ខេត្តបន្ទាយមានជ័យ ៖ នៅរសៀលថ្ងៃទី១៩ កញ្ញា លោកអីុ ឡុង អភិបាលស្រុកមង្គលបុរី និងលោកវរសេនីយ៍ត្រី យ៉ត សុផល អធិការនគរបាលស្រុក បានដឹកនាំកងកម្លាំងនគរបាលស្រុកមង្គលបុរី សហការជាមួយអាជ្ញាធរភូមិ-ឃុំ និងប្រជាពលរដ្ឋជាច្រើននាក់ធ្វើការកាប់ឆ្ការព្រៃ សម្អាតស្មៅដែលដុះតាមមាត់ប្រឡាយទឹកដើម្បីស្តារប្រឡាយ ព្រមទាំងប្រមូលសំរាមមុខលូទឹកដើម្បីកុំឱ្យស្ទះប្រព័ន្ធទឹកហូរតាមបណ្តោយផ្លូវជាតិលេខ៥ ស្ថិតក្នុងភូមិចំការតាដោក ឃុំឫស្សីក្រោក ស្រុកមង្គលបុរី ។
លោកអីុ ឡុង បានឱ្យដឹងថា នៅក្នុងអំឡុងធ្លាក់ភ្លៀងជាប់ៗគ្នារយៈពេល៤-៥ថ្ងៃនេះ ចាប់ពីថ្ងៃទី១៥ កញ្ញា មកជំនន់ទឹកភ្លៀង និងទឹកហូរមកពីប្រទេសថៃបានហូរបុកបណ្តាលឱ្យជន់លិចលំនៅឋានរបស់ប្រជាពលរដ្ឋនៅក្នុងស្រុកមួយចំនួនក្នុងខេត្តបន្ទាយមានជ័យនេះ ។ ថ្វីដ្បិតតែនៅក្នុងស្រុកមង្គលបុរីមិនទាន់មានលំនៅឋានរបស់ប្រជាពលរដ្ឋរងផលប៉ះពាល់ដោយសារទឹកជំនន់ធ្ងន់ធ្ងរក៏ពិតមែន តែអាជ្ញាធរស្រុកបានត្រៀមទាំងកម្លាំង មធ្យោបាយ សម្ភារ ដើម្បីអន្តរាគមន៍ជួយប្រជាពលរដ្ឋទៅរកទីទួលសុវត្ថិភាពហើយដែរ ។
លោកអភិបាលបានបញ្ជាក់ថា ថ្ងៃនេះដើម្បីកុំឱ្យមានការរាំងស្ទះប្រព័ន្ធទឹកហូរ លោកបានដឹកនាំកម្លាំងនគរបាលស្រុកចំនួន៥០នាក់ សហការជាមួយអាជ្ញាធរឃុំ និងមានប្រជាពលរដ្ឋចូលរួមផងនោះ បានធ្វើការកាប់ឆ្ការព្រៃ សម្អាតស្មៅដែលដុះនៅតាមមាត់ប្រឡាយ ស្តារ និងប្រមូលសំរាមដែលរាំងស្ទះមុខលូដើម្បីបញ្ចៀសការកកស្ទះមុខទឹកហូរ និងបញ្ចៀសការលិចលង់លំនៅឋានរបស់ប្រជាពលរដ្ឋ ព្រមទាំងហេដ្ឋារចនាសម្ព័ន្ធមានផ្លូវលំ និងផ្លូវជាតិជាដើម ៕
ចែករំលែកព័តមាននេះ