រាជធានីភ្នំពេញ ៖ ជនស្ទាវបីនាក់ត្រូវបានកម្លាំងប៉ូលិសខណ្ឌដង្កោ សហការជាមួយប៉ូលិសខណ្ឌពោធិ៍សែនជ័យ និងប៉ូលិសប៉ុស្តិ៍ពងទឹក ព្រមទាំងប៉ុស្តិ៍ចោមចៅធ្វើការចាប់ខ្លួនបានបន្ទាប់ពីស្រ្តីពីរនាក់បានដាក់ពាក្យប្តឹងជុំវិញការចាប់រំលោ.ភ ហើយក្នុងចំណោមពួកនាងទាំងពីរនាក់ត្រូវជននោះចាប់រំលោ.ភសេពសន្ថវៈបានសម្រេចម្នាក់ ឯម្នាក់ទៀតមានសំណាងបានរត់រួចពីកណ្តាប់ដៃប្រុស
រាជធានីភ្នំពេញ ៖ ជនស្ទាវបីនាក់ត្រូវបានកម្លាំងប៉ូលិសខណ្ឌដង្កោ សហការជាមួយប៉ូលិសខណ្ឌពោធិ៍សែនជ័យ និងប៉ូលិសប៉ុស្តិ៍ពងទឹក ព្រមទាំងប៉ុស្តិ៍ចោមចៅធ្វើការចាប់ខ្លួនបានបន្ទាប់ពីស្រ្តីពីរនាក់បានដាក់ពាក្យប្តឹងជុំវិញការចាប់រំលោភ ហើយក្នុងចំណោមពួកនាងទាំងពីរនាក់ត្រូវជននោះចាប់រំលោភសេពសន្ថវៈបានសម្រេចម្នាក់ ឯម្នាក់ទៀតមានសំណាងបានរត់រួចពីកណ្តាប់ដៃប្រុសព្រានទាំងនេះ ។
ហេតុការណ៍ចាប់រំលោភនោះបានកើតឡើងកាលពីវេលាម៉ោង៣និង៣០នាទីទៀបភ្លឺថ្ងៃទី១៩ កញ្ញា នៅក្នុងដីឡូត៍មួយកន្លែងដែលមានឈ្មោះដំណាក់សាម៉នម៉េត ស្ថិតក្នុងភូមិព្រៃកី«គ»សង្កាត់ពងទឹក ខណ្ឌដង្កោ រាជធានីភ្នំពេញ ។ ជនសង្ស័យដែលត្រូវចាប់ខ្លួននោះ ត្រូវបានគេស្គាល់ម្នាក់ឈ្មោះលន រ៉ុម អាយុ១៨ឆ្នាំ និងម្នាក់ទៀតឈ្មោះសួង ឧត្តម អាយុ១៨ឆ្នាំ ពួកគេមានទីលំនៅក្នុងភូមិព្រៃកំបុត សង្កាត់ចោមចៅ និងជនទី៣ឈ្មោះវិចិត្រ អាយុជិត២០ឆ្នាំ ជាកម្មកររោងចក្រមានទីលំនៅភូមិក្រាំងដូនទៃ សង្កាត់ចោមចៅ ខណ្ឌពោធិ៍សែនជ័យ ។ ដោយឡែកស្រ្តីរងគ្រោះដែលត្រូវក្រុមព្រាននារីចាប់រំលោភរហូតបានសម្រេចនោះមានអាយុ២២ឆ្នាំ មានទីលំនៅក្នុងសង្កាត់បឹងធំ ខណ្ឌពោធិ៍សែនជ័យ និងស្នាក់នៅឃុំបែកចាន ស្រុកអង្គស្នួល ខេត្តកណ្តាល ឯម្នាក់ទៀតដែលមានសំណាងបានរត់រួចពីកណ្តាប់ដៃក្រុមព្រាននារីនោះមានអាយុ១៥ឆ្នាំ មានទីលំនៅក្នុងសង្កាត់ទឹកថ្លា ខណ្ឌសែនសុខ ។ នាងមានអាយុតិចមែន ប៉ុន្តែមានមាឌធំជាងនារីរងគ្រោះដែលមានអាយុ២២ឆ្នាំ ។ ពួកនាងមានមុខរបរជាអ្នកស៊ីឈ្នួលលក់បង្អែមឲ្យគេនៅមុខផ្សារស៊ិនជូរីផ្លាហ្សា ។
ស្រ្តីរងគ្រោះបានឲ្យដឹងថា នៅមុនពេលកើតហេតុខាងលើ ក្រោយពេលចប់ការលក់ដូរវេលាម៉ោង២និង៣០នាទីរំលងអធ្រាត្រ ដោយសារអត់មានលុយជិះម៉ូតូឌុបពួកនាងបាននាំគ្នាដើរត្រឡប់ទៅផ្ទះជួលនៅឯឃុំបែកចាន ស្រុកអង្គស្នួលវិញ។ លុះក្រោយពេលដើរចេញបានបន្តិច ក៏ស្រាប់តែឃើញបក្សពួកជនសង្ស័យម្នាក់ប៉ុណ្ណោះ ជិះម៉ូតូមកដល់ហើយបាននិយាយលួងលោមរូបនាងឲ្យជិះម៉ូតូជាមួយដោយប្រាប់នាងថាគេត្រូវទៅផ្ទះផ្លូវនោះដែរ និងប្រាប់ឲ្យពួកនាងជួយចេញលុយថ្លៃសាំងត្រឹមតែមួយលីត្រប៉ុណ្ណោះបានហើយ ។
ស្រ្តីរងគ្រោះបានបន្តទៀតថា នៅក្នុងខណៈនោះដោយសារតែមើលទៅជននោះគួរឲ្យទុកចិត្ត ម្យ៉ាងត្រឹមសាំងមួយលីត្រពួកនាងអាចមានលទ្ធភាពជួយចេញបាន ពួកនាងក៏បានយល់ព្រមឲ្យជននោះឌុប លុះពេលទៅដល់រង្វង់មូលថ្នល់បំបែកចោមចៅ ជននោះមិនបានជិះទៅតាមផ្លូវជាតិលេខ៤នោះទេ គេបានជិះទៅតាមផ្លូវជាតិលេខ៣វិញ ។ ពេលឃើញជននោះជិះខុសផ្លូវដែលផ្សារបែកចានត្រូវទៅតាមផ្លូវជាតិលេខ៤ ទើបត្រូវ តែបែរជាជននោះជិះតាមផ្លូវជាតិលេខ៣វិញបែបនេះ ពួកនាងបានសួរនាំជននោះបានប្រាប់ថា គេទៅយកអីវា៉ន់នៅផ្ទះមិត្តភក្តិមួយភ្លែតចាំត្រឡប់មកវិញ ។ បន្ទាប់ពីបានឮបែបនេះពួកនាងក៏លែងមានការសង្ស័យតទៅទៀតដែរ ព្រោះកន្លងមកពួកនាងធ្លាប់សុំម៉ូតូគេជិះដោយសារបែបនេះជាបន្តបន្ទាប់មិនដែលមានបញ្ហាទេ ។
ស្ត្រីរងគ្រោះបានបន្តថា ពេលឌុបពួកនាងទៅដល់ត្រង់ចំណុចកើតហេតុខាងលើ ស្រាប់តែមានបក្សពួកពីរនាក់ទៀតកំពុងរង់ចាំនៅទីនោះរួចជាស្រេច ខណៈនោះដោយឃើញស្ថានភាពមិនសូវស្រួល ពួកនាងបាននាំគ្នារត់គេចខ្លួនភ្លាមៗដែរ ។ឯបក្សពួកជននោះម្នាក់ឈ្មោះវិចិត្រ បានជិះម៉ូតូចេញទៅបាត់មិនបានដេញតាមពួកនាងនោះឡើយ ។ ប៉ុន្តែឈ្មោះលន រ៉ុម និងឈ្មោះសួង ឧត្តម បានរត់ដេញតាមចាប់ពួកនាងបានម្នាក់ គឺនាងដែលមានអាយុ២២ឆ្នាំហើយបានចាប់អូសនាំយកទៅរហូតដល់មាត់ស្រះទឹកមួយកន្លែងចម្ងាយពីផ្លូវប្រមាណជាង៣០០ម៉ែត្រ រួចរំលោភម្នាក់ម្តងៗរហូតបានសម្រេចទើបគេចខ្លួន និងបានយកទូរស័ព្ទរបស់នាងមួយគ្រឿងទៅជាមួយផងដែរ ។ ដោយឡែកនាងម្នាក់ទៀតដែលមានអាយុ១៥ឆ្នាំមានសំណាងបានរត់រួចពីក្រញាំដៃក្រុមព្រាននារីនោះ ព្រោះជនទាំងនោះមិនបានដេញតាមដោយសារឃើញនាងម្នាក់នោះទើបកោរសក់កាន់ទុក្ខបងទើបស្លាប់ថ្មីៗ ។
ប្រភពដដែលបានបន្តថា ក្រោយពេលជនទាំងនោះចាប់រំលោភរួចហើយគេចខ្លួនបាត់អស់ពួកនាងបានដើរចេញក្រៅវិញ ជួបនឹងអ្នករត់ម៉ូតូរ៉ឺម៉កកង់បីម្នាក់ក៏បានពឹងពាក់ឲ្យជូនទៅកាន់ប៉ុស្តិ៍ប៉ូលិសដាក់ពាក្យប្តឹងជួយអន្តរាគមន៍រកយុត្តិធម៌ឲ្យពួកនាង ។ មុនដំបូងបានទៅកាន់ប៉ុស្តិ៍ប៉ូលិសចោមចៅ ព្រោះនឹកស្មានថាកន្លែងកើតហេតុនោះស្ថិតនៅក្នុងភូមិសាស្រ្តសង្កាត់ចោមចៅ លុះពេលទៅដល់ទីនោះទើបប៉ូលិសប៉ុស្តិ៍ចោមចៅរុញឲ្យទៅប្តឹងនៅឯប៉ុស្តិ៍ពងទឹកវិញ ។ ក្រោយពេលទទួលបានពាក្យបណ្តឹងជនរងគ្រោះ ប៉ូលិសប៉ុស្តិ៍ពងទឹកបានសហការណ៍ជាមួយប៉ូលិសខណ្ឌដង្កោ និងប៉ូលិសខណ្ឌពោធិ៍សែនជ័យ និងប៉ុស្តិ៍ចោមចៅ ចេញអន្តរាគមន៍ស្រាវជ្រាវរកមុខសញ្ញារហូតដល់វេលាម៉ោង១២ថ្ងៃត្រង់ថ្ងៃដដែលនោះ ទើបចាប់ខ្លួនក្រុមព្រាននារីទាំងនោះបានជាបន្តបន្ទាប់ទាំងបីនាក់ និងកំពុងកសាងសំណុំរឿងដើម្បីបញ្ជូនទៅកាន់តុលាការចាត់ការតាមផ្លូវច្បាប់ ៕
ចែករំលែកព័តមាននេះ