ខេត្តឧត្តរមានជ័យ ៖ រថយន្តម៉ាកនីស្សាន់ដឹកឈើចេញពីព្រៃសហគមន៍១គ្រឿង និងមនុស្ស៣នាក់ត្រូវបានប៉េអឹមឃាត់ខ្លួនចំណុចភូមិអូតាមេង ឃុំអន្លង់វែង ស្រុកអន្លង់វែង កាលពីវេលាម៉ោង១រំលងអធ្រាត្រឈានចូលថ្ងៃទី១៧ កញ្ញា ២០១២ ។ ជនសង្ស័យទី១-ឈ្មោះឡុង ត្រេន ភេទប្រុស អាយុ២៤ឆ្នាំ មានស្រុកកំណើតភូមិកែវក្រសាំង សង្កាត់កែវក្រសាំង ក្រុងកែវក្រសាំង ខេត្តកំពត បច្ចុប្បន្នរស់នៅភូមិត្រពាំងក្រសាំង ឃុំស្រែណូយ ស្រុកវ៉ារិន ខេត្តសៀមរាប ទី២-ឈ្មោះចាន់ រ៉ា ភេទប្រុស អាយុ២៣ឆ្នាំ និងទី៣-ឈ្មោះចាន់ រិទ្ធ ភេទប្រុស អាយុ៤៦ឆ្នាំ ទាំង២នាក់រស់នៅភូមិអូរតាមេង ឃុំអន្លង់វែង ស្រុកអន្លង់វែង ចំណែករថយន្តម៉ាកនីស្សាន់មានដឹកឈើប្រភេទគគីរ ចំនួន៥០ដុំក្នុង១ដុំប្រវែង១ម៉ែត្រ ។
លោកវរសេនីយ៍ត្រី ងួន ទ្ធីរិទ្ធ មេបញ្ជាការកងរាជអាវុធហត្ថស្រុកអន្លង់វែង ឱ្យដឹងថា មុនពេលធ្វើការបង្ក្រាបរថយន្តដឹកឈើនេះ ដោយមានការផ្តល់ព័ត៌មានពីមន្ត្រីអង្គការបរិស្ថានថា មានរថយន្តម៉ាកនីស្សាន់មួយគ្រឿងដឹកឈើគគីរចេញពីតំបន់ក្នុងព្រៃសហគមន៍សាមគ្គីសង្គ្រោះព្រៃឈើអន្លង់វែង។ បន្ទាប់ពីទទួលព័ត៌មានរួចលោកក៏បានចាត់កម្លាំងអាវុធហត្ថដឹកនាំដោយលោកអនុសេនីយ៍ទោ ហ៊ើន សំបោន ចុះបង្ក្រាបចាប់រថយន្តដឹកឈើ និងឃាត់ខ្លួនមនុស្សចំនួន៣នាក់នាំទៅកាន់ទីបញ្ជាការកងរាជអាវុធហត្ថស្រុកអន្លង់វែង ដើម្បីធ្វើការសួរនាំ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ