រាជធានីភ្នំពេញ ៖ តុលាការកំពូលនឹងបើកសវនាកានៅថ្ងៃទី១៩ កញ្ញា ២០១២ ដើម្បីជំនុំជំរះករណីចោទប្រកាន់លោកស្រីសេង ចន្ទដា ភរិយារបស់លោកឧកញ៉ាខូវ ជឺលី ថាជាអ្នកនៅពីក្រោយគម្រោងការសម្លាប់លោកជំទាវស៊ុន សុត្ថា ភរិយារបស់លោកទេសរដ្ឋមន្ត្រីស៊ុន ចាន់ថុល ដែលជាកូនបង្កើតរបស់លោកឧកញ៉ាខូវ ជឺលី និងជនសង្ស័យ៣នាក់ទៀតដែលត្រូវបានចោទថាជាប់ពាក់ព័ន្ធនឹងគម្រោងការសម្លាប់កាលពីថ្ងៃទី១៣ មិថុនា ២០១០ នៅភូមិគ្រឹះលេខ០១បេ ផ្លូវហាណូយ សង្កាត់ទឹកថ្លា ខណ្ឌសែនសុខ រាជធានីភ្នំពេញ ។
ករណីចោទប្រកាន់មួយនេះរហូតមកដល់ពេលនេះបានរីករាលដាលកាន់តែធំឡើងៗនៅក្នុងគ្រួសារត្រកូលខូវ ឥឡូវនេះមានការចោទប្រកាន់រីករាលដាលរហូតដល់លោកឧកញ៉ាខូវ ជឺលី ដែលជាឪពុកបង្កើត លោកឧកញ៉ាខូវ ផល្លាបុត្រប្អូនបង្កើត លោកស្រីឡាយ ហួង និងហ៊ុយ សុខលាប ថាជាអ្នកមេគំនិតរៀបចំគម្រោងសម្លាប់នេះ ។លោកលឹម វណ្ណា មេធាវីការពារក្តីឱ្យលោកស្រីសេង ចន្ទដា បាននិយាយថា ដោយសាលាដំបូងរាជធានីភ្នំពេញ និងសាលាឧទ្ធរណ៍មិនបានផ្តល់យុត្តិធម៌ឱ្យកូនក្តីរបស់ខ្ញុំ ទើបកូនក្តីខ្ញុំប្តឹងសារទុក្ខទៅតុលាការកំពូលរកយុត្តិធម៌ឱ្យ ។ លោកមេធាវីរូបនេះបន្តថា ឥឡូវនេះតុលាការកំពូលបានលើកយកសំណុំរឿងព្រហ្មទណ្ឌនេះមកជំរះនៅថ្ងៃទី១៩ កញ្ញា ២០១២ខាងមុននេះ ហើយខ្ញុំសង្ឃឹមថា តាមរយៈភស្តុតាង សាក្សីដោះបន្ទុក និងសារណា២០ទំព័រ ដែលបានបញ្ជាក់យ៉ាងច្បាស់អំពីអង្គហេតុមិនប្រក្រតីនៃរឿងក្តីនេះ តុលាការកំពូលនឹងផ្តល់យុត្តិធម៌ឱ្យលោកស្រីសេង ចន្ទដា កូនក្តីរបស់ខ្ញុំឱ្យរួចផុតពីការចោទប្រកាន់ ។
លោកមេធាវីបញ្ជាក់ថា បើគិតរហូតមកដល់ពេលនេះ កូនក្តីរបស់ខ្ញុំត្រូវបានឃុំដោយអំពើអយុត្តិធម៌នៅក្នុងពន្ធនាគារព្រៃសអស់រយៈពេលជាង២ឆ្នាំមកហើយ ។លោកកា សាវុធ មេធាវីការពារលោកស្រី សេង ចន្ទដា ដែរនោះបានបញ្ជាក់យ៉ាងខ្លីថា ខ្ញុំមិនធ្វើការបកស្រាយអ្វីវែងឆ្ងាយទេ ខ្ញុំគ្រាន់តែចង់ទាញអារម្មណណ៍សាធារណជនថា តើលោកខូវ ជឺលី មានអាយុ៨៣ឆ្នាំ ដែលជាអ្នកមានប្រាំជំនាន់ហើយ គាត់ខំចិញ្ចឹមបីបាច់កូនទាំង១១នាក់តាំងពីបាតជើងក្រហម រហូតដល់រៀបចំឱ្យមានគូស្រករទៀត តើមានហេតុផលអ្វី ដែលគាត់ត្រូវទៅសម្លាប់កូន និងចៅជាទីស្រឡាញ់របស់ខ្លួននោះ? តើគាត់ធ្វើដើម្បីអ្វី? ចម្លើយគឺគ្មានហេតុផលណាមួយដែលធ្វើឱ្យគេជឿឡើយ ព្រោះលើលោកនេះគ្មានឪពុកណាសម្លាប់កូនបង្កើតរបស់ខ្លួននោះទេ ។
នៅក្នុងសារណា២០ទំព័ររបស់លោកមេធាវី លឹម វណ្ណា និងលោកកា សាវុធ បានបញ្ជាក់ថា នាងចាន់ សុខា និងនាងស៊ីណាត ដែលជាអ្នកបំរើត្រូវបានគេប្រើប្រាស់ឱ្យឆ្លើយទម្លាក់កំហុសមកលើលោកស្រីសេង ចន្ទដា និងបន្ទាប់មកនៅសាលាឧទ្ធរណ៍ក៏ត្រូវបានគេប្រើប្រាស់ឱ្យឆ្លើយប្រឌិតរឿងចោទប្រកាន់ទៅលើលោកឧកញ៉ា ខូវ ជឺលី ជាមនុស្សចាស់ជរាអាយុជាង៨៣ឆ្នាំជាឪពុកបង្កើតរបស់លោកជំទាវស៊ុន ចាន់ថុល ថាជាអ្នករួមគំនិតរៀបចំគម្រោងសម្លាប់កូនបង្កើតរបស់ខ្លួនទៅវិញ ។
លោកមេធាវីនិយាយថា ក្រោយពីសាលាឧទ្ធរណ៍ពុំបានចាត់ការតាមការស្នើសុំរបស់ខ្លួន លោកទេសរដ្ឋមន្ត្រីស៊ុន ចាន់ថុល ក៏បានធ្វើលិខិតចុះថ្ងៃទី៧ ធ្នូ ២០១២ ស្នើសុំទៅរដ្ឋមន្ត្រីក្រសួងយុត្តិធម៌ធ្វើអធិបញ្ជាឱ្យព្រះរាជ្ញាសាលាដំបូងរាជធានីភ្នំពេញធ្វើការចោទប្រកាន់លោកឧកញ៉ាខូវ ជឺលី និងស្នើឱ្យផ្តន្ទាទោសលោកឧកញ៉ាដែលត្រូវជាឪពុកក្មេក ជាឪពុកបង្កើតរបស់ខ្លួន ឱ្យបានតឹងរឹងបំផុតរួមទាំងកូនរបស់ឧកញ៉ាខូវ ជឺលី ៣នាក់ទៀត ។
លោកមេធាវី ទាំង២បានបញ្ជាក់ថា រហូតមកដល់ពេលនេះសំណុំរឿងព្រហ្មទណ្ឌដែលលោកស៊ុន ចាន់ថុល ប្តឹងលោកឧកញ៉ាខូវ ជឺលី មិនទាន់ត្រូវបានព្រះរាជអាជ្ញាសាលាដំបូងរាជធានីភ្នំពេញសម្រេចយ៉ាងណានៅឡើយទេ ។ ដូច្នេះខ្ញុំគិតថាបើសិនជាតុលាការកំពូលសម្រេចរឿងក្តីនេះខុសនោះ រឿងអយុត្តិធម៌ និងភាពគួរឱ្យសង្វេគនឹងកើតមានចំពោះមនុស្សស្លូតត្រង់ជាច្រើននាក់ទៀតរាប់ទាំងចាន់ អង្គារិទ្ធ កូនប្រុសរបស់នាង ចាន់ សុខា នឹងរស់នៅកំព្រាគ្មានឪពុកម្តាយជាទីពឹង តើអនាគតរបស់ក្មេងប្រុសនេះនឹងទៅជាយ៉ាងណា? តែខ្ញុំជឿថាតុលាការកំពូលជាស្ថាប័នយុត្តិធម៌កំពូលរបស់ជាតិ ជាក្តីសង្ឃឹមរបស់ប្រជារាស្ត្រ ប្រាកដជាផ្តល់យុត្តិធម៌ឱ្យកូនក្តីរបស់យើងខ្ញុំ ។
គួររំលឹកដែរថា កន្លងមកសាលាដំបូងរាជធានីភ្នំពេញបានសម្រេចសេចក្តីផ្តន្ទាទោសលោកស្រី សេង ចន្ទដា និងជនសង្ស័យម្នាក់ទៀតឈ្មោះ សុខ ឡាក់ ឱ្យជាប់ពន្ធនាគារម្នាក់ៗចំនួន២០ឆ្នាំ ហើយឈ្មោះចាន់ សុខា និងនាងស៊ីណាត ឱ្យជាប់ពន្ធនាគារម្នាក់ៗ១៨ឆ្នាំ តែឈ្មោះយាន សុធារិទ្ធ ដែលជាជនសង្ស័យដូច សុខ ឡាក់ ដែរត្រូវបានតុលាការលើកលែងការចោទប្រកាន់ ។ ហើយសាលាឧទ្ធរណ៍ក៏សម្រេចតម្កល់សេចក្តីសម្រេចរបស់តុលាការ នៃសាលាដំបូងរាជធានីភ្នំពេញ ទុកជាបានការដដែល ។រឿងក្តីព្រហ្មទណ្ឌមួយនេះ ត្រូវបានមជ្ឍដ្ឋានមហាជនកំពុងតាមដានយ៉ាងយកចិត្តទុកដាក់បំផុត ជាពិសេសមជ្ឍដ្ឋានអ្នកជំនួញធំៗនៅក្នុងប្រទេសកម្ពុជា ចាំមើលតុលាការកំពូលមានសេចក្តីក្លាហាន ហ៊ានវះកាត់រឿងក្តីដ៏ធំនេះយ៉ាងដូចម្តេច ៕
ចែករំលែកព័តមាននេះ