រាជធានីភ្នំពេញ ៖ មន្ត្រីស្ថានទូតអាមេរិកប្រចាំនៅកម្ពុជា បានថ្លែងកាលពីថ្ងៃទី១៩ កញ្ញា ថា សហរដ្ឋអាមេរិកកាលពីពេលថ្មីៗនេះបានជួបពិភាក្សាជាមួយមន្ត្រីក្រសួងមហាផ្ទៃលើកិច្ចសហការការពារសន្តិសុខ សុវត្ថិភាពស្ថានទូតអាមេរិកប្រចាំក្នុងទីក្រុងភ្នំពេញ ។ ការថ្លែងរបស់មន្ត្រីស្ថានទូតអាមេរិកនេះបានធ្វើឡើងនៅក្នុងជំនួបដាច់ដោយឡែកមួយជាមួយអ្នកសារព័ត៌មានកម្ពុជាមួយក្រុមនៅសណ្ឋាគារភ្នំពេញ ខណៈហូបអាហារពេលថ្ងៃត្រង់ជុំគ្នាមួយ ។
លោក ចន សៀន ម៉ាក អីុនតូស (John Sean Mc Intosh) មន្ត្រីអ្នកនាំពាក្យស្ថានទូតសហរដ្ឋអាមេរិកប្រចាំកម្ពុជា បានបញ្ជាក់ថា លោកអូបាម៉ា ដាក់បទបញ្ជាថា នៅគ្រប់ស្ថានទូតអាមេរិក ត្រូវបង្កើនការយាមកាម ដើម្បីពង្រឹងកិច្ចការពារសន្តិសុខ ។ ដូចគ្នាផងដែរ ស្ថានទូតអាមេរិកប្រចាំនៅព្រះរាជាណាចក្រកម្ពុជាកាលពីពេលថ្មីៗនេះក៏បានទាក់ទងជាមួយនឹងប៉ូលិសកម្ពុជារួចអស់ហើយ ដើម្បីបង្កើនកិច្ចសហការ ក្នុងកិច្ចការពារសន្តិសុខនៅស្ថានទូត ក៏ដូចជាការពារសុវត្ថិភាពសម្រាប់បុគ្គលិកស្ថានទូត ។
ស្ថានទូតអាមេរិកប្រចាំនៅព្រះរាជាណាចក្រកម្ពុជា មានទីតាំងស្ថិតនៅក្នុងខណ្ឌដូនពេញជិតវត្តភ្នំ ក្នុងរាជធានីភ្នំពេញ បានស្វែងរកកិច្ចសហ ការជាមួយនឹងក្រសួងមហាផ្ទៃកម្ពុជា ដើម្បីបង្កើនកិច្ចកាពារសន្តិសុខសុវត្ថិភាព ។ នេះជាបទបញ្ជាថ្មីរបស់លោកប្រធានាធិបតី អូបាម៉ា ក្រោយពេលមានកុបកម្មប្រឆាំងតវ៉ារហូតដល់វាយកម្ទេចស្ថានទូត និងសម្លាប់ឯកអគ្គរដ្ឋទូត ប្រចាំប្រទេសលីប៊ី កាលពីសប្តាហ៍មុន ដោយសារតែកំហឹងរបស់ជនជាតិអ៊ិស្លាម ។
មន្ត្រីស្ថានទូតបន្តថា ការបង្កើនកិច្ចការពារស្ថានទូតអាមេរិក ធ្វើឡើងពេលដែលមានកុប កម្មប្រឆាំងសហរដ្ឋអាមេរិក បង្កឡើងដោយក្រុមជនជាតិអ៊ិស្លាមបានផ្ទុះឡើងកាលពីសប្តាហ៍មុននៅក្នុងប្រទេសលីប៊ី រហូតដល់មានការដុតកម្ទេច ស្ថានទូត ហើយសម្លាប់ឯកអគ្គរដ្ឋទូតអាមេរិកថែមទៀត ។ ព្រឹត្តិការណ៍នេះកើតឡើងដោយសារតែផលិតករខ្សែភាពយន្តអាមេរិកបានតាក់តែងរឿងភាពយន្តដែលមានការប្រមាថលើថ្នាក់ដឹកនាំសាសនាអ៊ិស្លាម ។
លោក ចន សៀន ម៉ាក អ៊ីនតូស បន្តថា ស្ថានទូតអាមេរិកកំពុងធ្វើការជាមួយរដ្ឋាភិបាលកម្ពុជាក៏ដូចជាអាជ្ញាធរគ្រប់លំដាប់ថ្នាក់ ក្នុងកិច្ចសហការគ្នាដើម្បីរក្សាសុវត្ថិភាពសន្តិសុខដល់មន្ត្រីស្ថានទូត និងបុគ្គលិកទាំងអស់របស់ស្ថានទូត។ បុគ្គលិកស្ថានទូតទាំងអស់មានចំនួនប្រមាណ២០០នាក់ ដែលកំពុងបម្រើការងារនៅក្នុងស្ថានទូត ។ នៅ គ្រប់ស្ថានទូតអាមេរិកទាំងអស់សុទ្ធតែមានការពង្រឹងសន្តិសុខ ដោយឡែកនៅកម្ពុជាមានកិច្ចសហការគ្នារវាងរដ្ឋាភិបាល និងស្ថានទូតរួចហើយ ។
លោក ចន សៀន ម៉ាក អ៊ីនតូស បានបន្ថែមថា រដ្ឋាភិបាលកម្ពុជាបានសន្យារួចហើយក្នុងការការពារសុវត្ថិភាពស្ថានទូតនៅពេលដែលមានអ្វីមួយកើតឡើង អាជ្ញាធរនឹងចាត់វិធានការជាបន្ទាន់ភ្លាម ។ ស្ថានទូត និងក្រសួងមហាផ្ទៃគិត រួចហើយចំពោះបញ្ហាសន្តិសុខសម្រាប់ស្ថានទូតអាមេរិកប្រចាំនៅកម្ពុជា ។ ទោះបីជាយ៉ាងណាលោក ចន សៀន ម៉ាក អ៊ីនតូស មិនបានបញ្ជាក់ទេថា មានពលរដ្ឋអាមេរិកប៉ុន្មាននាក់ដែលកំពុងរស់នៅក្នុងប្រទេសកម្ពុជា ដោយសារស្ថានទូតមិនបានចាប់អារម្មណ៍ពីចំនួនដែលអ្នកចុះឈ្មោះនៅស្ថានទូតទេ ។
នៅពេលសួរថា តើកិច្ចសហប្រតិបត្តិការរបៀបណា ក្រសួងមហាផ្ទៃគ្រោងនឹងបញ្ជូនប៉ូលិសការពារស្ថានទូតឬយ៉ាងណានោះ? លោក ចន សៀន ម៉ាក អ៊ីនតូស ថ្លែងថា «អាជ្ញាធរមូលដ្ឋានគ្រប់លំដាប់ថ្នាក់របស់រដ្ឋាភិបាលនឹងធ្វើការងារនេះដោយសហការជាមួយស្ថានទូត ប្រសិនបើមានបញ្ហាអ្វីមួយកើតឡើង» ។ លោកចន សៀន ម៉ាក អ៊ីនតូស បន្តថា បញ្ហាសន្តិសុខស្ថានទូតវាមិនមានជារឿងសាមញ្ញនោះទេឬក៏ស្ថានទូតគិតលេងៗនោះទេ ។ ស្ថានទូតបានគិតដល់បុគ្គលិកស្ថានទូតផងដែរ ហើយកន្លងមកស្ថានទូតនៅមិនទាន់មានការគំរាមកំហែងពីខាងណាមួយនៅឡើយទេ តែយើងបានសហការល្អជាមួយគ្រប់មជ្ឍដ្ឋាន ហើយយើងមានអារម្មណ៍ថាមានសុវត្ថិភាពនៅទីនេះ ។ នៅក្នុងតំបន់អាស៊ីអាគ្នេយ៍មានការប្រឈមខ្លះដូចជានៅប្រទេសថៃជាដើម ដូច្នេះ«បញ្ហាសុវត្ថិភាពវាជាកត្តាចម្បងដែលយើងត្រូវតែគិត» ។
គួររំលឹកថា កាលពីពេលថ្មីៗនេះមានព្រឹត្តិការណ៍តវ៉ាដោយហិង្សាដែលបង្កដោយជនជាតិអ៊ិស្លាមបានរាលដាលដល់ប្រទេសអ៊ិស្លាមមួយចំនួន និងមកដល់តំបន់អាស៊ី ។ កាលពីថ្ងៃអង្គារទី១៨ កញ្ញា ២០១២ ក្រុមបាតុករអ៊ិស្លាម នៅ ប្រទេសថៃបានតវ៉ានៅមុខស្ថានទូតអាមេរិក ប្រចាំទីក្រុងបាងកក ។ រីឯនៅប្រទេសឥណ្ឌូណេស៊ី ដែលជាប្រទេសមានជនជាតិអ៊ិស្លាមច្រើនជាងគេលើពិភពលោក ក៏បានផ្ទុះការតវ៉ា នៅមុខស្ថានទូតអាមេរិកក្នុងទីក្រុងហ្សាការតាដែរ កាលពីថ្ងៃទី១៧ កញ្ញា ២០១២ ៕
ចែករំលែកព័តមាននេះ