រាជធានីភ្នំពេញ ៖ និស្សិតពីរនាក់បងប្អូនបានរងរបួសរលាត់ដៃ ជើង និងមុខ ដោយសារចោរឆក់កាបូបហើយដួលម៉ូតូកាលពីវេលាម៉ោង៧និង៤៥នាទីយប់ថ្ងៃទី២០ កញ្ញា នៅតាមផ្លូវលេខ៥៩៨ មុខក្លិបអេឡិចត្រូ ក្នុងសង្កាត់បឹងកក់ទី២ ខណ្ឌទួលគោក និងត្រូវបានបញ្ជូនទៅព្យាបាលនៅមន្ទីរពេទ្យព្រះកុសុមៈ ។ ជនរងគ្រោះទាំង២នាក់នេះ ម្នាក់ឈ្មោះ លឹម ដារ៉ូ ភេទស្រី អាយុ១៩ឆ្នាំ ជានិស្សិតឆ្នាំទី២នៃសាកលវិទ្យាល័យអាយយូ រងរបួសរលាត់ដៃ ជើង និងម្នាក់ទៀតឈ្មោះ ណូ ស្រីលក្ខណ៍ ភេទស្រី អាយុ២៤ឆ្នាំ ជានិស្សិតពេទ្យឆ្នាំទី៤ បានរបួសជើងនិងរលាត់មុខធ្ងន់ធ្ងរ ។ អ្នកទាំងពីរនាក់ជាបងប្អូនជីដូនមួយនឹងគ្នា មានទីលំនៅភូមិភ្នំពេញថ្មី សង្កាត់ភ្នំពេញថ្មី ខណ្ឌសែនសុខ ។
តាមប្រភពព័ត៌មានឱ្យដឹងថា ក្រុមចោរមានបក្ខពួកចំនួនពីរនាក់ជិះម៉ូតូម៉ាកស្គូពីពណ៌ផ្ទៃមេឃលាយស ធ្វើសកម្មភាពឆក់កាបូបពីពួកនាងបានសម្រេច និងបណ្ដាលឱ្យដួលម៉ូតូរបួសទាំងពីរនាក់ ។ តាមនាងលឹម ដារ៉ូ ជាម្ចាស់កាបូបឱ្យដឹងថា នៅមុនពេលកើតហេតុនាងបានជិះម៉ូតូម៉ាកស្គូពីពណ៌ផ្កាឈូក ឌុបបងស្រីជីដូនមួយធ្វើដំណើរតាមផ្លូវលេខ៥៩៨ពីត្បូងទៅជើងក្នុងគោលបំណងទៅផ្ទះ ដោយឱ្យបងស្រីកាន់កាបូប ។នៅពេលមកដល់មុខក្លិបអេឡិចត្រូ ក្នុងសង្កាត់បឹងកក់ទី២ ខណ្ឌទួលគោក ស្រាប់តែមានជន២នាក់ជិះម៉ូតូម៉ាកស្គូពីពណ៌ផ្ទៃមេឃលាយសធ្វើដំណើរស្របទិសគ្នា បានធ្វើសកម្មភាពឆក់កាបូបពីបងស្រីបានសម្រេចហើយគេចខ្លួនបាត់ ។ នៅក្នុងសកម្មភាពនោះបណ្ដាលឱ្យម៉ូតូរបស់នាងដួល និងរបួសទាំងពីរនាក់បងប្អូន ។
នាងលឹម ដារ៉ូ ប្រាប់ថា នៅក្នុងកាបូបនោះមានប្រាក់ជាង១០ម៉ឺនរៀល ទូរស័ព្ទចំនួនពីរគ្រឿងគឺម៉ាកសូនីអ៊ិច៨មួយគ្រឿង និងម៉ាកណូគាមួយគ្រឿង ។គួរបញ្ជាក់ថា នៅក្នុងរាជធានីភ្នំពេញនៅក្នុងសប្ដាហ៍នេះសកម្មភាពឆក់ និងប្លន់បានកើតឡើងគួរឱ្យកត់សម្គាល់ ដែលក្រុមចោរឆក់កាបូប ខ្សែកហាក់ដូចជាណាត់គ្នាធ្វើសកម្មភាពព្រមគ្នាតែម្ដង៕
ចែករំលែកព័តមាននេះ