២០១៧នេះ ចំនួនគ្រឹះស្ថានធនាគារបានកើនឡើងដល់៣៩, ធនាគារឯកទេស១៥, គ្រឹះស្ថានមីក្រូហិរញ្ញវត្ថុទទួលប្រាក់បញ្ញើ៧ និងគ្រឹះស្ថានមីក្រូហិរញ្ញវត្ថុមិនទទួលប្រាក់បញ្ញើកើនដល់៦៦។ ចំណែកទ្រព្យសកម្មរបស់គ្រឹះស្ថានធនាគារមានប្រមាណ២៧,៣ប៊ីលានដុល្លារ កើនឡើងជិត៥ដង ខណៈដែលទ្រព្យសកម្មនៅគ្រឹះស្ថានមីក្រូហិរញ្ញវត្ថុមានប្រមាណ៤,៧ប៊ីលានដុល្លារ កើនឡើងជិត១០ដង ៕
ចែករំលែកព័តមាននេះ