តុលាការតៃវ៉ាន់ថ្មីៗនេះទើបតែចេញសេចក្តីប្រកាសសម្រេចទទួលស្គាល់កំហុសខ្លួនដែលកាលពី១៦ឆ្នាំមុនកាត់ទោសខុសនាំដល់ប្រហារជីវិត ភ័ន្តច្រឡំលើយុវជនមួយរូបឈ្មោះ ចាន ជុងគ័រ ពីបទរំលោ.ភសេពសន្ថវៈ រួចសម្លា.ប់កុមារីម្នាក់ ។ ហេតុការណ៍នេះធ្វើឱ្យមានការភ្ញាក់ផ្អើលលាយឡំការស្តីបន្ទោសពីគ្រប់មជ្ឈដ្ឋានចំពោះបណ្តាស្ថាប័នច្បាប់តៃវ៉ាន់ ។
តុលាការតៃវ៉ាន់ថ្មីៗនេះទើបតែចេញសេចក្តីប្រកាសសម្រេចទទួលស្គាល់កំហុសខ្លួនដែលកាលពី១៦ឆ្នាំមុនកាត់ទោសខុសនាំដល់ប្រហារជីវិត ភ័ន្តច្រឡំលើយុវជនមួយរូបឈ្មោះ ចាន ជុងគ័រ ពីបទរំលោភសេពសន្ថវៈ រួចសម្លាប់កុមារីម្នាក់ ។ ហេតុការណ៍នេះធ្វើឱ្យមានការភ្ញាក់ផ្អើលលាយឡំការស្តីបន្ទោសពីគ្រប់មជ្ឈដ្ឋានចំពោះបណ្តាស្ថាប័នច្បាប់តៃវ៉ាន់ ។
រឿងហេតុផ្ទុះឡើងតាំងពីឆ្នាំ១៩៩៦ដែលនិស្សិតរៀនបើកយន្តហោះម្នាក់ក្នុងអង្គភាពទ័ពអាកាសតាំងនៅក្បែរតៃជុង កោះតៃវ៉ាន់ ត្រូវតុលាការកាត់ទោសពីបទរំលោភនិងសម្លាប់ ។ ជនរងគ្រោះគឺកុមារីអាយុទើបតែ៥ឆ្នាំ កូនរបស់ម្ចាស់តូបលក់គ្រឿងភេសជ្ជៈនៅក្នុងបរិវេណមូលដ្ឋានកងទ័ព ។ សពកុមារីនោះរកឃើញក្នុងរណ្តៅជីជីវឧស្ម័នក្បែរបង្គន់សាធារណៈ ចំណែកក្នុងកន្ក្រកសម្រាមក្បែរនោះ មានក្រដាសអនាម័យមួយបន្ទះ ប្រឡាក់ឈាមជនរងគ្រោះ និងទឹកកាមរបស់និស្សិតឈ្មោះចាន ជុងគ័រ ។ ស្ថិតចំពោះមុខភស្តុតាងនេះ ទោះចាន ជុងគ័រ ពន្យល់យ៉ាងណាក៏អត់បានការ នាយត្រូវគេចាប់ខ្លួននិងកាត់ទោសប្រហារជីវិត លុះជិតមួយឆ្នាំក្រោយក៏នាំទៅទីលានប្រហារជីវិត ។
តាំងពីថ្ងៃចេន ជុងគ័រ ត្រូវចាប់ខ្លួន ឪពុកម្តាយរបស់និស្សិតរូបនេះ គឺលោកចាន ចាងអាន និងអ្នកស្រីវ៉ាន់ តាយឡែន តវ៉ាយ៉ាងប្តូរផ្តាច់ថាកូនប្រុសខ្លួនត្រូវគេធ្វើទារុណកម្មបង្ខំឱ្យសារភាព។ លោកចាន ចាងអាន បង្ហាញសំបុត្ររបស់កូនប្រុសដល់កាសែតTaipei Times ជាភស្តុតាងនៃការអះអាងរបស់ខ្លួន ។ សំបុត្រនេះកូនប្រុសគាត់លួចផ្ញើឱ្យគាត់ជាសម្ងាត់តាមរយៈមិត្តជិតស្និទ្ធ ពេលគាត់ទៅសួរសុខទុក្ខកូនប្រុសនៅកន្លែងឃុំឃាំង ។
ពេញរយៈពេល១៣ឆ្នាំ បន្ទាប់ពីចាន ជុងគ័រ ត្រូវប្រហារជីវិត ប្តី-ប្រពន្ធលោក ចាង នៅតែពុះពារធ្វើការតវ៉ាដើម្បីរកយុត្តិធម៌ឱ្យវិញ្ញាណក្ខន្ធកូនប្រុស ។ ពួកគាត់ដាក់ពាក្យទៅគ្រប់ស្ថាប័នទាំងអស់ តែមិនដែលបានស្ថាប័នណាអើពើជួយពួកគាត់ឡើយ ។ រហូតដល់ខែមិថុនា ២០១០ ទើបអ្វីៗធូរស្រាលវិញ ។ អង្គការឈ្មោះControl Yuan ដែលជាអង្គការឃ្លាំមើលការងារស្ថាប័នរដ្ឋ ព្រមទទួលស្រាវជ្រាវរឿងនេះឡើងវិញ ឱ្យម៉ត់ចត់បំផុត ។ លទ្ធផលសើុបអង្កេតដោយផ្អែកលើគំរូDNA ដែលផ្ញើទៅវិភាគនៅបរទេសបង្ហាញច្បាស់ឧក្រិដ្ឋជនពិតប្រាកដគឺឈ្មោះជូស៊ុន ស៊ូ មិនមែនឈ្មោះចាន ជុងគ័រ ដែលត្រូវប្រហារជីវិតយ៉ាងអយុត្តិធម៌ទេ ។
ជូស៊ុន ស៊ូ ជានាយទាហានរងមួយរូបក្នុងកងការពារមូលដ្ឋានទ័ព ។ ជននេះប្រើក្រដាសអនាម័យក្នុងកន្ក្រកសម្រាមដែលមានប្រឡាក់ទឹកកាមចាន ជុងគ័រ យកទៅជូនសម្អាតឈាមនៅកន្លែងប្រព្រឹត្តបទល្មើសរបស់ខ្លួន ។
មូលហេតុដែលក្រដាសនោះមានប្រឡាក់ទឹកកាមរបស់ចាន ជុងគ័រ ព្រោះមុនហ្នឹងបន្តិច ចាន ជុងគ័រ បំបាត់ចំណង់ខ្លួនឯងតាមរបៀបប្រើដៃរហូតដល់ចេញទឹកកាម លុះជូតរួចក៏យកក្រដាសនោះទៅចោលក្នុងកន្ក្រកសំរាម ។ ជូស៊ុន ស៊ូ ស្រវាចំក្រដាសដដែលនោះ ប្រើជូតសម្អាតកន្លែងប្រព្រឹត្តបទល្មើសរបស់ខ្លួន ភស្តុតាងគឺស្នាមខ្ចៅដៃក្រវាមពេញទាំងអស់ ។ ភស្តុតាងនៅលើគោកសោះ មិនគួរបើគេអត់ចាប់អារម្មណ៍ ប្រឹងតែកំណត់លើទឹកកាមមួយមុខ ទោះបីចាន ជុងគ័រ ប្រាប់ថាទឹកកាមពីការបំបាត់ចំណង់ដោយដៃខ្លួនឯង ក៏អត់រវល់ពិនិត្យឡើងវិញ នាំដល់ប្រព្រឹត្តកំហុស ធ្ងន់ប្រហារជីវិតអ្នកគ្មានទោសពៃរ៍ទាល់តែបាន ។
ក្រុមស្រាវជ្រាវរបស់អង្គការ Control Yuan នៅបានរកឃើញទៀតថា ពេលចាន ជុងគ័រ ត្រូវចាប់ខ្លួននោះ បុគ្គលិកសន្តិសុខកងទ័ព ១៤នាក់ ព្រួតគ្នាធ្វើទារុណកម្មសួរចម្លើយពេញរយៈពេល៣៧ម៉ោង តាមវិធីសាហាវឃោរឃៅដូចយ៉ាងបញ្ចាំងពន្លឺភ្លើងខ្លាំងចូលមុខ ឆក់ខ្សែភ្លើង ជ្រមុជទឹកជាដើម ដើម្បីបង្ខំឱ្យត្រូវតែសារភាពទទួលទោសដែលខ្លួនអត់ប្រព្រឹត្ត ។ Control Yuan ស្នើឱ្យមានការដាក់ទោសបុគ្គលិកសន្តិសុខកងទ័ពទាំង១៤នាក់នោះឱ្យបានធ្ងន់សក្តិសមនឹងការប្រព្រឹត្តរបស់ខ្លួន ។
ក្រោយControl Yuan រកឃើញការពិត ជូស៊ុន ស៊ូ ត្រូវចាប់ខ្លួនកាលពីដើមឆ្នាំ២០១២នេះ ហើយ២ខែ ក៏ត្រូវតុលាការកាត់ទោសដាក់ពន្ធនាគារចំនួន២០ឆ្នាំ ។ ជននេះអត់បានវាយដំអ្វីទាំងអស់ វាឆ្លើយទទួលទោសតាមសម្រួលសារភាពថាខ្លួនពិតជាបានរំលោភសម្លាប់កុមារីកម្សត់នោះមែន ។
ក្រោយបានទទួលបទល្មើសសម្រេចសារភាពកំហុសឆ្គងរបស់តុលាការ អ្នកស្រីវ៉ាន់ តាយឡែន ត្រេកអរនិយាយប្រាប់អ្នកកាសែត«បានប៉ុណ្ណឹងខ្ញុំអស់ចិត្តហើយ ។ ខ្ញុំនឹងយកលិខិតរបស់តុលាការទៅអានចំពោះមុខផ្នូរប្តីនិងកូនប្រុសខ្ញុំ ដើម្បីឱ្យព្រលឹងពួកគេបានស្ងប់ចិត្ត ។ស្តាយណាស់ដែលប្តីខ្ញុំស្លាប់កាលពីឆ្នាំទៅ មិនបាននៅរស់មើលឃើញការពិតដែលគាត់ប្រឹងស្វែងរកជាង១០ឆ្នាំជាមួយខ្ញុំ »។
តៃវ៉ាន់ ជាដែនដីមួយក្នុងចំណោមដែនដីមានទោសប្រហារជីវិតច្រើន ។ កាលពីទសវត្ស៨០និង៩០ក្នុងសតវត្សមុន មានអ្នកទោសតៃវ៉ាន់៥០៥នាក់ត្រូវប្រហារជីវិត លុះចូលដល់ទសវត្សដំបូងនៃសតវត្សទី២១នេះ ថយមកនៅត្រឹម៣៦នាក់ ដោយហេតុមានភាពមិនចុះសម្រុងគ្នាខ្លាំង ជុំវិញការកំណត់ទម្ងន់ទោសដែលត្រូវប្រហារជីវិត ។ ឆ្នាំ២០០៥តៃវ៉ាន់ ផ្អាកទោសប្រហារជីវិត៤ឆ្នាំ ។ រយៈពេល៤ឆ្នាំនោះទោសប្រហារជីវិតបន្ធូរបន្ថយមកត្រឹមទោសដាក់ពន្ធនាគារមួយជីវិតវិញ ។ ប៉ុន្តែក្រោយផុតរយៈពេល៤ឆ្នាំ លោកជំទាវវ៉ាង ឈីងហ្វេង រដ្ឋមន្ត្រីក្រសួងយុត្តិធម៌តៃវ៉ាន់ បំផុសបំផុលឱ្យមានចលនាទាមទារផ្អាកទោសប្រហារជីវិតតទៅទៀតដោយគ្មានកាលកំណត់។
គាត់ត្រូវគេដកតំណែងព្រោះតែមិនព្រមចុះហត្ថលេខាឱ្យប្រហារជីវិតអ្នកទោស៤៤នាក់ ។ ក្រោយពេលគាត់ដើរចេញពីក្រសួងយុត្តិធម៌ អ្នកថ្មីគឺលោកសេង យុងហ៊្វូ ប្រកាសបន្តឱ្យមានទោសប្រហារជីវិតឡើងវិញដដែល ។ គេដឹងថាក្នុងឆ្នាំ២០១២នេះអ្នកទោសនៅតៃវ៉ាន់ ដែលប្រហារជីវិតមានចំនួន៤៥នាក់ ៕
ចែករំលែកព័តមាននេះ