ខេត្តពោធិ៍សាត់ ៖ ជនសង្ស័យ២នាក់ត្រូវបានសមត្ថកិច្ចឃាត់ខ្លួនពីបទលួចមេមាន់ក្លែមស្រា និងរំលោភសេពសន្ថវៈទៅលើយាយចាស់អាយុ៦១ឆ្នាំ ។ ករណីខាងលើនេះបានកើតឡើងកាលពីយប់ថ្ងៃទី១៤ កញ្ញា នៅភូមិបាក់ព្រីង ឃុំស្នាមព្រះ ស្រុកបាកាន ។
លោកវរសេនីយ៍ត្រីប៉ែន ទុង អធិការនគរបាលស្រុកបាកានឱ្យដឹងថា ជនសង្ស័យទាំង២នាក់ដែលឃាត់ខ្លួននេះម្នាក់ឈ្មោះហន ឃុន ភេទប្រុស អាយុ២៣ឆ្នាំ ឃាត់ខ្លួនពីបទលួចមាន់តាមបណ្តឹងរបស់ស្ត្រីឈ្មោះទុំ ចិន អាយុ២៥ឆ្នាំ ឯម្នាក់ទៀតឈ្មោះ សំ វ៉ាង ភេទប្រុស អាយុ២១ឆ្នាំ ឃាត់ខ្លួនពីបទលួចមាន់ជាមួយឈ្មោះហន ឃុន ផងនិងបទរំលោភសេពសន្ថវៈទៅលើលោកយាយម្នាក់អាយុ៦១ឆ្នាំផង ។ ទាំងជនសង្ស័យនិងជនរងគ្រោះរស់នៅភូមិ-ឃុំកើតហេតុជាមួយគ្នា ។
នៅចំពោះមុខសមត្ថកិច្ចជនសង្ស័យឈ្មោះ ហន ឃុន បានរៀបរាប់ថា នៅយប់ថ្ងៃទី១៤ កញ្ញា ខ្លួននិងបក្សពួក២នាក់ទៀតគឺឈ្មោះវ៉ាង និងឈ្មោះរ៉ុង នាំគ្នាផឹកស្រាលើខ្នងប្រឡាយខាងលិចភូមិស្តុកស្វាយ ។ ពេលផឹកចប់នៅទីនោះខ្លួននិងឈ្មោះវ៉ាង បានជូនឈ្មោះរ៉ុង ទៅផ្ទះហើយបានបន្តដំណើរទៅផឹកនៅផ្ទះឈ្មោះណាងទៀត។ បន្ទាប់ពីផឹកនៅផ្ទះឈ្មោះណាង ចប់ក៏ត្រឡប់មកផ្ទះវិញ ឈ្មោះវ៉ាងបានឱ្យខ្លួនឈរយាមផ្លូវហើយវាបានចូលទៅលួចមាន់បានមួយក្បាលពីផ្ទះស្ត្រីឈ្មោះទុំ ចិន រួចហើយយកទៅធ្វើស៊ីនៅផ្ទះវា ។ ខណៈពេលដែលខ្លួនកំពុងធ្វើមាន់នោះឈ្មោះវ៉ាង បានទាញកង់ជិះទៅលិចដោយប្រាប់ថា ទៅផ្ទះសង្សារ លុះយប់ជ្រៅបន្តិចទើបឃើញត្រឡប់មកវិញ ប៉ុន្តែខ្លួនមិនបានដឹងថា ឈ្មោះវ៉ាងនេះទៅចាប់រំលោភលោកយាយនោះទេ លុះស្អែកឡើងប៉ូលិសចាប់ទើបដឹងរឿង ។
តាមចម្លើយរបស់លោកយាយអាយុ៦១ឆ្នាំដែលជាជនរងគ្រោះឱ្យដឹងថា នៅវេលាម៉ោងប្រហែល១២យប់ ខណៈគាត់កំពុងដេកលក់ម្នាក់ឯងក្នុងផ្ទះ ស្រាប់តែឈ្មោះវ៉ាង បានទៅចាប់គាត់យកភួយញ៉ុកមាត់រួចហើយទាញសំពត់ចេញធ្វើសកម្មភាពរំលោភយ៉ាងកំរោលរហូតបានសម្រេច ។ ពេលរំលោភរួចវាបានគំរាមមិនឱ្យប្រាប់អ្នកណាដាច់ខាត បើមិនដូច្នោះទេវានឹងអារ.កសម្លាប់ចោល ។ ដោយនឹកតូចចិត្តខ្មាសកូនក្មេងដែលមានអាយុស្មើនឹងចៅរបស់គាត់ ទើបព្រឹកឡើងក៏ប្តឹងប៉ូលិសឱ្យឃាត់ខ្លួនតែម្តង ។
នៅព្រឹកថ្ងៃទី១៧ កញ្ញា ជនសង្ស័យទាំង២នាក់ត្រូវបានបញ្ជូនមកកាន់ស្នងការដ្ឋាននគរបាលខេត្តពោធិ៍សាត់បង្កសំណុំរឿងបញ្ជូនបន្តទៅតុលាការដែលម្នាក់ជាប់ចោទពីបទលួចមាន់ និងម្នាក់ទៀតជាប់ចោទពីបទលួចមាន់ផង និងរំលោភសេពសន្ថវៈផង ៕
ចែករំលែកព័តមាននេះ