ខេត្តកំពង់ចាម ៖ ព្រឹកថ្ងៃទី១៦ កញ្ញា ឆ្នាំ២០១២ នៅមន្ទីរគណបក្សប្រជាជនកម្ពុជា ឃុំគងជ័យ ស្រុកអូរាំឪ មានរៀបចំពិធីសំណេះសំណាលជាមួយនឹងសមាជិកគណបក្សប្រជាជនកម្ពុជាឃុំ ដែលបានអញ្ជើញមកចូលរួមពីភូមិចំនួន២២ ក្នុងឃុំគងជ័យ ស្រុកអូរាំងឪ ខេត្តកំពង់ចាម ដើម្បីដាក់ផែនការឆ្ពោះទៅរកភាពជោគជ័យក្នុងការបោះឆ្នោតជ្រើសតាំងតំណាងរាស្ត្រនីតិកាលទី៥ ឆ្នាំ២០១៣ខាងមុខនេះ ។
នៅក្នុងពិធីសំណេះសំណាលនេះ ក៏មានការអញ្ជើញចូលរួមជាគណៈអធិបតីពីសំណាក់លោកជំទាវសាន្ត អរុណ ជាអនុប្រធានគណៈពង្រឹងមូលដ្ឋានស្រុក និងជាប្រធានគណៈពង្រឹងមូលដ្ឋានឃុំ និងលោកជំទាវឧកញ៉ា យីន ផាន្នី ជាអនុប្រធានគណៈពង្រឹងមូលដ្ឋានស្រុក និងជាអនុប្រធានគណៈពង្រឹងមូលដ្ឋានឃុំ ព្រមទាំងអស់លោក លោកស្រី ដែលជាក្រុមការងារចុះជួយពង្រឹងមូលដ្ឋានឃុំគងជ័យជាច្រើននាក់ទៀត ។
បន្ទាប់ពីបានស្តាប់របាយការណ៍ដែលបានរាយការណ៍ជូនគណៈអធិបតីពីសំណាក់សមាជិកគណបក្សប្រជាជនកម្ពុជា តាមភូមិនីមួយៗ និងឃុំរួចមក លោកជំទាវឧកញ៉ា យីន ផាន្នី ដែលទី នោះជាស្រុកកំណើត ក៏បានមានប្រសាសន៍សំណេះសំណាលបញ្ជាក់ពីភាពរីករាយពន់ពេក នៅពេលដែលបានអញ្ជើញមកជួបសំណេះសំណាលជាមួយនឹងបងប្អូនទាំងអស់គ្នា ដែលជាជាសមាជិករបស់គណបក្សប្រជាជនកម្ពុជារបស់យើង ក្នុងថ្ងៃនេះ ព្រមទាំងមានការអញ្ជើញជាគណៈអធិបតីដោយលោកជំទាវសាន្ត អរុណ ដែលជាអនុប្រធានគណៈពង្រឹងមូលដ្ឋានស្រុក និងជាប្រធានគណៈពង្រឹងមូលដ្ឋានឃុំរបស់ពួកយើងចូលរួមផងដែរ ។
លោកជំទាវឧកញ៉ា ក៏បានមានប្រសាសន៍បន្តទៀតថា ក្នុងនាមសមាជិករបស់គណបក្សប្រជាជនកម្ពុជា ដែលខ្ញុំមានស្រុកកំណើតនៅទីនេះដែរ យើងទាំងអស់គ្នាត្រូវតែដឹងគុណចំពោះថ្នាក់ដឹកនាំប្រទេសរបស់យើង និងជាពិសេសចំពោះសម្តេចទាំង៣របស់យើង គឺសម្តេច ជា ស៊ីម សម្តេច ហេង សំរិន និងសម្តេច ហ៊ុន សែន ដែលបានរំដោះអាយុជីវិត និងប្រទេសជាតិរបស់យើងឱ្យរួចផុតពីរបបប៉ុលពតបាន ហើយយើងទាំងអស់គ្នាមានជីវិតរស់នៅដល់សព្វថ្ងៃ និងមានអ្វីៗគ្រប់យ៉ាង ។ សូមបងប្អូនទាំងអស់គ្នាជួយណែនាំបងប្អូនសាច់ញាតិ កូនចៅ របស់យើងកុំឱ្យជឿពាក្យញុះញង់របស់គណបក្សដទៃ ដែលគេតែងតែព្យាយាមភូតកុហក់ បោកប្រាស់ ដើម្បីឱ្យពួកគាត់មានការអាក់អន់ស្រពន់ចិត្ត ឬក៏មានការថ្នាំងថ្នាក់ជាមួយនឹងអាជ្ញាធរមូលដ្ឋាន ក៏ដូចជាមួយនឹងគណបក្សប្រជាជនកម្ពុជារបស់យើងទាំងអស់គ្នា ។
លោកជំទាវឧកញ៉ាថ្លែងថា សូមបងប្អូនដែលជាសមាជិកគណបក្សប្រជាជនកម្ពុជាទាំងអស់ត្រូវយកចិត្តទុកដាក់អំពីការណែនាំដល់សមាជិកគណបក្សរបស់យើងបានគ្រប់ៗគ្នា ក្នុងភូមិនីមួយៗឱ្យអញ្ជើញទៅពិនិត្យបញ្ជីឈ្មោះបោះឆ្នោត និងអ្នកដែលទើបតែគ្រប់អាយុបោះឆ្នោតក៏ដូចជាអ្នកដែលមិនទាន់បានចុះឈ្មោះត្រូវអញ្ជើញទៅពិនិត្យបញ្ជីឈ្មោះ ឬក៏ចុះឈ្មោះបោះឆ្នោតនៅតាមការិយាល័យដែលនៅជិតលំនៅរបស់ពួកគាត់ឱ្យបានគ្រប់ៗគ្នា ។
លោកជំទាវសាន្ត អរុណ បានមានប្រសាសន៍ថ្លែងអំណរគុណដល់បងប្អូនដែលជាសមាជិកគណបក្សប្រជាជនកម្ពុជាទាំងអស់ដែលតែងតែបានប្រឹងប្រែងយ៉ាងខ្លាំងអស់ពីកម្លាំងចិត្ត និងកម្លាំងកាយ ដើម្បីធ្វើយ៉ាងណាឱ្យគណបក្សប្រជាជនកម្ពុជារបស់យើងបន្តឈ្នះក្នុងការបោះឆ្នោតជាបន្តទៀត ក្នុងតំណាក់កាលនៃការបោះឆ្នោតជ្រើសតាំងតំណាងរាស្ត្រនីតិកាលទី៥ ឆ្នាំ២០១៣ខាងមុខនេះ ។ លោកជំទាវថ្លែងថា ដោយយោងតាមការចង្អុលបង្ហាញអំពីសំណាក់ប្រធានក្រុមការងារថ្នាក់កណ្តាលចុះជួយស្រុក
អូរាំងឪ ដែលបានធ្វើការណែនាំយើង ឃើញថា លទ្ធផលបោះឆ្នោតជ្រើសតាំងក្រុមប្រឹក្សាឃុំ-សង្កាត់គឺជាជោគជ័យមួយដ៏ល្អ លើគណបក្សនយោបាយដទៃទៀត ដែលមានឈរឈ្មោះនៅក្នុងឃុំរបស់យើង ។
បន្ទាប់ពីបញ្ចប់កម្មវិធីសំណេះសំណាលនេះរួចមក ក្រុមការងារចុះជួយពង្រឹងមូលដ្ឋានឃុំគងជ័យ ដែលដឹកនាំដោយលោកជំទាវសាន្ត អរុណ និងលោកជំទាវឧកញ៉ា យីន ផាន្នី ព្រមទាំងអស់លោក លោកស្រី ដែលជាក្រុមការងារបានអញ្ជើញទៅសួរសុខទុក្ខសមាជិកគណបក្សប្រជាជនកម្ពុជាឃុំមួយរូបដែលមានជំងឺកំពុងតែសម្រាកព្យាបាលនៅមន្ទីរពេទ្យបង្អែកស្រុកអូរាំងឪ ដោយបានឧបត្ថម្ភប្រាក់ចំនួន២០ម៉ឺនរៀល ។
ដោយឡែកអ្នកជំងឺដែលកំពុងសម្រាកព្យាបាលនៅក្នុងមន្ទីរពេទ្យបង្អែកស្រុកនោះចំនួន១០នាក់ផ្សេងទៀត ក៏ទទួលបានថវិកាពីក្រុមការងារចុះជួយមូលដ្ឋានដែរ ដោយលោកតា និងលោកយាយទាំង២នាក់ប្តីប្រពន្ធ ហើយឈឺទាំង២នាក់ទទួលបានថវិកាចំនួន១០ម៉ឺនរៀល ចំណែកឯអ្នកជំងឺមានទាំងកុមារផងទទួលបានថវិកាម្នាក់១ម៉ឺនរៀល ៕
ចែករំលែកព័តមាននេះ