រាជធានីភ្នំពេញ ៖ លោកនុត ពុធដារ៉ា អភិបាលខណ្ឌដង្កោ បានអញ្ជើញជាអធិបតីក្នុងពិធីសម្ពោធដាក់ឱ្យប្រើប្រាស់ផ្លូវក្រាលថ្ម១ខ្សែប្រវែង១.៤០០ម៉ែត្រ និងទទឹងប្រវែង៥ម៉ែត្រដែលមានទីតាំង ស្ថិតក្នុងភូមិខ្វា សង្កាត់ដង្កោ ខណ្ឌដង្កោ ។ ពិធីសម្ពោធផ្លូវខាងលើនោះប្រព្រឹត្តទៅកាលពីព្រឹកថ្ងៃទី១៥ កញ្ញា ២០១២ ដោយមានការចូលរួមពីសំណាក់មន្ត្រីរាជការសាលាខណ្ឌដង្កោ និងអាជ្ញាធរសង្កាត់ ព្រមទាំងប្រជាពលរដ្ឋជាច្រើនទៀត ។
អាជ្ញាធរសង្កាត់ដង្កោបានឱ្យដឹងថា ផ្លូវ១ខ្សែនេះស្ថាបនាឡើងដោយមានចាក់ក្រាលថ្មមិចចំណាយអស់ថវិកាចំនួន៥.២៧២ដុល្លារ ដែលទើបស្ថាបនារួចរាល់ក្នុងពេលថ្មីៗនេះ ដើម្បីសម្រួលដល់ការធ្វើដំណើររបស់បងប្អូនប្រជាពលរដ្ឋនៅក្នុងភូមិខ្វា ព្រមទាំងអ្នកភូមិដែលស្ថិតនៅក្បែរៗនោះផងដែរ ។
លោកអភិបាលខណ្ឌដង្កោ បានមានប្រសាសន៍ថា សព្វថ្ងៃប្រទេសកម្ពុជា ក្រោមការដឹកនាំប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីមានការរីកចម្រើនយ៉ាងខ្លាំងលើគ្រប់វិស័យទាំងវិស័យហេដ្ឋារចនាសម្ព័ន្ធ និងវិស័យនានាជាច្រើនទៀត ។ ដោយឡែកខណ្ឌដង្កោបានអនុវត្តតាមយុទ្ធសាស្ត្រចតុកោណរបស់រាជរដ្ឋាភិបាល ដោយបានខិតខំអនុវត្តផែនការអភិវឌ្ឍន៍មូលដ្ឋានរបស់ខ្លួន ដើម្បីរួមចំណែកជាមួយរាជរដ្ឋាភិបាល ហើយវិស័យហេដ្ឋារចនាសម្ព័ន្ធ គឺជាសរសៃឈាមដ៏សំខាន់សម្រាប់សម្រួលដល់ការធ្វើដំណើរប្រកបរបររកស៊ីរបស់បងប្អូនប្រជាពលរដ្ឋ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ