រាជធានីភ្នំពេញ ៖ រយៈពេល១ឆ្នាំចុងក្រោយនេះ ថ្វីដ្បិតតែការកកស្ទះចរាចរណ៍មិនថមថយ តែអាកប្បកិរិយារបស់អ្នកប្រើប្រាស់ផ្លូវថ្នល់ហាក់ដូចជាមានរបៀបរៀបរយ និងប្រសើរឡើងជាបន្ដបន្ទាប់ ហើយសង្ឃឹមថា ការធ្វើដំណើរលើដងផ្លូវនឹងកាន់តែប្រសើរឡើងដូចប្រទេសជិតខាង ។ ការយល់ដឹងពីច្បាប់ចរាចរណ៍ផ្លូវគោក…
រាជធានីភ្នំពេញ ៖ រយៈពេល១ឆ្នាំចុងក្រោយនេះ ថ្វីដ្បិតតែការកកស្ទះចរាចរណ៍មិនថមថយ តែអាកប្បកិរិយារបស់អ្នកប្រើប្រាស់ផ្លូវថ្នល់ហាក់ដូចជាមានរបៀបរៀបរយ និងប្រសើរឡើងជាបន្ដបន្ទាប់ ហើយសង្ឃឹមថា ការធ្វើដំណើរលើដងផ្លូវនឹងកាន់តែប្រសើរឡើងដូចប្រទេសជិតខាង ។
ការយល់ដឹងពីច្បាប់ចរាចរណ៍ផ្លូវគោក និងស្លាកសញ្ញាចរាចរណ៍ ជាកត្តាចាំបាច់មួយជួយឲ្យម្ចាស់យានជំនិះទាំងឡាយដឹងច្បាស់ថា ខ្លួនកំពុងបើកបរលើទិសដៅខុសឬត្រូវ និងដឹងច្បាស់ថា ខ្លួនគួរឬមិនគួរ មុននឹងសម្រេចចិត្តឈប់, បត់ឆ្វេងឬស្ដាំ និងទិសដៅដែលខ្លួនឆ្ពោះទៅនោះ គួរបើកបរលើគន្លងមួយណា ជាដើម ។
នៅថ្ងៃនេះ សារព័ត៌មានកោះសន្ដិភាព ផ្នែករថយន្ត និងបច្ចេកវិទ្យា សូមលើកយកការកំណត់ល្បឿននៃការបើកបរថា តើរថយន្ដ ឬម៉ូតូ ត្រូវបើកបរក្នុងល្បឿនប៉ុន្មាននៅក្នុងទីប្រជុំជន និងក្រៅទីប្រជុំជន ។
ការកំណត់ល្បឿនបើកបរក្នុងទីប្រជុំជន រថយន្ដគ្រប់ធុនបើកបរក្នុងល្បឿន៤០គីឡូម៉ែត្រក្នុង១ម៉ោង, ម៉ូតូ និងរ៉ឺម៉កកង់បី បើកបរក្នុងល្បឿន៣០គីឡូម៉ែត្រក្នុង១ម៉ោង ។ ចំណែកនៅក្រៅទីប្រជុំជន រថយន្ដគ្រប់ប្រភេទបើកបរក្នុងល្បឿន៨០គីឡូម៉ែត្រក្នុង១ម៉ោង, ម៉ូតូកម្លាំង១២៥សេសឡើង ៧០គីឡូម៉ែត្រក្នុង១ម៉ោង, ម៉ូតូកម្លាំងក្រោម១២៥សេស ៦០គីឡូម៉ែត្រក្នុង១ម៉ោង, រ៉ឺម៉កកង់បី និងត្រាក់ទ័រ ៤០គីឡូម៉ែត្រក្នុង១ម៉ោង ។
យោងតាមច្បាប់ស្ដីពីចរាចរណ៍ផ្លូវគោក មាត្រា១៦ ចែងថា ល្បឿនបើកបរយានជំនិះត្រូវបានកំណត់តាមលក្ខខណ្ឌដូចខាងក្រោម ៖
-ការកំណត់ល្បឿនសម្រាប់យានជំនិះត្រូវបានកំណត់ដោយអនុក្រឹត្យ ។
-អ្នកបើកបរមិនត្រូវប្រើល្បឿនយឺតខុសប្រក្រតីដោយគ្មានមូលហេតុត្រឹមត្រូវ ដែលធ្វើឲ្យរំខានដល់យានជំនិះដទៃទៀតទេ ។ អ្នកបើកបរដែលប្រើល្បឿនយឺត ត្រូវបើកបរអែបទៅខាងស្ដាំ ដើម្បីទុកឲ្យអ្នកបើកបរដែលប្រើល្បឿនលឿន ជែងខាងឆ្វេងដៃបានដោយងាយស្រួល ។
-អ្នកបើកបរណាដែលត្រូវបង្ខំចិត្តបន្ថយល្បឿនឲ្យយឺតខុសប្រក្រតី ត្រូវឲ្យដំណឹងដល់អ្នកបើកបរផ្សេងទៀត ដោយប្រើភ្លើងសញ្ញាអាសន្ន ហើយត្រូវបើកបរអែបទៅខាងស្ដាំបំផុតនៃទ្រូងផ្លូវ ។
-បទប្បញ្ញត្តិកំណត់ល្បឿន មិនអនុវត្តចំពោះអ្នកបើកបរយានយន្ដក្បួននគរបាល ក្បួនយោធា ក្បួនគណៈប្រតិភូ ក្បួនថ្នាក់ដឹកនាំជាន់ខ្ពស់ យានយន្ដពន្លត់អគ្គិភ័យ យានយន្ដសង្គ្រោះរបស់មន្ទីរពេទ្យ និងយានយន្ដខ្លះទៀតដែលបន្លឺសូរស័ព្ទ ភ្លើងសញ្ញា ពិសេសនៅពេលកំពុងបំពេញភារកិច្ចឡើយ ។
តាមរបាយការណ៍ពីនាយកដ្ឋានចរាចរណ៍ និងសណ្តាប់ធ្នាប់សាធារណៈនៃអគ្គស្នងការដ្ឋាននគរបាលជាតិ បានឲ្យដឹងថា នៅថ្ងៃទី១២ កញ្ញា កន្លងមក មានហេតុការណ៍គ្រោះថ្នាក់ចរាចរណ៍នៅទូទាំងប្រទេស កើតឡើងចំនួន៧លើក បណ្តាលឲ្យមនុស្សស្លាប់៤នាក់ ។ ករណីគ្រោះថ្នាក់ចរាចរណ៍ទាំងនេះ បានបង្កឲ្យខូចខាតយានយន្តសរុប១៤គ្រឿង ដែលមូលហេតុបណ្តាលមកពីការបើកល្មើសល្បឿន៣លើក, មិនប្រកាន់ស្តាំ២លើក និងប្រជែង២លើក ៕
ចែករំលែកព័តមាននេះ