ខេត្តក្រចេះ ៖ មន្ត្រីខណ្ឌរដ្ឋបាលជលផលដឹកនាំដោយលោកម៉ុក ពន្លក នាយរងខណ្ឌរដ្ឋបាលជលផលខេត្ត និងកម្លាំងប្រដាប់អាវុធ កាលពីព្រឹកថ្ងៃទី១៥ កញ្ញា ២០១២ បានចុះបង្ក្រាបបទល្មើសនេសាទនៅក្នុងបឹងវែង ភូមិបឹងរៃ ឃុំឫស្សីកែវ ស្រុកព្រែកប្រសព្វ ។
មន្ត្រីខណ្ឌរដ្ឋបាលជលផលខេត្តបានឱ្យដឹងថា ប្រតិបត្តិការចុះបង្ក្រាបបទល្មើសនេសាទដែលជនទុច្ចរិតលួចធ្វើសកម្មភាពក្នុងបឹងវែងនេះ កម្លាំងជំនាញចាប់រឹបអូសបានរបាំងស្បៃមុងចំនួន២៥ខ្សែ មានប្រវែង១.២៥០ម៉ែត្រ លូស្បែមុងចំនួន២៥ របាំងណរ៉ាវធ្វើអំពីសាច់អួននីឡុងរឹងចំនួន៤ខ្សែ មានប្រវែង២.៥០០ម៉ែត្រ និងលបណរ៉ាវធ្វើពីសាច់អួននីឡុងចំនួន១០ បង្គោលចម្រឹងឫស្សីចំនួន៥៣៥បង្គោល។ ជាមួយគ្នានោះកូនត្រីចម្រុះប្រមាណជិត២០០គីឡូក្រាមត្រូវបានសមត្ថកិច្ចចាក់លែងចូលទៅក្នុងបឹងធម្មជាតិផងដែរ ។
ពលរដ្ឋនៅស្រុកព្រែកប្រសព្វ មានចំនួនរាប់រយគ្រួសារដែលសព្វថ្ងៃពឹងអាស្រ័យទៅលើរបរនេសាទសម្រាប់គ្រួសារ ដូចជាបង់សំណាញ់ រាយមង និងរាយសន្ទូច នៅក្នុងបឹងវែង បានសម្តែងនូវការព្រួយបារម្ភយ៉ាងខ្លាំងចំពោះការបាត់បង់ត្រីពូជមច្ឆជាតិធំៗ ខណៈពេលដែលសព្វថ្ងៃនេះ ការលួចនេសាទរបស់ជនទុច្ចរិតដោយឧបករណ៍នេសាទខុសច្បាប់នៅតែកើតមានឥតឈប់ឈរ ដែលការបង្ក្រាបរបស់អាជ្ញាធរមូលដ្ឋាន ហាក់ដូចជាមានកម្រិតទាបនៅឡើយនោះ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ