រាជធានីភ្នំពេញ ៖ យុវជនម្នាក់បានក្លាយជាអ្នកទោសស្នេហា និងត្រូវបានសមត្ថកិច្ចឃាត់ខ្លួនតាមពាក្យបណ្តឹងរបស់ស្ត្រីម្នាក់ ដែលបានប្តឹងចោទប្រកាន់ថា រូបគេធ្វើសកម្មភាពចាប់រំលោភសេពសន្ថវៈលើរូបនាងរហូតបានសម្រេចចំនួន២ដងនៅក្នុងយប់តែមួយ ។ ប៉ុន្តែអ្វីដែលធ្វើឱ្យមានការភ្ញាក់ផ្អើលនោះ គឺក្រោយពេលសមត្ថកិច្ចចាប់ខ្លួនយុវជនរូបនោះបានប្រាប់ថា មិនមែនជាការចាប់រំលោភទេ គឺរូបគេ និងនាងម្នាក់នោះស្រឡាញ់គ្នាដល់ឆ្អឹង និងបានស្ម័គ្រចិត្តរួមមេត្រីជាមួយគ្នា២ដងក្នុងយប់តែមួយមិនមែនជាការចាប់រំលោភដូចការចោទប្រកាន់នោះឡើយ ។
តួប្រុសត្រូវបានខាងស្រីទូរស័ព្ទអន្ទងហៅឱ្យសមត្ថកិច្ចចាប់ខ្លួនកាលពីថ្ងៃទី២២ កញ្ញា ២០១២ នៅក្នុងបន្ទប់ផ្ទះជួលមួយកន្លែងដែលមានទីតាំងស្ថិតក្នុងក្រុមទី១០ ភូមិប៉ប្រកខាងត្បូង សង្កាត់កាកាប ខណ្ឌពោធិ៍សែនជ័យ បន្ទាប់ពីបានរួមមេត្រីជាមួយនឹងនាងម្នាក់នោះរួចបាន៣ថ្ងៃ ។
យុវជនជាប់ចោទរូបនោះឈ្មោះឱង រ៉ាវី ហៅដួង អាយុ២២ឆ្នាំ ជាកម្មកររោងចក្រ មានទីលំនៅភូមិកើតហេតុខាងលើ កំពុងត្រូវបានសមត្ថកិច្ចកសាងសំណុំរឿងបញ្ជូនទៅតុលាការហើយ ។ ដោយឡែកនារីដែលអះអាងថា យុវជនរូបនោះចាប់រំលោភសេពសន្ថវៈបានសម្រេចដល់ទៅ២ដងនោះមានអាយុ១៨ឆ្នាំ ស្នាក់នៅក្នុងបន្ទប់ផ្ទះជួលកើតហេតុខាងលើ ។
ប្រភពព័ត៌មានបានឱ្យដឹងថា រវាងជនជាប់ចោទ និងស្ត្រីម្នាក់នោះគឺបានស្រឡាញ់គ្នាដល់ឆ្អឹង ហើយនៅថ្ងៃទី១៩ កញ្ញា ២០១២ មុនពេលកើតហេតុ ខណៈពេលដែលស្ត្រីរូបនោះកំពុងនៅក្នុងបន្ទប់ផ្ទះជួលតែម្នាក់ឯង យុវជនរូបនោះបានទូរស័ព្ទទៅកាន់ជនរងគ្រោះនិយាយសុំដេកជាមួយនាងមួយយប់ ។ ពេលនោះនាងមិនបានប្រកែកទេ បានយល់ព្រមឱ្យយុវជនខាងលើដេកជាមួយនាង ហើយបន្ទាប់ពីមានភ្លើងខៀវពីស្ត្រីរូបនេះយុវជននោះក៏បានដើរទៅកាន់បន្ទប់របស់នាងទាំងយប់យ៉ាងតក់ក្រហល់ និងត្រេកអរបំផុតតែម្តង ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ