រាជធានីភ្នំពេញ ៖ នៅក្រសួងប្រៃសណីយ៍ និងទូរគមនាគមន៍ កាលពីថ្ងៃទី២០ កញ្ញា មានរៀបចំពិធីប្រកាសដាក់ឱ្យដំណើរការបញ្ញត្តិករទូរគមនាគមន៍កម្ពុជាក្រោមអធិបតីភាពលោកសូរ ឃុន រដ្ឋមន្ត្រីក្រសួងប្រៃសណីយ៍ និងទូរគមនាគមន៍កម្ពុជា ។ថ្លែងសុន្ទរកថានៅក្នុងពិធីនោះ លោករដ្ឋមន្ត្រី សូរ ឃុន បានឱ្យដឹងថា ពិធីប្រកាសដាក់ឱ្យដំណើរការបញ្ញត្តិករទូរគមនាគមន៍កម្ពុជា នាព្រឹកនេះ គឺជាសមិទ្ធផលថ្មីមួយទៀតដែលក្រសួងប្រៃសណីយ៍ និងទូរគមនាគមន៍បានធ្វើកំណែទម្រង់ការគ្រប់គ្រងវិស័យទូរគមនាគមន៍បច្ចុប្បន្ន ស្របតាមកម្មវិធីគោលនយោបាយយុទ្ធសាស្ត្រចតុកោណរបស់រាជរដ្ឋាភិបាលលើវិស័យទូរគមនាគមន៍ និងការអនុវត្តការគ្រប់គ្រងជាសាកលនៃវិស័យនេះផងដែរ ។
ការរៀបចំបង្កើតបញ្ញត្តិករទូរគមនាគមន៍កម្ពុជានាពេលនេះ គឺជាការកែទម្រង់លើកទី៣របស់ក្រសួងប្រៃសណីយ៍ និងទូរគមនាគមន៍ បន្ទាប់ពីការបង្កើតសហគ្រាសសាធារណៈចំនួន២កន្លងមក គឺលើកទី១ សហគ្រាសសាធារណៈទូរគមនាគមន៍កម្ពុជាកាលពីឆ្នាំ២០០៥ និងលើកទី២ សហគ្រាសសាធារណៈប្រៃសណីយ៍កម្ពុជា កាលពីឆ្នាំ២០១០ ។
លោករដ្ឋមន្ត្រី សូរ ឃុន បញ្ជាក់ថា ចាប់ពីពេលនេះតទៅ យោងតាមព្រះរាជក្រឹត្យលេខ នស/រកត/០៣១២/១៧៥ ចុះថ្ងៃទី១ មីនា ឆ្នាំ២០១២ ស្តីពីការបង្កើតបញ្ញត្តិករទូរគមនាគមន៍កម្ពុជា ការងារត្រួតពិនិត្យ និងគ្រប់គ្រងខាងផ្លូវបច្ចេកទេសលើវិស័យទូរគមនាគមន៍ និងរដ្ឋបាលដែលក្រសួងប្រៃសណីយ៍ និងទូរគមនាគមន៍បានគ្រប់គ្រងកន្លងមក ត្រូវផ្ទេរទៅឱ្យបញ្ញត្តិករទូរគមនាគមន៍កមុ្ពុជាដឹកនាំ និងគ្រប់គ្រងបន្ត ។ ដូច្នេះសូមអស់លោក លោកស្រីទាំងអស់ត្រូវផ្លាស់ប្តូរឥរិយាបថពីអ្នកធ្វើគោលនយោបាយទៅជាបញ្ញត្តិករ ហើយទិសដៅភារកិច្ចសំខាន់ៗគឺការរៀបចំបទប្បញ្ញត្តិនានាដូចមានចែងក្នុងព្រះរាជក្រឹត្យ និងអនុក្រឹត្យរួចហើយ ។
ម្យ៉ាងទៀតដើម្បីសម្រេចបានតាមគោលដៅភារកិច្ចចំពោះមុខសំខាន់ជាដំបូងថ្នាក់ដឹកនាំបញ្ញត្តិករទូរគមនាគមន៍កម្ពុជាត្រូវអនុម័តលើលក្ខន្តិកៈបទបញ្ជាផ្ទៃក្នុង និងគម្រោងថវិកាជាបន្ទាន់ បន្ទាប់ពីពិធីប្រកាសដាក់ឱ្យដំណើរការបញ្ញត្តិករទូរគមនាគមន៍កម្ពុជានាព្រឹកនេះ ៕
ចែករំលែកព័តមាននេះ