ខេត្តបន្ទាយមានជ័យ ៖ កាលពីព្រឹកថ្ងៃទី១៣ កញ្ញា ប៉ូលិសជំនាញសណ្តាប់ធ្នាប់ចរាចរណ៍សាធារណៈក្រុងប៉ោយប៉ែតបានចុះរៀបចំសណ្តាប់ធ្នាប់ និងធ្វើការអប់រំណែនាំដល់អាជីវករដែលលក់ដូរតាមដងផ្លូវក៏ដូចជាអ្នកលក់ខ្សាច់ ឥដ្ឋ ថ្មដែលចាក់ហៀរតាមចិញ្ចើមផ្លូវត្រូវឱ្យរុះរើថយឱ្យផុតពីផ្លូវឱ្យបាន៥ម៉ែត្រ ។ លើសពីនេះទៀតសមត្ថកិច្ចជំនាញបានចុះអប់រំដល់អ្នកបើកបររថយន្តជនជាតិថៃតាមរយៈក្រុមហ៊ុនមួយចំនួនក្នុងក្រុងប៉ោយប៉ែតឱ្យបើកបរបន្ថយល្បឿនត្រឹមកុងទ័រ៣០គីឡូម៉ែត្រក្នុង១ម៉ោង ។
ការចុះរៀបចំសណ្តាប់ធ្នាប់ផ្លូវជាតិលេខ៥នេះធ្វើឡើងពីចំណុចរង្វង់មូលច្រកទ្វារអន្តរជាតិប៉ោយប៉ែតភូមិក្បាលស្ពាន១ សង្កាត់ប៉ោយប៉ែតដល់ភូមិផ្សារកណ្តាល សង្កាត់ផ្សារកណ្តាល ក្រុងប៉ោយប៉ែត ។ លោកអនុសេនីយ៍ទោសៅ សារឿន នាយផ្នែកប៉ូលិសចរាចរណ៍សណ្តាប់ធ្នាប់សាធារណៈក្រុងប៉ោយប៉ែតបានប្រាប់ថា ការចុះរៀបចំសណ្តាប់ធ្នាប់តាមដងផ្លូវជាតិ និងដងផ្លូវលំក្នុងក្រុងប៉ោយប៉ែតនេះ សូម្បីតែអ្នកកំពុងសាងសង់ផ្ទះហើយចាក់ខ្សាច់ ថ្ម ឥដ្ឋហៀរលើដងផ្លូវក៏ត្រូវអប់រំណែនាំឱ្យកាយផុតពីដងផ្លូវផងដែរ។ លោកបន្តថា ក្រៅពីការអប់រំណែនាំអាជីវកររួចហើយ កម្លាំងរបស់លោកក៏បានចុះអប់រំក្រុមហ៊ុនចំនួន៩ដែលក្រុមហ៊ុនទាំងនេះមានរថយន្តចេញចូលពីប្រទេសថៃជាប្រចាំឱ្យណែនាំដល់អ្នកបើកបរថយន្តជនជាតិថៃទាំងនោះត្រូវបន្ថយល្បឿនត្រឹមកុងទ័រ៣០គីឡូម៉ែត្រក្នុងមួយម៉ោង ខណៈចូលមកដល់ទឹកដីខ្មែរ ។
លោកសៅ សារឿន ប្រាប់ថា ក្រុមការងាររបស់លោកបានចុះអនុវត្តគោលការណ៍នេះតាមបទបញ្ជា និងការចង្អុលបង្ហាញ ពីលោកវរសេនីយ៍ត្រីអ៊ុំ សុផល អធិការនគរបាលក្រុងប៉ោយប៉ែតដើម្បីកែលម្អសោភ័ណភាពក្រុងប៉ោយប៉ែត និងកាត់បន្ថយការគ្រោះថ្នាក់ចរាចរណ៍ ៕
ចែករំលែកព័តមាននេះ