រាជធានីភ្នំពេញ ៖ ជនសង្ស័យម្នាក់ក្នុងចំណោមបក្សពួក២នាក់ ត្រូវបានប៉ូលិសប៉ុស្តិ៍ទឹកល្អក់ទី៣ ខណ្ឌទួលគោក ចាប់ខ្លួនកាលពីវេលាម៉ោង១និង៣០នាទីរសៀលថ្ងៃទី១៨ កញ្ញា ២០១២ បន្ទាប់ពីជិះម៉ូតូម៉ាកស្តេប ពណ៌ខ្មៅ មួយគ្រឿង ធ្វើសកម្មភាពឆក់កាបូបពីនិស្សិតម្នាក់នៅតាមផ្លូវលេខ២៦៥ សង្កាត់ទឹកល្អក់ទី២ បានសម្រេចលើកសើចឌឺត្រូវនាងដេញតាមជាមួយសមត្ថកិច្ចជួបគ្រោះថ្នាក់ចរាចរណ៍ដួលម៉ូតូ ។
ជនសង្ស័យដែលត្រូវចាប់ខ្លួនឈ្មោះសួន ពិសិដ្ឋ ភេទប្រុស អាយុ២៤ឆ្នាំ មានទីលំនៅភូមិផ្អេរ សង្កាត់ទំនប់ទឹក ខណ្ឌចំការមន រងរបួសជើង ដោយសារដួលម៉ូតូ ។ ចំណែកស្ត្រីជាម្ចាស់កាបូបឈ្មោះរិទ្ធ ស៊ូលាន អាយុ១៨ឆ្នាំ ជានិស្សិតឆ្នាំទី១ មានទីលំនៅសង្កាត់ស្ទឹងមានជ័យ ខណ្ឌមានជ័យ ។ នៅពេលចាប់ខ្លួនប៉ូលិសដកហូតបានកាបូបដែលក្នុងនោះមានទូរស័ព្ទម៉ាកអាយហ្វូន១គ្រឿងប្រាក់ប្រមាណជាង១០ដុល្លារ និងសៀវភៅប្រគល់ឱ្យម្ចាស់វិញ។
តាមលោកស៊ីន ប៊ុនរី នាយប៉ុស្តិ៍ទឹកល្អក់ទី៣ បានឱ្យដឹងថា ជនសង្ស័យត្រូវចាប់ខ្លួននៅពេលធ្វើសកម្មភាពឆក់កាបូបបានសម្រេច ហើយត្រូវកម្លាំងប៉ូលិសរួមជាមួយម្ចាស់កាបូបដេញចាប់ ជិះម៉ូតូគេចខ្លួនដួលនៅចំណុចមុខផ្ទះលេខ៣៣៦ ផ្លូវទេពផន កែងផ្លូវលេខ២៦៥ និងត្រូវចាប់ខ្លួនបានម្នាក់រត់រួចម្នាក់ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ