រាជធានីភ្នំពេញ ៖ នៅពេលនិយាយដល់ឈ្មោះនាយតេឡេ ទស្សនិកជនពិតជាស្គាល់តាមរយៈក្រុមកំប្លែងនាយគ្រឿននៅក្នុងកម្មវិធីតន្ត្រីMyTV ។ ថ្វីដ្បិតតែតារាកំប្លែងរូបនេះទើបតែលេចមុខនៅតាមកញ្ចក់ទូរទស្សន៍ពិតមែន តែនាយត្រូវគេទទួលស្គាល់ថា ពូកែបញ្ចេញទឹកមុខនិងកាយវិការទាក់ទាញអ្នកទស្សនាឱ្យសើចសប្បាយ ។
រាជធានីភ្នំពេញ ៖ នៅពេលនិយាយដល់ឈ្មោះនាយតេឡេ ទស្សនិកជនពិតជាស្គាល់តាមរយៈក្រុមកំប្លែងនាយគ្រឿននៅក្នុងកម្មវិធីតន្ត្រីMyTV ។ ថ្វីដ្បិតតែតារាកំប្លែងរូបនេះទើបតែលេចមុខនៅតាមកញ្ចក់ទូរទស្សន៍ពិតមែន តែនាយត្រូវគេទទួលស្គាល់ថា ពូកែបញ្ចេញទឹកមុខនិងកាយវិការទាក់ទាញអ្នកទស្សនាឱ្យសើចសប្បាយ ។
ជួបជាមួយអ្នកសារព័ត៌មានកោះសន្តិភាព នាយតេឡេប្រាប់ឱ្យដឹងថា នាយមានឈ្មោះថា ប៉េង វុទ្ធី ស្រុកកំណើតនៅភូមិលើកដែក ឃុំខ្ពបអាទាវ ស្រុកលើកដែក ខេត្តកណ្តាល ។ នាយមិនមានបងប្អូនជាអ្នកសិល្បៈទេ គឺសមាជិកគ្រួសាររបស់នាយជាកសិករធម្មតាប៉ុណ្ណោះ ។ នាយមានបងប្អូនចំនួន៨នាក់ក្នុងនោះប្រុស៤នាក់ ចំណែករូបនាយគឺជាកូនទី៤ ។
នាយតេឡេបានរំលឹកពីអតីតកាលឱ្យដឹងថា ព្រោះតែជីវភាពគ្រួសាររបស់នាយក្រីក្រពេក នាយបានបញ្ចប់ការសិក្សាត្រឹមថ្នាក់ទី៩ ។ ដោយសារតែចិត្តស្រឡាញ់សិល្បៈលោកប៉េង វុទ្ធី បានចាប់អាជីពជាតន្ត្រីករផ្នែកចម្រៀងសម័យជាមួយក្រុមនៅស្រុកកំណើត តាំងពីនាយអាយុ១៧ឆ្នាំម៉្លេះ ។ រយៈពេល៦ឆ្នាំក្រោយមកនាយសម្រេចចិត្តប្តូរអាជីពទៅធ្វើជាអ្នកលេងល្ខោនបាសាក់វិញ គឺនៅក្រុមល្ខោនបាសាក់ម៉ាប់ស្រីរស្មីជាតិដោយសារតែអាជីពជាតន្ត្រីករមិនសូវរកចំណូលបានច្រើនអាចចិញ្ចឹមជីវិតបាន ។
ក្រោយពីចាប់អាជីពខាងសម្តែងល្ខោនបាសាក់អស់រយៈពេល៤ឆ្នាំ នាយតេឡេសម្រេចចិត្តដាក់ពាក្យប្រលងធ្វើជាតារាសម្តែងនៅស្ថានីយទូរទស្សន៍ប៉ុស្តិ៍លេខ៥ ក្នុងកម្មវិធីតារាមាសតន្ត្រី និងបានជាប់ចំណាត់ថ្នាក់លេខ៣ ។បន្ទាប់ពីប្រលងជាប់ហើយនាយតេឡេមិនបានចេញទៅសម្តែងនៅទីណាទេ តែនាយបានចាប់យកអាជីពជាអ្នកចម្រៀងប្រពៃណីខ្មែរវិញម្តង ។ បន្ទាប់ពីចេះច្រៀងបទប្រពៃណីស្ទាត់ជំនាញហើយ នាយតេឡេបែកគំនិតធ្វើជាអ្នកកំប្លែងនិងកាត់សក់នៅក្នុងពិធីមង្គលការទៀត ។
នាយតេឡេឱ្យដឹងថា ដោយសារតែចិត្តស្រឡាញ់ខាងផ្នែកកំប្លែង និងចង់ក្លាយខ្លួនជាអ្នកកំប្លែងអាជីពផងនោះនាយបានដាក់ពាក្យប្រលងនៅស្ថានីយទូរទស្សន៍អប្សរា តែប្រលងមិនជាប់នោះទេ ។ ដោយមិនអស់ចិត្តនាយបានដាក់ពាក្យប្រលងនៅស្ថានីយទូរទស្សន៍CTN វិញម្តង តែនៅតែមិនបានជាប់ដដែល ។
ភាពបរាជ័យទាំង២លើកនេះបានវាយប្រហារមកលើទឹកចិត្តនាយតេឡេយ៉ាងខ្លាំង តែវាអាចបញ្ជាក់ថារូបលោកនៅមានចំណុចខ្វះខាត ដូច្នេះពេលទំនេរនាយបានហាត់រៀនដោយខ្លួនឯងបន្ថែមទៀត ។ក្រោយមកនាយតេឡេត្រូវនាយក្រូច និងនាយតាក់ស៊ីដែលជាមិត្តភក្តិណែនាំឱ្យស្គាល់លោកតាវិចទ័រ ។ ដោយមានការអាណិតអាសូរកូនកសិករ និងទីទ័លក្រម្នាក់នេះ ហើយម្យ៉ាងប្រលងជាច្រើនលើកនៅតែមិនជាប់ទៀតនោះ លោកតាវិចទ័រក៏ហៅរូបនាយឱ្យទៅចូលសម្តែងវិញ ដូច្នេះហើយទើបមានវត្តមាននៅតាមកញ្ចក់ទូរទស្សន៍រហូតមកដល់សព្វថ្ងៃនេះ ។ក្រោយពីចាប់អាជីពជាតារាកំប្លែងមកជីវភាពគ្រួសាររបស់នាយតេឡេបានប្រសើរឡើងមួយកម្រិត ។ ក្រៅពីធ្វើជាតារាកំប្លែងនោះ នាយតេឡេមិនបោះបង់ចោលអាជីពជាអ្នកចម្រៀង និងកាត់សក់នៅតាមពិធីមង្គលការទេ ។ នៅពេលទំនេរពីការងារសិល្បៈនាយឆ្លៀតពេលធ្វើចំការបន្តិចបន្តួចទៀត ។
លោកប៉េង វុទ្ធី ហៅនាយតេឡេបានរៀបអាពាហ៍ពិពាហ៍ជាមួយនាងខុន ស្រីទិន ដែលជាអ្នកលេងភ្លេងបុរាណ និងជាអ្នកចម្រៀងប្រពៃណីជាមួយគ្នានៅឆ្នាំ១៩៩៧ ហើយពេលនេះមានកូនស្រីម្នាក់ និងកូនប្រុសម្នាក់ ៕
ចែករំលែកព័តមាននេះ