ខេត្តតាកែវ ៖ យ៉ាងហោចណាស់មានលោកតាអាចារ្យ២នាក់ បានស្លាប់ភ្លាមៗនៅនឹងកន្លែង រីឯ៦នាក់ផ្សេងទៀតរងគ្រោះធ្ងន់ត្រូវបានបញ្ជូនទៅសង្គ្រោះនៅមន្ទីរពេទ្យបង្អែកអង្គរកា។ ហេតុការណ៍នេះកើតឡើងកាលពីថ្ងៃទី១៨ កញ្ញា វេលាម៉ោង១២ថ្ងៃត្រង់ នៅវត្តអង្គមេត្រី ឃុំគុស ស្រុកត្រាំកក់ ក្រោយពីជនរងគ្រោះទាំងអស់បានជួបជុំគ្នាក្នុងកម្មវិធីបុណ្យបញ្ចុះអដ្ឋិធាតុចៅលោកយាយជាអាណិកជនខ្មែរនៅអាមេរិកម្នាក់នៅក្នុងវត្តខាងលើលុះពេលពួកគាត់ពិសាបាយថ្ងៃត្រង់រួចក៏បានពិសារកាហ្វេ ស្រាប់តែមានអាការក្អួតចង្អោរ ចុក និងមានអ្នកស្លាប់និងរងគ្រោះបន្តបន្ទាប់គ្នា។ ជាជំហានដំបូង ត្រូវបានដាក់ការសង្ស័យជាពុលកាហ្វេ ។
លោកអនុសេនីយ៍ឯក អួន សុខុម អធិការរងនគរបាលស្រុកត្រាំកក់ឱ្យដឹងថា លោកតាអាចារ្យដែលស្លាប់ដោយសារការពុលនេះមាន២នាក់គឺឈ្មោះតុប ណុប អាយុ៨០ឆ្នាំ រស់នៅភូមិអង្គក្រឡាញ់ ឃុំគុស និងឈ្មោះជួប តិត អាយុ៧៧ឆ្នាំ រស់នៅភូមិពងទឹកខាងត្បូង ឃុំគុសពួកគាត់បានស្លាប់ភ្លាមៗនៅនឹងកន្លែង ។ ចំណែកអ្នកពុលធ្ងន់មាន៦នាក់ គឺ១-ឈ្មោះមិល ឆេន អាយុ៦៨ឆ្នាំ ២-ឈ្មោះង៉ែត លីម ៣-ឈ្មោះញិន ណន អាយុ៧៥ឆ្នាំ ៤-ឈ្មោះញិន ឆិល អាយុ៨០ឆ្នាំ ៥-ឈ្មោះសៅ គិន អាយុ៦៧ឆ្នាំ និង៦-ឈ្មោះស្រី ម៉ៅ ភេទស្រី អាយុ១០ឆ្នាំ ត្រូវបាននាំទៅសង្គ្រោះនៅមន្ទីរពេទ្យបង្អែកអង្គរកា ។ លោកអធិការរងបានបន្តទៀតថា មុនពេលកើតហេតុ នៅក្នុងវត្តមានពិធីបុណ្យមួយរបស់លោកយាយជៀម ផន អាយុ៧៦ឆ្នាំ ជាអាណិកជនខ្មែររស់នៅសហរដ្ឋអាមេរិក មកធ្វើបុណ្យបញ្ចុះអដ្ឋិធាតុឱ្យចៅរបស់គាត់ ហើយពិធីបុណ្យនេះទើបតែចាប់ផ្តើមនៅថ្ងៃនេះប៉ុណ្ណោះ ក៏មានបញ្ហាកើតឡើង ។
សាក្សីនៅកន្លែងកើតហេតុ និយាយថា មុនពេលកើតហេតុជនរងគ្រោះបានជួបជុំគ្នាពិសាបាយថ្ងៃត្រង់ ហើយពេលនោះពួកគាត់ខ្លះហូបបាយ ខ្លះហូបកាហ្វេ និងអ្នកខ្លះហូបផ្លែមង្ឃុត ។ ពេលហូបរួចក៏មានខ្លះចុកពោះ និងខ្លះប្រកាច់តែម្តង ដែលនៅពេលនោះពួកគាត់ខ្លះហូបលាយឡំគ្នាទាំងបាយ ទាំងកាហ្វេទាំងផ្លែមង្ឃុតដែលមិនដឹងថាពុលដោយសារអ្វីទេ ។
លោកហេង ធី ប្រធានមន្ទីរពេទ្យបង្អែកអង្គរកា បានប្រាប់កោះសន្តិភាពតាមទូរស័ព្ទថា ជនរងគ្រោះទាំង៦នាក់នោះ ៤នាក់បានធូរស្រាលហើយនៅសល់តែ២នាក់នៅមានអាការៈធ្ងន់ធ្ងរនៅឡើយ ។ លោកបន្តថា លោកមិនហា៊នថាពុលអ្វីនោះទេទាល់តែ សមត្ថកិច្ចទើបគេដឹង ។ ការផ្តល់ព័ត៌មានពីក្រុមគ្រូពេទ្យបែបនេះមិនដឹងថា តើសមត្ថកិច្ច ឬគ្រូពេទ្យជាអ្នកធ្វើកោសល្យវិច័យទេ ។ ការមានមន្ទិលសង្ស័យទៅលើផ្លែមង្ឃុតហូបផង ផឹកកាហ្វេដាក់ស្ករផង អាចជាការសង្ស័យពិតប្រាកដ ព្រោះបើតាមចាស់ៗធ្លាប់និយាយប្រាប់ថា ផ្លែមង្ឃុតបើសិនជាហូបជាមួយទឹកឃ្មុំដែលមានជាតិផ្អែមខ្លាំងអាចនឹងពុល ៕
ចែករំលែកព័តមាននេះ