រាជធានីភ្នំពេញ ៖ នារសៀលថ្ងៃទី១៦ ខែកញ្ញា ឆ្នាំ២០១២ ក្រុមហ៊ុនតូយ៉ូតា(ខេមបូឌា) បានរៀបចំពិធីតាំងបង្ហាញរថយន្តតូយ៉ូតា FORTUNER សេ៊រីឆ្នាំ២០១២ នៅសណ្ឋាគារសូហ្វីតែលភ្នំពេញភូគីត្រា ។ នៅក្នុងកម្មវិធីនេះមានការអញ្ជើញចូលរួមជាអធិបតីភាពដ៏ខ្ពង់ខ្ពស់ពីលោកឧកញ៉ា គង់ នួន ប្រធានក្រុមហ៊ុនតូយ៉ូតា (ខេមបូឌា) ព្រមទាំងភ្ញៀវជាតិ និងអន្តរជាតិយ៉ាងច្រើនកុះករ ។
មានប្រសាសន៍នៅក្នុងកម្មវិធីនោះ លោកឧកញ៉ា គង់ នួន ប្រធានក្រុមហ៊ុនតូយ៉ូតា(ខេមបូឌា) បានថ្លែងអំណរគុណយ៉ាងជ្រាលជ្រៅចំពោះវត្តមានរបស់ភ្ញៀវកិត្តិយសទាំងអស់ដែលបានអញ្ជើញចូលរួមទស្សនាការតាំងបង្ហាញរថយន្ត FORTUNER នាពេលនេះ ព្រមទាំងអតិថិជនទាំងអស់ដែលតែងតែបានគាំទ្រចំពោះក្រុមហ៊ុនតាំងពីដើមរៀងមក ។ ជាពិសេសទៅទៀត លោកឧកញ៉ា មានសង្ឃឹមយ៉ាងមុតមាំថា រថយន្តតូយ៉ូតា FORTUNER ដែលបានតាំងបង្ហាញនាពេលនេះ នឹងទទួលបានការគាំទ្រ និងពេញនិយមយ៉ាងពេញទំហឹងពីសំណាក់អតិថិជន ។
យោងតាមលោកអូសាមុ តូមីអាកា អនុប្រធានផ្នែកវិស្វកម្មនៃនាយកដ្ឋានផែនការផលិតកម្ម IMV របស់សាជីវកម្មយានយន្តតូយ៉ូតាបានមានប្រសាសន៍ថា «លទ្ធផលនៃការលក់រថយន្តសេ៊រី IMV មានការកើនឡើងនៅលើទីផ្សារសាកល ។ លទ្ធផលនៃការលក់រថយន្តសេ៊រី IMV នៅឆ្នាំ២០១០កើនឡើងលើសពី៨០.០០០គ្រឿង ទោះជាមានការធ្លាក់ចុះនៃសេដ្ឋកិច្ចក្នុងឆ្នាំ២០០៨-២០០៩យ៉ាងណាក្តី ។ នេះបញ្ជាក់ឱ្យឃើញថា គោលជំហរទីផ្សារអាស៊ាន (ASEAN) មានសក្តានុពលយ៉ាងខ្លាំង» ។
លោកបានបង្ហាញ និងពន្យល់ពីទស្សនវិស័យនៃការផលិតរថយន្ត Fortuner គឺដើម្បីតម្រូវទៅតាមការប្រើប្រាស់ក្នុងស្រុក ។ រថយន្តនេះត្រូវបានរចនាឡើងប្រកបដោយភាពទំនើប និងឧត្តមភាព ។រថយន្ត Fortuner ជារថយន្ត SUV ស្ព័រថ្មីដែលដាក់សម្ពោធលើកដំបូងជាផ្លូវការនៅក្នុងព្រះរាជាណាចក្រកម្ពុជា ។ Fortuner ថ្មីបានធ្វើការកែលម្អផ្នែកខាងក្រៅ ខាងក្នុង និងគ្រឿងក្រោមជាច្រើន ដើម្បីឱ្យកាន់តែមានផាសុកភាពនៃការបើកបរ ប្រណីតភាព និងឧត្តមភាពដល់ម្ចាស់របស់វា ។
ឆ្លៀតក្នុងឱកាសនោះដែរ លោក Masaaki Kawabata អគ្គនាយកក្រុមហ៊ុនតូយ៉ូតា(ខេមបូឌា) បានមានប្រសាសន៍បញ្ជាក់បន្ថែមពីចំណុចពិសេសច្រើនយ៉ាងរបស់រថយន្ត Fortuner ដែលមានរចនាម៉ូតយ៉ាងពិសេស ទាន់សម័យ មានថាមពលខ្លាំងក្លា ហើយមានបំពាក់ដោយឧបករណ៍ទំនើប មានប្រព័ន្ធ DVC ទំនើប Touch Screen មានប្រព័ន្ធភ្ជាប់កម្មវិធី Blue Tooth និងឧបករណ៍សម្រាប់មើលពេលបើកថយក្រោយ ដើម្បីបង្កើនសុវត្ថិភាព និងមានកៅអីស្បែកសុទ្ធ ។ រថយន្ត Fortuner មានប្រព័ន្ធកាឡេមុខក្រោយ ដើម្បីបង្កើនសុវត្ថិភាពទៅតាមកាលៈទេសៈ ងាយស្រួលក្នុងការធ្វើដំណើរក្នុងក្រុង និងក្រៅក្រុង ជាពិសេសធ្វើដំណើរផ្លូវឆ្ងាយក្នុងស្ថានភាពផ្លូវលំបាក និងសន្សំសំចៃប្រេងមានកម្រិតខ្ពស់ ។
នៅថ្ងៃនេះដែរ ក្រុមហ៊ុនតូយ៉ូតា(ខេមបូឌា)ក្រៅពីការបង្ហាញរថយន្តថ្មី គឺបាននាំមកនូវអត្ថប្រយោជន៍បន្ថែមទៀត គឺ«ការផ្តល់ជូនការធានាពីរោងចក្រតូយ៉ូតា៣ឆ្នាំ ឬ១០ម៉ឺនគីឡូម៉ែត្រ លើគ្រប់ម៉ូដែលរថយន្តតូយ៉ូតា ដែលបានទិញពីក្រុមហ៊ុនតូយ៉ូតា(ខេមបូឌា)ចាប់ពីថ្ងៃនេះតទៅ ។គួររំលឹកដែរថា បច្ចុប្បន្ននេះ ក្រុមហ៊ុនតូយ៉ូតា(ខេមបូឌា) មានសាខាចំនួន៣រួចមកហើយ ដែលសាខាទី១ មានទីតាំងនៅផ្លូវលេខ៣៦០ ភូមិ៥ សង្កាត់បឹងកេងកងទី៣ ខណ្ឌចំការមន រាជធានីភ្នំពេញ សាខាទី២ ស្ថិតនៅភូមិរំចេក៤ ឃុំរតនៈ ស្រុកបាត់ដំបង ខេត្តបាត់ដំបង និងសាខាទី៣ មានអាសយដ្ឋាន ភូមិកោកត្នោត ឃុំកណ្តែក ស្រុកប្រាសាទបាគង ខេត្តសៀមរាប ហើយសម្រាប់ថ្ងៃអនាគត ក្រុមហ៊ុនមានទិសដៅបង្កើត និងពង្រីកសាខារបស់ខ្លួនឱ្យបានកាន់តែច្រើននៅក្នុងប្រទេសកម្ពុជាបន្ថែមទៀត ដើម្បីបម្រើសេចក្តីត្រូវការរបស់អតិថិជន ៕
ចែករំលែកព័តមាននេះ