រាជធានីភ្នំពេញ ៖ ម៉ូតូហុងដាឌ្រីមសេ១២៥ស៊េរី២០១២ មួយគ្រឿងត្រូវចោរ២នាក់បាញ់ប្រហារម្ចាស់បណ្តាលឱ្យរងរបួសធ្ងន់ ហើយប្លន់យកទៅបាត់កាលពីវេលាម៉ោង២និង៤០នាទីរសៀលថ្ងៃទី២០ កញ្ញា ឆ្នាំ២០១២ នៅមុខស្ថានីយប្រេងឥន្ធនៈសូគីម៉ិច លើបណ្តោយផ្លូវភ្នំពេញ-ហាណូយក្នុងភូមិអន្លង់ក្ងាន សង្កាត់ឃ្មួញ ខណ្ឌសែនសុខ ខណៈម្ចាស់ម៉ូតូមកពីជញ្ជាត់ត្រីនៅបឹងកប់ស្រូវ ។ ជនរងគ្រោះបានស្លាប់ក្រោយពេលបញ្ជូនទៅសង្គ្រោះនៅមន្ទីរពេទ្យឯកជនមួយ។
ប្រភពព័ត៌មាននៅកន្លែងកើតហេតុឱ្យដឹងថា ជនរងគ្រោះឈ្មោះព្រំ ស៊ីនដា អាយុ២៨ឆ្នាំ មានទីលំនៅក្នុងភូមិសែនសុខ ៣ សង្កាត់ឃ្មួញ ខណ្ឌសែនសុខ ជិះម៉ូតូហុងដាឌ្រីមសេ១២៥ ស៊េរី២០១២ ជាមួយក្មួយប្រុស២នាក់អាយុប្រមាណ១០ឆ្នាំ ត្រឡប់មកពីជញ្ជាត់ត្រីក្រឹមនៅបឹងកប់ស្រូវ។ នៅពេលជនរងគ្រោះជិះម៉ូតូតាមបណ្តោយផ្លូវភ្នំពេញ-ហាណូយ ពីត្បូងទៅជើង ស្រាប់តែត្រូវយុវជន២នាក់ស្លៀកពាក់ស៊ីវិលជិះម៉ូតូស្របគ្នា ស្ទាក់ឱ្យឈប់ ។ ពេលជនរងគ្រោះឈប់ ជនល្មើសដកកាំភ្លើងខ្លីភ្ជង់គំរាមឱ្យប្រគល់ម៉ូតូដល់ពួកគេ ។ ដោយជនរងគ្រោះមិនព្រមប្រគល់ម៉ូតូ ក៏ត្រូវជនល្មើសបាញ់មួយគ្រាប់ត្រង់ចង្កេះស្តាំ ធ្លាយទៅពោះដេកដួលនៅក្នុងថ្លុកឈាម។ ខណៈនោះក្មួយប្រុស២នាក់ភ័យស្លន់ស្លោរត់ចេញពីកន្លែងកើតហេតុ ។
ប្រភពដដែលបន្តថា ក្រុមចោរប្លន់បានយកម៉ូតូជនរងគ្រោះជិះគេចតាមបណ្តោយផ្លូវភ្នំពេញ-ហាណូយឆ្ពោះទៅទិសខាងជើងបាត់ ។ ចំណែកជនរងគ្រោះភ្លាមនោះត្រូវគេបញ្ជូនតាមរថយន្តសាមុយទៅសង្គ្រោះនៅមន្ទីរពេទ្យសែនសុខ តែមិនបានកន្លះម៉ោងផង ដោយសាររបួសធ្ងន់ពេកក៏ស្លាប់បាត់បង់ជីវិតទៅ ៕
ចែករំលែកព័តមាននេះ