ខេត្តប៉ៃលិន ៖ ប្រជាពលរដ្ឋដែលធ្វើដំណើរមកទិញម្ហូបអាហារនៅផ្សារសាមគ្គីហៅផ្សារប៉ាហ៊ី បានត្អូញត្អែរពីមាត់មួយទៅមាត់មួយថា នៅក្នុងនិងក្រៅផ្សារសាមគ្គីឱ្យតែដល់រដូវធ្លាក់ភ្លៀង នៅជុំវិញផ្សារមានតែភក់និងទឹកស្អុយហូរចេញពីលូបង្គន់ចូលទៅក្នុងផ្សារ ។ ជាពិសេសនៅភាគខាងលិចផ្សារ ទឹកស្អុយនេះដែលហូរចេញពីលូបង្គន់មកលិចពាសពេញផ្លូវ ដោយសារតែគ្មានប្រព័ន្ធលូបង្ហូរចេញច្បាស់លាស់ ទើបធ្វើឱ្យទឹកស្អុយហូរចេញមកក្រៅមានក្លិនយ៉ាងអសោចិ៍ ។
ស្ត្រីម្នាក់ដែលជាអាជីវករលក់ដូរនៅក្បែរជ្រុងផ្សារនិយាយថា នៅរដូវភ្លៀងរាល់ថ្ងៃនេះពួកគាត់មានការលំបាកខ្លាំងណាស់ក្នុងការលក់ដូរនំចំណីសម្រាប់ហូបចុក ព្រោះពេលឈរលក់ដូរត្រូវទ្រាំនឹងក្លិនស្អុយហូរចេញពីលូបង្គន់មកដោយសារតែស្ទះលូក្បែរកន្លែងលក់ដូរ ហើយទឹកនេះហូរចូលទៅក្នុងផ្សារធ្វើឱ្យមានក្លិនស្អុយស្ទើរតែពេញផ្សារ ណាមួយពេលអតិថិជនគេចូលមករកទិញនំចំណីឃើញកន្លែងគាត់អង្គុយលក់គគ្រិចបែបនេះ គេក៏ដើរចេញទៅរកទិញនៅកន្លែងផ្សេងបាត់ ។
ម្យ៉ាងទៀតពេលរូបគាត់អង្គុយលក់នំ និងបន្លែបង្ការ ត្រូវទ្រាំហិតក្លិនស្អុយរបស់ទឹកលូបង្គន់នេះជារៀងរាល់ថ្ងៃ ធ្វើឱ្យប៉ះពាល់ដល់សុខភាពរបស់គាត់ខ្លាំងណាស់ ។ រូបគាត់បានព្យាយាមប្រាប់ក្រុមអ្នកម៉ៅការផ្សារជាច្រើនដងមកហើយ ឱ្យឆាប់ជួយដោះស្រាយបញ្ហាទឹកស្អុយនេះ ប៉ុន្តែក្រុមអ្នកម៉ៅការផ្សារនេះមិនព្រមធ្វើតាមការស្នើសុំរបស់ក្រុមអាជីវករសោះ ។ អាជីវករជាច្រើននាក់នៅផ្សារសាមគ្គីបានលើកឡើងថា ពួកគាត់ចង់ឱ្យមន្ត្រីនានាចុះមកពិនិត្យមើលផ្សារនៅរដូវភ្លៀងធ្លាក់នេះផង ។
ឆ្លើយតបចំពោះការរអ៊ូរទាំរបស់ប្រជាពលរដ្ឋនេះ អ្នកស្រីមុំ ម៉ុន ប្រធានផ្សារសាមគ្គីហៅផ្សារប៉ាហ៊ី និយាយថា បញ្ហាទឹកលូបង្គន់ហូរចេញមកចូលផ្សារនេះគឺខាងអាជ្ញាធរជាអ្នកដោះស្រាយទេ ព្រោះអ្នកស្រីដោះស្រាយតែម្ខាងផ្លូវចូលមកខាងក្នុងផ្សារប៉ុណ្ណោះ ចំណែកម្ខាងផ្លូវចេញទៅខាងក្រៅគឺអាជ្ញាធរជាអ្នកទទួលខុសត្រូវ ។
ទាក់ទិននឹងបញ្ហាលូទឹកស្អុយនេះតាមពិតទៅអាជ្ញាធរបានដោះស្រាយម្តងរួចមកហើយ និងកំពុងតែពិភាក្សាដោះស្រាយបន្តទៅទៀត។ អ្នកស្រីបានបន្តទៀតថា អ្នកស្រីនិងអាជ្ញាធរកំពុងតែរួមគ្នារៀបចំគម្រោងធ្វើការអភិវឌ្ឍឱ្យផ្លូវចូលមកក្នុងផ្សារ និងផ្លូវជុំវិញផ្សារលែងមានភាពកខ្វក់ហើយទឹកស្អុយលែងផុលចេញមកតទៅទៀត ដើម្បីឱ្យអាជីវករលក់ដូរបានស្រួលបួលនៅគ្រប់ទីកន្លែង ៕
ចែករំលែកព័តមាននេះ