រាជធានីភ្នំពេញ៖ ក្រសួងសុខាភិបាលបានចេញសេចក្តីណែនាំមួយកាលពីថ្ងៃទី ២៥ តុលា ស្តីពីការបង្កជំងឺ និងបញ្ហាសុខភាព ក្នុងព្រះរាជវិធីបុណ្យអ៊ុំទូក បណ្តែតប្រទីប អកអំបុក សំពះព្រះខែ ដែលជាទូទៅនៅក្នុងរយៈពេលនៃពិធីបុណ្យជាតិនេះ ប្រជាពលរដ្ឋតែងតែធ្វើដំណើរមកចូលរួមកម្សាន្តសប្បាយនៅរាជធានីភ្នំពេញ និងនៅតាមទីកន្លែងមួយចំនួនទៀតដែលបានប្រារព្ធធពិធីនេះ ។
ដូច្នេះក្រសួងសុខាភិបាលបានធ្វើការណែនាំប្រជាពលរដ្ឋទូទៅចូលរួមអនុវត្តវិធានការបង្កាជំងឺ និងថែរក្សាសុខភាព ដើម្បីចៀសផុតពីបញ្ហាសុខភាពដូចជា ឈឺពោះ ក្អួត រាករូស ដែលបណ្តាលមកពីការបរិភោគចំណីអាហារមិនមានអនាម័យស្អាត ឬមានគ្រោះថ្នាក់ចរាចរណ៍ ដោយការបើកបរធ្វេសប្រហែស ឬការដួលសន្លប់ក្នុងពេលដើរកំសាន្ត។ លោក ម៉ម ប៊ុនហេង រដ្ឋមន្ត្រីក្រសួងសុខាភិបាលបានធ្វើការណែនាំនូវវិធានការសាមញ្ញការពារសុខភាពដូចខាងក្រោមនេះ ៖
១-ការពុលចំណីអាហារ៖ គឺបណ្តាលមកពីការបរិភោគចំណីអាហារមិនស្អាត ចម្អិនមិនបានឆ្អិនល្អ ឬទឹកកង្វក់ដែលមានមេរោគ បាក់តេរី វីរុស ប៉ារ៉ាស៊ីត ឬសារធាតុគីមី ។ ដើម្បីចៀសផុតពីការពុលចំណីអាហារនេះ ដែលភាគច្រើនបណ្តាលមកពីការរៀបចំទុកដាក់អាហារមិនមានអនាម័យ និងសម្ភារៈចម្អិនមិនបានល្អ ។ ក្រសួងលើកទឹកចិត្តឲ្យបងប្អូនប្រជាពលរដ្ឋទាំងអស់ គឺគ្រប់គ្នាៗចាប់តាំងពីអ្នកបរិភោគរហូតដល់អ្នកបំរើអាហារ ដើរតួនាទីយ៉ាងសំខាន់នៅក្នុងការលើកម្ពស់សុវត្ថិភាពចំណីអាហារ ដោយការអនុវត្តន៍ចំណីអាហារល្អ លាងសំអាតចំណីអាហារ និងសម្ភារៈសំរាប់ចំអិនឲ្យបានត្រឹមត្រូវមុនពេលចំអិន ឬមុនពេលបរិភោគ រក្សាសុវត្ថិភាពចំណីអាហារជានិច្ច ដោយរក្សាទុកដាក់ត្រឹមត្រូវ និងចម្អិនអាហារឲ្យបានឆ្អិនល្អ កុំពិសារសាច់ឆៅ ឬអាហារដែលមិនឆ្អិនល្អ ឬអាហារដែលទុកយូរ និងត្រូវពិសារទឹកឆ្អិន ឬទឹកស្អាត ឬទឹកបរិសុទ្ធ និងត្រូវលាងដៃឲ្យបានស្អាតជាមួយសាប៊ូ និងឲ្យបានញឹកញាប់ ហើយត្រូវបន្ទារបង់នៅតាមទីកន្លែងដែលមានបង្គន់អនាម័យ និងត្រូវចោលសំរាមនៅក្នុងធុងសំរាម។
២- ចំពោះគ្រឿងស្រវឹង៖ ចំពោះមនុស្សពេញវ័យទាំងអស់ សូមពិសារគ្រឿងស្រវឹងដោយការទទួលខុសត្រូវនៅក្នុងកំរិតតិចតួច និងហាមពិសារគ្រឿងស្រវឹងក្នុងពេលបើកបរ ឬបញ្ជាគ្រឿងម៉ាស៊ីន។ សូមបើកបរដោយមានការប្រុងប្រយ័ត្ន កុំបើកបរលឿនពេក និងប្រកាន់ភ្ជាប់នូវច្បាប់បើកបរ។ សូមកុំពិសារស្រាដែលផលិតមិនមានបច្ចេកទេសត្រឹមត្រូវ ហើយបើមានរោគសញ្ញានៃការពុលស្រា ដូចជា ឈឺក្បាល ក្អួត ឈឺពោះ វិលមុខ ងងឹតភ្នែក សន្លប់ ប្រកាច់ និងពិបាកដកដង្ហើម សូមស្វែងរកការពិនិត្យព្យាបាល និងជួយសង្គ្រោះជាបន្ទាន់ទៅតាមស្តង់ដាពេទ្យប្រចាំការចល័ត ឬនៅមណ្ឌលសុខភាព ឬទៅមន្ទីរពេទ្យដែលនៅជិតលោកអ្នកបំផុត។
៣- ការប្រជ្រៀតគ្នានិងការដួលសន្លប់៖ ក្រសួងសុខាភិបាល សូមអំពាវនាវឲ្យប្រជាពលរដ្ឋដែលចូមរួម ឬដើរកំសាន្ត ក្នុងព្រះរាជវិធីបុណ្យខាងលើ សូមកុំឈរ ឬអង្គុយប្រជ្រៀតគ្នាដែលធ្វើឲ្យមានសភាពថប់ណែន (ត្រូវទុកកន្លែងឲ្យទូលាយបន្តិច ឬឲ្យមានខ្យល់ចេញចូលបាន) ប្រសិនបើមានអាការៈសុខភាពមិនប្រក្រតីដូចជា វិលមុខ ស្រវាំងភ្នែក ស្ងាយច្រើនដង បែកញើសខុសធម្មតា ឬថប់ៗ សូមអង្គុយចុះ ហើយឆាប់រកភ្នាក់ងារសន្តិសុខ ឬបុគ្គលិតសុខាភិបាល ដើម្បីទទួលបាននូវការព្យាបាលបានទាន់ពេល នៅតាមស្តង់គ្រូពេទ្យប្រចាំការចល័ត ដែលមានទីតាំនៅជិតពិធី។ ក្រសួងសុខាភិបាលសូមលើកទឹកចិត្តឲ្យសារធារណជនទូទៅអនុវត្តន៍តាមដំបូន្មានសាមញ្ញខាលើ ដើម្បីការពារអ្នក និងក្រុមគ្រួសារ ៕
ចែករំលែកព័តមាននេះ