ខេត្តប៉ៃលិន ៖ ជំនន់ទឹកភ្លៀងដែលកំពុងជន់លិចខេត្តមួយចំនួននៅប្រទេសថៃ បានបន្តហូរធ្លាក់មកដល់ភូមិមួយចំនួននៅខេត្តប៉ៃលិន ប្រទេសកម្ពុជា ជាពិសេសនៅឃុំស្ទឹងត្រង់ ស្រុកសាលាក្រៅ ដោយគួបផ្សំជាមួយនឹងទឹកភ្លៀងធ្លាក់ជោកជាំជារៀងរាល់ថ្ងៃនៅក្នុងខេត្តនោះ បណ្តាលឱ្យទឹកជំនន់លិចផ្ទះប្រជាពលរដ្ឋចំនួន៦៩ខ្នង ក្នុងនោះលិចធ្ងន់ធ្ងរចំនួន៣៣ខ្នង និងស្រាលចំនួន៣៦ខ្នង សរុបចំនួន៦៩ខ្នង ។
ហេតុការណ៍គ្រោះធម្មជាតិទឹកជំនន់នេះ មិនបណ្តាលឱ្យប្រជាពលរដ្ឋណាម្នាក់ស្លាប់ ឬរងរបួសនោះទេ គ្រាន់តែខាតបង់ទ្រព្យសម្បត្តិ និងសម្ភារប្រើប្រាស់មួយចំនួនដោយសារអណ្តែតទៅតាមទឹកហូរ ។ ទឹកជំនន់លិចផ្ទះប្រជាពលរដ្ឋនេះបានចាប់ផ្តើមតាំងពីយប់ថ្ងៃទី១២ កញ្ញា រហូតដល់ព្រឹកថ្ងៃទី២០ កញ្ញា ២០១២ ទឹកចាប់ស្រកទៅវិញបន្តិចហើយ ។
លោកកែវ រំដេត មេឃុំស្ទឹងត្រង់បានឲ្យដឹងថា ប្រជាពលរដ្ឋដែលទទួលរងគ្រោះមហន្តរាយ ដោយទឹកជំនន់នេះ មានចំនួន៣ភូមិ គឺភូមិកូនដំរីភូមិផ្ទះស្បូវ និងភូមិព្រៃសន្ទះ ។ គ្រោះធម្មជាតិដោយទឹកជំនន់នេះបានបំផ្លាញផលដំណាំប្រជាពលរដ្ឋមួយចំនួនដូចជា ដំណាំពោត និងស្រូវអស់ចំនួន៤ហិកតា ហើយចាន ឆ្នាំង ពាងទឹក ជ្រូក មាន់ ទា និងសម្ភារប្រើប្រាស់មួយចំនួនទៀតត្រូវបានអណ្តែតទៅតាមទឹកហូរអស់ផងដែរ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ