ខេត្តព្រះសីហនុ ៖ ផ្ទះប្រជាពលរដ្ឋដែលរស់នៅរកេតរកូតគ្មានរៀបរយចំនួន៣១ខ្នងនៅតំបន់ទំនប់រលក ស្ថិតក្នុងក្រុម២៦ ភូមិ៣ សង្កាត់លេខ១ ក្រុងព្រះសីហនុ ត្រូវបានអគ្គិភ័យលេបត្របាក់យ៉ាងសាហាវកាលពីថ្ងៃទី ២២ កញ្ញា វេលាម៉ោងប្រមាណជាង១១យប់ ដែលអ្នកខ្លះកំពុងដេកលង់លក់បង្កឱ្យមានការខូចខាតផ្ទះសម្បែង សម្ភារប្រើប្រាស់ និងថវិកាយ៉ាងច្រើន មិនត្រឹមតែប៉ុណ្ណោះមនុស្សចំនួន៧នាក់បានរងរបួស(ប្រុស២ ស្រី៥)ក្នុងនោះមានកុមារីអាយុ១១ខែម្នាក់ផងដែរ ដោយសាររលាកភ្លើងធ្ងន់ធ្ងរ ។
ចំពោះតួលេខពិតប្រាកដនៃការខូចខាតទ្រព្យសម្បត្តិ និងផ្ទះសម្បែងដ៏មហាវិនាសកម្មនេះ អាជ្ញាធរដែនដី ក៏ដូចសមត្ថកិច្ចនៅពុំទាន់អាចវាយតម្លៃ និងសន្និដ្ឋានបាននៅឡើយទេ ឯមូលហេតុដែលបង្កឱ្យមានអគ្គិភ័យនេះភ្លាមៗក៏គេនៅពុំទាន់បានដឹងនៅឡើយដែរ ។
យោងតាមប្រភពពីមន្ទីរសម្រាកព្យាបាល រស្មីកំពង់សោមឱ្យដឹងថា ជនរងគ្រោះដោយសារអគ្គិភ័យដែលបានចូលមកព្យាបាលនៅក្នុងមន្ទីរសម្រាកព្យាបាលនេះមានចំនួន៧នាក់ រួមមាន ១-ឈ្មោះ ជា វណ្ណា ភេទស្រី អាយុ៣២ឆ្នាំ របួសធ្ងន់ ២-ឈ្មោះ ជា មុន្នីរ័ត្ន ភេទស្រី អាយុ១៧ឆ្នាំ របួសធ្ងន់ ៣-ឈ្មោះ គឹម ធីតា ភេទស្រី អាយុ២៥ឆ្នាំ របួសធ្ងន់ ៤-ឈ្មោះ អាន ភារិទ្ធ ភេទប្រុស អាយុ២៧ឆ្នាំ មុខរបរនេសាទ របួសធ្ងន់ ៥-ឈ្មោះ គឹម ធារ៉ា ភេទប្រុស អាយុ២២ឆ្នាំ មុខរបរនេសាទ របួសស្រាល ៦-ឈ្មោះ រិទ្ធ ដាយ៉ាណា ភេទស្រី អាយុ១១ខែ របួសស្រាល និង៧-ឈ្មោះ ហ៊ួត សុខអេង ភេទស្រី អាយុ៤៧ឆ្នាំ របួសស្រាល ។ អ្នកទាំង៧នាក់ មានទីលំនៅក្នុងកន្លែងកើតហេតុ ស្ថិតក្នុងក្រុមទី២៦ ភូមិ៣ សង្កាត់លេខ១ ក្រុងព្រះសីហនុ ។ អ្នករងរបួសទាំងអស់នេះបណ្តាលមកពីភ្លើងឆាបឆេះរហ័សពេក ខ្លះរត់គេចមិនទាន់ព្រោះកំពុងគេងលង់លក់ ខ្លះជាប់ចូលយករបស់របរបន្តិចបន្តួច ពេលកំពុងឆេះ ។
តាមប្រភពព័ត៌មានចុងក្រោយបំផុតឱ្យដឹងថា តាមរយៈទៅទទួលយកអំណោយពីកាកបាទក្រហមខេត្ត អាជ្ញាធរស្វែងរកឃើញមានតែ៣៦គ្រួសារប៉ុណ្ណោះដែលរងគ្រោះ ពោលគឺផ្ទះឆេះមានតែ៣១ខ្នងទេ មិនមែនរាប់រយខ្នងដូចពាក្យលេខឮឡើយ ។ សូមបញ្ជាក់ថា នៅក្នុងប្រតិបត្តិការពន្លត់អគ្គិភ័យនេះបានប្រើពេលវេលារហូតដល់ម៉ោងជិត៥ភ្លឺ ទើបពន្លត់បានជាស្ថាពរ ដោយកម្លាំងជំនាញបានប្រើប្រាស់រថយន្តពន្លត់អគ្គិភ័យចំនួន៥គ្រឿង ក្នុងនោះមានរថយន្តពន្លត់អគ្គិភ័យរបស់ស្នងការដ្ឋាននគរបាលខេត្តុចំនួន២គ្រឿង របស់កំពង់ផែអន្តរជាតិចំនួន២គ្រឿង និងរបស់រោងចក្រប្រេងកាតចំនួន១គ្រឿង ។
ដោយឡែកទាក់ទិនទៅនឹងការឆាបឆេះនេះ ស្ត្រីរងគ្រោះហ៊ួត សុខអេង ដែលក្រុមគ្រួសាររបស់គាត់មានទាំងកូន និងកូនប្រសារងរបួសដោយរលាកដៃជើងបាននិយាយថា នៅយប់កើតហេតុគាត់នឹងក្រុមគ្រួសាររបស់គាត់លើកលែងតែប្តីដែលនៅបន្ទាយបានជួបគ្រោះអាក្រក់នេះទាំងអស់គ្នា ។ គាត់បន្តថា នៅយប់កើតហេតុ ខណៈពេលគាត់កំពុងលួងចៅឱ្យដេក ក៏មានអណ្តាតភ្លើងឆាបឆេះពីក្រោមផ្ទះរបស់គាត់លាយឡំជាមួយនឹងប្រេងសាំងហូរលើរនាបក្តាររបស់គាត់ ជាហេតុបណ្តាលឱ្យអណ្តាតភ្លើងឆាបឆេះយ៉ាងសន្ធោសន្ធៅ ។ បន្ទាប់មកគាត់ក៏ស្ទុះរត់ចេញមកក្រៅផ្ទះ តែអកុសលទ្វារផ្ទះត្រូវបានគេចងជាមួយចំណងខ្សែមងជាប់ ឃើញដូចនោះកូនប្រុសឈ្មោះគឹម ធារ៉ា និងកូនប្រសាឈ្មោះអាន ភារិទ្ធ បានស្ទុះមកធាក់ទ្វារឱ្យរបើក តែនៅតែមិនរបើក បានមួយសន្ទុះក្រុមគ្រួសាររបស់គាត់បាននាំគ្នាប្រឹងរុញទ្វារផ្នែកខាងក្រោមដោយជម្នះកំដៅភ្លើងរលាកពេញខ្លួន ទើបចេញរួច ហើយក៏បានមកព្យាបាលនៅមន្ទីរសម្រាកព្យាបាលរស្មីកំពង់សោម ។ ការអះអាងរបស់ស្ត្រីខាងលើនេះគាត់មិនដឹងថា បណ្តាលមកពីគេលួចដុត ឬក៏ជាការរាលដាលបែបណានោះទេ ។ ឯទ្រព្យសម្បត្តិរបស់គាត់សរុបប្រមាណ២ម៉ឺនដុល្លាររួមនិងផ្ទះមួយខ្នងត្រូវបានបាត់បង់ទាំងស្រុង បច្ចុប្បន្នសូម្បីតែលុយព្យាបាលរបួសក៏ពុំមានដែរ ៕
ចែករំលែកព័តមាននេះ