រាជធានីភ្នំពេញ ៖ អាជ្ញាធរខណ្ឌដង្កោ ដឹកនាំដោយលោកអភិបាលខណ្ឌ នុត ពុធដារ៉ា និងមានការចូលរួមពីសំណាក់កងកម្លាំងសមត្ថកិច្ចប៉ូលិស និងប៉េអឹមបានចុះទៅពិនិត្យមើលពីស្ថានភាពទឹកស្ទឹងព្រែកត្នោត ដែលពេលនេះកំពុងតែមានការកើនឡើងខ្លាំង ថ្វីដ្បិតតែមិនទាន់ដល់កម្រិតប្រកាសអាសន្នក៏ដោយ ប៉ុន្តែនេះគឺជាការគិតគូរដល់សុវត្ថិភាពរបស់ប្រជាពលរដ្ឋនៅក្នុងមូលដ្ឋាន ។
ការចុះពិនិត្យមើលពីស្ថានភាពទឹកនោះបានធ្វើឡើងកាលពីព្រឹកថ្ងៃទី១៨ កញ្ញា ២០១២ ដោយអាជ្ញាធរខាងលើបានចុះទៅកាន់ស្ពាន៧មករា ដែលមានទីតាំងស្ថិតនៅក្នុងសង្កាត់ក្រាំងពង្រ ដោយពិនិត្យមើលពីកម្ពស់ទឹកនៅទីនោះមុនគេ ព្រោះទីនោះគឺជាចំណុចមុខគេ ។ បន្ទាប់មកទើបបន្តដំណើរទៅពិនិត្យមើលស្ថានភាពទំនប់សណ្តរស្ទឹងព្រែកត្នោត ដែលស្ថិតក្នុងសង្កាត់មួយចំនួនទៀត ក្នុងនោះមានសង្កាត់ទៀន សង្កាត់គងនយ សង្កាត់ស្ពានថ្ម សង្កាត់សាក់សំពៅ សង្កាត់ជើងឯក និងមើលទំនប់ការពារមួយនៅក្នុងសង្កាត់ព្រែកកំពឹស ។ នៅពេលនេះកម្ពស់ទឹកមិនទាន់បង្កការព្រួយបារម្ភ ឬដល់កម្រិតប្រកាសអាសន្ននៅឡើយទេ ថ្វីដ្បិតតែមានការកើនឡើងជាងមុនមែន ប៉ុន្តែការចុះត្រួតពិនិត្យគឺជាការតាមដានមួយដ៏សំខាន់បំផុតសម្រាប់បង្ការ និងទប់ស្កាត់ជាមុនពេលទឹកជំនន់មកដល់ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ