រាជធានីភ្នំពេញ ៖ លោក អ៊ុក គឺមសេង អនុរដ្ឋលេខាធិការក្រសួងព័ត៌មានបានលើកឡើងថា ពលរដ្ឋអ្នកសារព័ត៌មាននឹងជួបបញ្ហាដោយសារពួកគាត់គ្មានស្ថានប័នពិតប្រាកដ និងគ្មានប័ណ្ណសម្គាល់ដែលចេញដោយស្ថាប័នដែលទទួលស្គាល់ដោយច្បាប់ ឬក្រុមហ៊ុន។ ថ្នាក់ដឹកនាំក្រសួងព័ត៌មានបានថ្លែងបែបនេះនៅឯវេទិកាប្រចាំឆ្នាំស្តីពីការភ្ជាប់ទំនាក់ទំនងពលរដ្ឋសារព័ត៌មាន…
រាជធានីភ្នំពេញ ៖ លោក អ៊ុក គឺមសេង អនុរដ្ឋលេខាធិការក្រសួងព័ត៌មានបានលើកឡើងថា ពលរដ្ឋអ្នកសារព័ត៌មាននឹងជួបបញ្ហាដោយសារពួកគាត់គ្មានស្ថានប័នពិតប្រាកដ និងគ្មានប័ណ្ណសម្គាល់ដែលចេញដោយស្ថាប័នដែលទទួលស្គាល់ដោយច្បាប់ ឬក្រុមហ៊ុន។ ថ្នាក់ដឹកនាំក្រសួងព័ត៌មានបានថ្លែងបែបនេះនៅឯវេទិកាប្រចាំឆ្នាំស្តីពីការភ្ជាប់ទំនាក់ទំនងពលរដ្ឋសារព័ត៌មាន ជាមួយអ្នកសារព័ត៌មានវិជ្ជាជីវៈ និងនិស្សិតសារព័ត៌មាននៅសណ្ឋាគារសាន់វេ ដែលមានអ្នកចូលរួមជាង១០០នាក់មកពីខេត្ត-ក្រុង។
លោកបន្តថា៖ «ពួកគាត់អាចផ្សាយតាមប្លុក ឬបណ្តាញសង្គមបាន។ តែគាត់អាចសរសេរព័ត៌មានបាន ទោះបីជាមិនមែនជាព័ត៌មានអាជីពក្តី»។ លោកបានបន្ថែមថា អ្នកសារព័ត៌មានមិនអាជីពគួរតែបង្កើនឲ្យមានការបញ្ជាក់ពីអាជ្ញាធរ ឬស្ថាប័នដែលច្បាប់អនុញ្ញាត ព្រោះនៅពេលណាសរសេរគ្មានវិជ្ជាជីវៈទេ ព័ត៌មាននោះវាក្លាយជាព័ត៌មានមិនពិត។
លោក អ៊ុក គឺមសេង បន្ថែមទៀតថា ៖ ក្លឹបអ្នកសារព័ត៌មានគួរជួយពលរដ្ឋអ្នកសារព័ត៌មានក្នុងការសរសេរព័ត៌មាននេះ។ លោកថា ចំពោះអ្នកសារព័ត៌មានអាជីពមានការទទួលខុសត្រូវ និងមានការប្រយ័ត្នប្រជែង។ តែសម្រាប់ពលរដ្ឋសារព័ត៌មានខ្លះសរសេរតែមួយចំហៀង។ នៅពេលនេះចង់បង្ហាញថា នៅពេលណាដែលពលរដ្ឋអ្នកសារព័ត៌មានសរសេរព័ត៌មានហើយត្រូវផ្សាយនៅកន្លែងណា។
លោកបានលើកឡើងថា ច្បាប់ស្តីពីសិទ្ធិទទួលបានព័ត៌មាននេះគ្រោងប្រើពេល៣ឆ្នាំដើម្បីតាក់តែង ហើយពេលនេះមានរយៈពេល២ឆ្នាំមិនទាន់ចប់នៅឡើយទេ។ លោកថា នៅពេលច្បាប់នេះអនុម័តឲ្យប្រើប្រាស់អ្នកសារព័ត៌មានអាជីព ឬប្រជាពលរដ្ឋជាអ្នកសារព័ត៌មានអាចផ្សាយព័ត៌មានដោយមិនចាំបាច់សុំ និងមានសិទ្ធិទទួលព័ត៌មាននៅតាមស្ថាប័នរដ្ឋនានា។
លោក ណុប វី នាយកប្រព័ន្ធផ្សព្វផ្សាយបានលើកឡើងថា មានពលរដ្ឋអ្នកសារព័ត៌មានប្រមាណ២០០នាក់ក្នុងនោះស្ត្រី៣០% ត្រូវបានបណ្តុះបណ្តាល។ លោកថា ពលរដ្ឋសារព័ត៌មានទាំងនោះមានមកពីសកម្មជនព្រៃឡង់ កម្មករ កម្មការិនីតាមរោងចក្រ អ្នកលក់ដូរតាមចិញ្ចើមផ្លូវ។ បន្ទាប់ពីបានបណ្តុះបណ្តាលពលរដ្ឋអ្នកសារព័ត៌មានអាចថតរូបភាពនៅកន្លែងកើតឡើងផ្សាយតាមបណ្តាញសង្គមផ្តល់ជូនទៅរដ្ឋាភិបាល និងអ្នកសារព័ត៌មានអាជីព។
លោកបាននិយាយថា៖ «នៅកម្ពុជាពេលនេះមានការប្រើបណ្តាញសង្គម និងអ៊ិនធើរណែតគួរឲ្យមានការចាប់អារម្មណ៍ខុសប្លែកពីមុន»។ លោក ប៉ែន ប៉ុណ្ណា ប្រធានក្លឹបអ្នកកាសែតកម្ពុជាបានថ្លែងថា អ្នកសារព័ត៌មានជាអាជីពមួយដែលត្រូវមានការសិក្សាត្រឹមត្រូវមិនមែនដូចគេថា ឲ្យតែចេះនិយាយ ឬអាចសរសេរសារព័ត៌មានបាននោះទេ។ លោកថា អ្នកសារព័ត៌មានអាជីព «អ្នកសារព័ត៌មានត្រូវតែនិយាយពីការពិត តែការពិតខ្លះគេមិនឲ្យនិយាយ ការពិតខ្លះប៉ះពាល់ដល់ក្រមសីលធម៌ និងផ្លូវច្បាប់»។ លោកថា អ្នកសារព័ត៌មានត្រូវដឹងផង៕
ចែករំលែកព័តមាននេះ