ខេត្តក្រចេះ ៖ រថយន្តដឹកឈើប្រណីតចំនួនពីរគ្រឿង បានត្រូវកម្លាំងកងរាជអាវុធហត្ថស្នាក់ការដឹកនាំដោយលោកវរសេនីយ៍ត្រី មុត វណ្ណៈ នាយស្នាក់ការឃាត់ចាប់ កាលពីព្រឹកថ្ងៃទី១៣ កញ្ញា រួចយកមកប្រគល់ឱ្យមន្ត្រីរដ្ឋបាលព្រៃឈើ ។លោកវរសេនីយ៍ត្រី មុត វណ្ណៈ ថ្លែងថា ក្រោយពីទទួលបានព័ត៌មានច្បាស់ការណ៍ កម្លាំងកងរាជអាវុធហត្ថបានឆ្មក់ចាប់រថយន្តទាំងពីរគ្រឿងនេះនៅក្នុងព្រៃចំណុចភ្នំខ្តាច់ ក្នុងភូមិសាស្ត្រភូមិស្រែត្រែង ឃុំក្បាលដំរី ស្រុកសំបូរ ខណៈពេលរថយន្តទាំងពីរគ្រឿងនេះត្រូវបានឈ្មួញលើកឈើដាក់ពេញព្រៀប និងបម្រុងដឹកចេញ ។
លោកនាយស្នាក់ការសន្តិសុខ៧០៨បញ្ជាក់ថា ការចាប់ឃាត់រថយន្តដឹកឈើទាំងពីរគ្រឿងនេះ គឺសមត្ថកិច្ចពុំបានចាប់ឃាត់ខ្លួនមនុស្សទេ ព្រោះពួកគេដឹងមុន ក៏រត់គេចខ្លួនបាត់អស់បន្សល់ទុកតែរថយន្តដឹកឈើទាំងពីរគ្រឿងដែលមួយគ្រឿងម៉ាកកាមរី ស៊េរីឆ្នាំ១៩៩៣ មានផ្ទុកឈើប្រណីតពេញព្រៀប និងមួយគ្រឿងទៀតម៉ាកកាមរី ស៊េរីឆ្នាំ១៩៩១ មានផ្ទុកឈើពេញព្រៀបដូចគ្នា ។ បន្ទាប់ពីធ្វើការឃាត់ចាប់រថយន្តដឹកឈើទាំងពីរគ្រឿងនេះត្រូវបានកម្លាំងកងរាជអាវុធហត្ថស្នាក់ការ៧០៨ ប្រគល់ទៅឱ្យខាងរដ្ឋបាលព្រៃឈើនៅព្រឹកថ្ងៃដដែលនោះ ភ្លាមៗដែរ ។
លោកសេង សីតារុន នាយសង្កាត់រដ្ឋបាលព្រៃឈើសណ្តានឱ្យដឹងថា ឈើទាំងនេះគឺសុទ្ធសឹងជាឈើប្រណីតប្រភេទធ្នង់មានចំនួនជិតដប់កំណាត់ស្មើនឹងជិត៣ម៉ែត្រគូប ។ ទាំងរថយន្ត និងឈើត្រូវបានមន្ត្រីជំនាញកសាងសំណុំរឿងចាត់វិធានការតាមផ្លូវច្បាប់ និងបាននាំទៅរក្សាទុកនៅស្នាក់ការបណ្តុះកូនឈើខ្សារ ។ គួររំលឹកថា បច្ចុប្បន្ននេះការដឹកជញ្ជូនឈើខុសច្បាប់របស់ក្រុមឈ្មួញទុច្ចរិត គឺមានសកម្មភាពកម្រើកឡើងវិញគួរឱ្យកត់សម្គាល់ ខណៈពេលដែលទីផ្សាររបស់ឈើប្រណីតកំពុងតែមានតម្លៃទីផ្សារខ្ពស់ក្នុងការនាំយកទៅលក់នៅប្រទេសវៀតណាម ។ សកម្មភាពដឹកជញ្ជូនឈើខុសច្បាប់របស់ក្រុមឈ្មួញគេសង្កេតឃើញថា ភាគច្រើនមិនសូវមានជនស៊ីវិលទេ ទើបធ្វើឱ្យសមត្ថកិច្ចញញើតដៃក្នុងការបង្ក្រាប ៕
ចែករំលែកព័តមាននេះ