ក្រុងប៉ោយប៉ែត ៖ ដើម្បីរឹតបន្តឹងចំណងសាមគ្គីភាពរវាងកងកម្លាំងនគរបាលវរសេនាតូចការពារព្រំដែនគោកលេខ៩១១ ភាគីកម្ពុជា និងកងកម្លាំងទាហានឈុតខ្មៅ កងអនុសេនាធំលេខ១២០១នៃ ភាគី ថៃ កាលពីព្រឹកថ្ងៃទី២៥ ខែតុលា…
ក្រុងប៉ោយប៉ែត ៖ ដើម្បីរឹតបន្តឹងចំណងសាមគ្គីភាពរវាងកងកម្លាំងនគរបាលវរសេនាតូចការពារព្រំដែនគោកលេខ៩១១ ភាគីកម្ពុជា និងកងកម្លាំងទាហានឈុតខ្មៅ កងអនុសេនាធំលេខ១២០១នៃ ភាគី ថៃ កាលពីព្រឹកថ្ងៃទី២៥ ខែតុលា ឆ្នាំ២០១៧ នៅចំណុចប៉ុស្តិ៍គោលដៅ៤១ ឋិតក្នុងភូមិដុងងូ ឃុំប៉ារ៉ៃ ស្រុកអារ័ញ្ញ ខេត្តស្រះកែវ ប្រទេសថៃ ឈមទៅនឹងភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ កម្លាំងនគរបាលការពារព្រំដែនគោក៩១១ បានជំនួបរវាងកម្លាំងទាហានឈុតខ្មៅថៃ កងអនុសេនាធំលេខ១២០១ ។
ភាគីកម្ពុជាដឹកនាំកម្លាំងដោយលោកអនុសេនីយ៍ឯក រស់ ពិសិដ្ឋ នាយប៉ុស្តិ៍បឹងសាគូរួមកម្លាំង៦នាក់ ចំណែកកម្លាំងភាគីថៃ ដឹកនាំដោយលោកវរៈសេនីយ៍ត្រី ឆាន វង្សរ៉ៃមេធី មេបញ្ជាការកងអនុសេនាធំ១២០១។ នៅក្នុងជំនួបរវាងភាគីកម្ពុជា និងភាគីថៃ នោះបានលើកយកបីចំណុចគោលដៅសំខាន់ៗ ដែលតែងតែលួចឆ្លងដែន និងជួបបញ្ហាប្រឈមដល់អាយុជីវិត ព្រមទាំងលើកយកមកពិភាក្សាដល់ពលរដ្ឋខ្មែរ រស់នៅតាមបន្ទាត់ព្រំដែនមួយចំនួនធំ ពួកគាត់ឆ្លងដែនទៅព្រឹក វិលល្ងាច ទៅប្រកបការងារក្នុងទឹកដីថៃមានដូចជាស៊ីឈ្នួលបោចស្មៅចំការ ដកដំឡូងមី កាប់អំពៅ ។ល។ ដើម្បីយកប្រាក់មកផ្គត់ផ្គង់ក្នុង ជីវភាព គ្រួសារ របស់ពួកគាត់ប្រចាំថ្ងៃ ។
ប្រភពពីមន្ត្រីដែលចូលរួមក្នុងកិច្ចប្រជុំខាងលើបានប្រាប់ឲ្យដឹងថា ចំណុចដែលសំខាន់ៗដែលសមត្ថកិច្ចរួមគ្នាទប់ស្កាត់នោះមាន ៖ ទី១-រួមគ្នាទប់ស្កាត់បទល្មើសគ្រឿងញៀនឆ្លងដែន, ទី២-រួមគ្នាទប់ស្កាត់បទល្មើសចោរកម្មឆ្លងដែន និងទី៣-រួមគ្នាទប់ស្កាត់បទល្មើសឆ្លងខុសដែនខុសច្បាប់តែម្តង ៕
ចែករំលែកព័តមាននេះ