ខេត្តស្ទឹងត្រែង ៖ រថយន្តដឹកឈើ បុកម៉ូតូដឹកឈើដូចគ្នាចំពីក្រោយពេញទំហឹងបណ្តាលឲ្យប្តីរបួសធ្ងន់ ប្រពន្ធជិះពីលើឈើបានស្លាប់បាត់បង់ជីវិតនៅនឹងកន្លែង ហេតុការណ៍គ្រោះថ្នាក់ចរាចរណ៍នេះកើតឡើងនៅវេលាម៉ោង៤និង៣០នាទីព្រឹកថ្ងៃទី២១ ខែតុលា ឆ្នាំ២០១៧ នៅលើកំណាត់ផ្លូវជាតិលេខ៩ ស្ថិតនៅចំណុចភូមិអូរត្រែល ឃុំថាឡាបរិវ៉ាត់ ស្រុកថាឡាបរីវ៉ាត់ ខេត្តស្ទឹងត្រែង ។
ជនរងគ្រោះប្រពន្ធឈ្មោះ សុល ហាស់ អាយុ៤៧ឆ្នាំ ជាជនជាតិខ្មែរឥស្លាម បានស្លាប់ និងប្តីឈ្មោះ មីន លាប់ មានអាយុ៤៨ឆ្នាំ របួសធ្ងន់ រស់នៅភូមិអន្លង់ក្រមួន ឃុំស្រែឬស្សី ស្រុកថាឡាបរីវ៉ាត់ ខេត្តស្ទឹងត្រែង ។
លោក នូរ សុខុម មេប៉ុស្តិ៍ឃុំថាឡាបរិវ៉ាត់បានឲ្យដឹងថា មុនពេលកើតហេតុ ជនរងគ្រោះបានជិះម៉ូតូ០១គ្រឿងដឹកឈើ ហើយបើកចេញពីឃុំស្រែឬស្សី ក្នុងស្រុកថាឡាបរីវ៉ាត់ ទៅកាន់ទីរួមខេត្តស្ទឹងត្រែង លុះមកដល់ចំណុចកើតហេតុខាងលើ ស្រាប់តែមានរថយន្ត១គ្រឿងទៀតដែលមិនបានស្គាល់អត្តសញ្ញាណធ្វើដំណើរស្របទិសគ្នាយ៉ាងលឿនដូចហោះ បានទៅបុកចំម៉ូតូដឹកឈើពីក្រោយពេញទំហឹងបណ្តាលឲ្យអ្នកជិះម៉ូតូដឹកឈើ២នាក់ ម្នាក់ប្រពន្ធបានផ្លោងចេញពីលើម៉ូតូស្លាប់ភ្លាមៗនៅនឹងកន្លែង រីឯប្តីរបួសធ្ងន់ ។
ចំណែករថយន្តបង្កបានបើករត់គេចបាត់ស្រមោល សល់ទុកតែម៉ូតូ និងជនរងគ្រោះតប៉ុណ្ណោះ ។
ក្រោយកើតហេតុត្រូវបានគេដឹកយកទៅសង្គ្រោះបន្ទាន់នៅឯមន្ទីពេទ្យបង្អែកខេត្តស្ទឹងត្រែង ។ ម៉ូតូត្រូវរថយន្តបុក ពណ៌ក្រហម អត់ស្លាក់លេខ រួមនិងឈើប្រណិត៨ដុំ ត្រូវបានសមត្ថកិច្ចវាស់វែងដឹកយកមករក្សាទុកនៅប៉ុស្តិ៍រដ្ឋបាលឃុំថាឡាបរិវ៉ាង ។ បច្ចុប្បន្នសពជនរងគ្រោះ បានប្រគល់ទៅឱ្យក្រុមគ្រួសារយកទៅធ្វើបុណ្យតាមប្រពៃណី។ចំណែករថយន្តបង្កសមត្ថកិច្ចកំពុងស្វែងរកដើម្បីចាត់ការតាមផ្លវច្បាប់៕
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ