រាជធានីភ្នំពេញ ៖ បច្ចុប្បន្ននេះការផលិតខ្សែវីដេអូភាគដាក់បញ្ចាំងតាមទូរទស្សន៍មានការកើនឡើងព្រោងព្រាតស្ទើរគ្រប់ស្ថានីយគួរឱ្យកត់សម្គាល់ ។ បើទោះបីជាបែបនេះក្តី មានមតិមួយចំនួនលើកឡើងថា ការផលិតរបស់ផលិតករមួយចំនួនអាចនឹងធ្លាក់ចុះទៅវិញ នៅពេលមិនមានការគាំទ្រ ព្រោះពុំទាន់មានគុណភាពល្អ ខណៈមានការប្រកួតប្រជែងច្រើន ។
វីដេអូខ្សែភាគខ្មែរកំពុងតែបង្ហាញវត្តមានតាមស្ថានីយ៍ទូរទស្សន៍ក្នុងស្រុកមានដូចជារឿង បេះដូងអ្នកការពារ របស់ស្ថានីយទូរទស្សន៍ CTN រឿងជីវិតលើវិថីសិល្បៈ របស់ស្ថានីយទូរទស្សន៍អាសីុអាគ្នេយ៍ និងរឿងពន្លកស្នេហ៍ជាយដែន របស់ស្ថានីយទូរទស្សន៍បាយ័នព័ត៌មានជាដើម ។
ផលិតករភាពយន្ត លោកមុត ថារី អះអាងប្រាប់កោះសន្តិភាពក្នុងជំនួបផ្ទាល់នៅថ្ងៃទី១៩ កញ្ញា ឆ្នាំ២០១២ ថា ការផលិតជាខ្សែវីដេអូភាគសម្រាប់ដាក់បញ្ចាំងតាមទូរទស្សន៍ គឺលោកទទួលស្គាល់ថា មានខ្លះល្អ និងខ្លះក៏មិនល្អ តែទោះជាយ៉ាងណាក្តី លោកយល់ថា ទាំងអស់នេះមិនមែនជាមូលហេតុចម្បងដែលធ្វើឱ្យខ្សែភាពយន្តខ្មែរបច្ចុប្បន្នដើរថយក្រោយទេ ។ ប្រសិនបើមានការប្រកួតប្រជែងគ្នានោះ គឺរឹតតែធ្វើឱ្យសិល្បៈមួយនេះមានការរីកចម្រើន ។
លោកថារី ថ្លែងថា «ការប្រកួតប្រជែងគ្នាខាងផលិតខ្សែភាពយន្តនេះ មិនខុសអ្វីពីការប្រកួតប្រជែងគ្នានៅលើសេដ្ឋកិច្ចទីផ្សារសេរីឡើយ ពោលបើផលិតផលណាល្អគេទិញ ព្រោះសម័យនេះគេស្វែងរកអ្វីដែលមានការរីកចម្រើន។ ផលិតករទាំងអស់ប្រសិនបើដឹងថា ខ្លួនឯងផលិតអន់គឺត្រូវស្វែងយល់ចំណុចដែលខ្វះខាត ហើយផលិតករណាដែលផលិតបានល្អនោះត្រូវតែមានការខិតខំបន្ថែមទៀត ហេតុនេះវាមិនមានការរំខានណាមួយក្នុងការផលិតកុននោះឡើយ»។
អ្នកដឹកនាំរឿងរូបនេះលើកឡើងថា ការផលិតជាខ្សែវីដេអូភាគសម្រាប់ចាក់ផ្សាយតាមទូរទស្សន៍ គឺសុទ្ធតែមានម្ចាស់ឧបត្ថម្ភគាំទ្រក្នុងការផលិត ហេតុនេះបើផលិតករមួយផលិតរឿងមិនបានល្អនោះ គឺម្ចាស់ឧបត្ថម្ភប្រាកដជាដកខ្លួនថយ ។ គ្រប់ផលិតករទាំងអស់កាលណាគាត់ផលិតរឿងមួយនោះ គាត់ប្រាកដជាមានការប្រកួតប្រជែងខាងស្នាដៃ ហេតុនេះគ្រប់ផលិតករប្រាកដជាស្រាវជ្រាវសិក្សាពីភាពយន្តបរទេសដើម្បីរកភាពរីកចម្រើនទៅលើស្នាដៃផលិតរបស់ខ្លួន ។ ទាំងអស់នេះហើយដែលលោកជឿថា ការផលិតវីដេអូភាគតាមទូរទស្សន៍មិនអាចមានការថយក្រោយឡើយ ដរាបណាខាងម្ចាស់ទូរទស្សន៍នៅតែមានឆន្ទៈក្នុងការផលិតនោះ ។
គ្រប់ផលិតករទាំងអស់ត្រូវតែមានឆន្ទៈថា ប្រសិនបើខ្លួនផលិតកុនទៅហើយមិនបានជោគជ័យនោះគួរតែដកខ្លួនថយ។ មានន័យថា កុនដែលយើងបានផលិតនោះប្រាកដជាមានការខ្វះខាតអ្វីមួយ ហេតុនេះយើងដកខ្លួនដើម្បីសិក្សាពីគេបន្ថែម ។
គ្រប់ផលិតករទាំងអស់ត្រូវផលិតរឿងបែបណាដែលមានលក្ខណៈសច្ចៈ មានន័យថា ប្រសិនបើយើងផលិតរឿងមួយដែលហួសពីការពិតនោះអ្នកទស្សនាក៏គេមិនជឿរដែរ ហើយបញ្ហានេះ លោកអំពាវនាវដល់ក្រសួងវប្បធម៌ឱ្យពិនិត្យមើលផង ។លោកមុត ថារី មានជំនឿថា ការផលិតវីដេអូភាគដាក់បញ្ចាំងតាមទូរទស្សន៍មិនអាចថយក្រោយឡើយ ព្រោះប្រសិនបើមានការប្រកួតប្រជែងប្រាកដជាមានការរីកចម្រើន ហើយគ្រប់ផលិតករទាំងអស់សុទ្ធតែមានការប្រឹងប្រែងរៀងខ្លួនទៅលើស្នាដៃដែលខ្លួនបានផលិត បើទោះជាពេលខ្លះការផលិតនោះនៅមានចំណុចខ្វះខាតក៏ដោយ តែយើងគួរតែមានការលើកទឹកចិត្តដល់ផលិតករទាំងនោះដែលនៅតែមានឆន្ទៈក្នុងការផលិតកុនខ្មែរឲ្យរស់ជានិច្ច ។
ស្រដៀងគ្នានេះ ផលិតករភាពយន្តលោក គាំ ចន្ធី អះអាងប្រាប់កោះសន្តិភាពតាមទូរស័ព្ទថា គ្រប់បណ្តាស្ថានីយទូរទស្សន៍ក្នុងស្រុកទាំងអស់ប្រសិនបើមានគំនិតក្នុងការចាក់កុនខ្មែរត្រឹមតែ៣០ភាគរយនៃម៉ោងផ្សាយរបស់ខ្លួននោះ គឺជាសញ្ញាមួយល្អ ព្រោះក្នុងនោះយើងក៏បានបង្ហាញអ្វីជារបស់ខ្មែរដែរ។ ប៉ុស្តិ៍ទូរទស្សន៍មួយចំនួនបានគិតតែពីផលប្រយោជន៍ខ្លួន មិនគិតពីផលប្រយោជន៍រួមឡើយ ដោយពួកគេទាំងនោះបានចំណាយលុយទិញសិទ្ធិរឿងបរទេសយកមកបញ្ចាំងជាងការចំណាយដើមទុនដើម្បីផលិតកុនខ្មែរដោយខ្លួនឯង ។
លោកគាំ ចន្ធី សង្កត់ធ្ងន់ថា «ទាំងអស់នេះហើយដែលធ្វើឲ្យខ្សែភាពយន្តខ្មែរនាពេលបច្ចុប្បន្នកាន់តែធ្លាក់ចុះ និងធ្វើឲ្យក្មេងៗជំនាន់ក្រោយមិនបានស្គាល់អ្វីផលិតដោយស្នាដៃរបស់ខ្មែរ ។ ប្រសិនបើគ្រប់បណ្តាស្ថានីយទូរទស្សន៍មានឆន្ទៈក្នុងការផលិតខ្សែភាពយន្តនោះត្រូវរៀបចំជាកញ្ចប់ថវិកាមួយសម្រាប់ផលិតករឲ្យបានច្បាស់លាស់ ហើយត្រូវមានការពិភាក្សាគ្នាថា ថវិកាត្រឹមប៉ុណ្ណឹងអាចផលិតកុនបានកម្រិតណាដែលយើងអាចទទួលយកបាន»។
ផលិតកររូបនេះទទួលស្គាល់ថា ថវិកាក្នុងការផលិតកុនមួយភាគនៅក្នុងស្រុកខ្មែរ គឺនៅមានចំនួនតិចតួចនៅឡើយ បើប្រៀបធៀបទៅនឹងប្រទេសជិតខាង តែទោះជាយ៉ាងណាក្តី ផលិតករខ្មែរយើងនៅតែអាចទទួលយកបាន ហើយអាចផលិតកុនបានសមល្មមដែលអាចឲ្យប្រជាជនខ្មែរយើងទស្សនា ។ លោកគាំ ចន្ធី កោតសរសើរដល់បណ្តាស្ថានីយទូរទស្សន៍មួយចំនួនដូចជា CTN និងទូរទស្សន៍បាយ័ន ដែលខិតខំផលិតកុនខ្មែរចាក់ផ្សាយតាមទូរទស្សន៍របស់ខ្លួន ហើយខ្សែភាពយន្តទាំងនោះក៏មានការទទួលគាំទ្រច្រើនពីអ្នកទស្សនាផងដែរ ។
ក្នុងនាមជាពិធីការិនី និងជាតារាសម្តែងម្នាក់ផងនោះ អ្នកនាងទូច ស៊ីណាត អះអាងថា ឆ្លងតាមបទពិសោធដែលនាងធ្លាប់សម្តែងនាពេលកន្លងមកនោះនាងយល់ថា គុណភាពខ្សែភាពយន្តខ្មែរនាពេលបច្ចុប្បន្ននេះ គឺអាចនិយាយបានថា វាសមស្របទៅតាមអ្វីដែលយើងមាន ហើយយើងមិនអាចនិយាយបានថា វាល្អប៉ុនណា ឬអាក្រក់ប៉ុនណាទេ គឺត្រឹមថាការផលិតនាពេលសព្វថ្ងៃយើងអាចទទួលយកបានសម្រាប់ប្រជាជនខ្មែរនាពេលបច្ចុប្បន្ន ។
ចំណែកអ្នកនាងផល្លី ជាបុគ្គលិក ធ្វើការនៅក្រុមហ៊ុនឯកជនមួយបានបញ្ចេញទស្សនៈថា នាងចូលចិត្តទស្សនាខ្សែភាពយន្តខ្មែរព្រោះពេលខ្លះវាក៏ធ្វើឱ្យជក់ចិត្តដិតអារម្មណ៍ផងដែរ។ ប៉ុន្តែនាងរិះគន់ថា ខ្សែភាពយន្តនាពេលសព្វថ្ងៃនេះច្រើនតែបង្ហាញពីសាច់រឿងដែលដាក់មនោសញ្ចេតនាហួសហេតុ និងមិនចោលពីការឈ្នានីសគ្នារឿងស្នេហា និងការដណ្តើមទ្រព្យសម្បត្តិឡើយ ។
ចំពោះកញ្ញា នីតា ជាសិស្សសាលាម្នាក់និយាយថា នាងមិនសូវជាចាប់អារម្មណ៍វីដេអូភាគខ្មែរដែលចាក់បញ្ចាំងតាមទូរទស្សន៍ប៉ុន្មានឡើយ ផ្ទុយទៅវិញនាងច្រើនចាប់អារម្មណ៍ខ្សែភាពយន្តដែលបានចាក់បញ្ចាំងនៅតាមរោង ជាពិសេសរឿងខ្មោចដោយនាងចូលចិត្តទស្សនាជាមួយមិត្តភក្តិ ៕
ចែករំលែកព័តមាននេះ