ខេត្តកំពង់ស្ពឺ ៖ យ៉ាងហោចណាស់មានជនជាតិកូរ៉េ២នាក់បានស្លាប់ និងម្នាក់ទៀតរងរបួសធ្ងន់ក្នុងឧប្បត្តិហេតុផ្ទុះកង់រថយន្តឡង់គ្រីស្ស័រពណ៌ខ្មៅក្រឡាប់ជាច្រើនត្រឡប់ កាលពីវេលាម៉ោង៦និង៣០នាទីល្ងាច ថ្ងៃទី១៣ កញ្ញា នៅលើកំណាត់ផ្លូវលំលេខ៤២ ពីក្រុងច្បារមនទៅស្រុកឱរ៉ាល់ ខណៈរថយន្តនេះបើកចេញពីក្រុមហ៊ុនមួយនៅឃុំហោងសំណំ ស្រុកឱរ៉ាល់ ។
មន្ត្រីប៉ូលិសបានឱ្យដឹងថា មុនពេលកើតហេតុរថយន្តនេះបានបើកចេញពីឃុំហោងសំណំឆ្ពោះទៅក្រុងច្បារមន ពេលមកដល់ចំណុចមុខខ្លោងទ្វារចូលវត្តអង្គចំណោមមានជ័យ ស្ថិតក្នុងភូមិផ្គង់ សង្កាត់ច្បារមន ក្រុងច្បារមន រថយន្តបានផ្ទុះកង់ឆ្វេងផ្នែកខាងមុខ ក៏ក្រឡាប់ជាច្រើនត្រឡប់ បណ្តាលឱ្យអ្នកនៅក្នុងរថយន្តនោះបោកក្បាលស្លាប់២នាក់ និងម្នាក់ទៀតត្រដរលូនចេញតាមទ្វាររថយន្តត្រូវសមត្ថកិច្ចបញ្ជូនទៅមន្ទីរពេទ្យឯរាជធានីភ្នំពេញទាំងយប់ ។
សាក្សីបាននិយាយថា រថយន្តនេះបើកលឿនដូចហោះទើបបែកកង់ហើយក្រឡាប់ជាច្រើនត្រឡប់បង្កគ្រោះថ្នាក់បែបនេះ ។ មន្ត្រីប៉ូលិសបានប្រាប់ថា អ្នករបួសឈ្មោះ ចាង យុនហូ (CHANG YUN HO) ពុំស្គាល់អាសយដ្ឋានទេត្រូវបញ្ជូនទៅមន្ទីរពេទ្យកាល់ម៉ែត ដែលតាមឯកសារយកពីកន្លែងកើតហេតុឈ្មោះនេះជាប្រធានក្រុមហ៊ុនអង្គរគ្រីតផាក ។ចំណែក២នាក់ទៀតបានស្លាប់តែពុំស្គាល់ឈ្មោះ ជាជនជាតិកូរ៉េត្រូវបានបញ្ជូនសពទៅរក្សាទុកនៅមន្ទីរពេទ្យបង្អែកខេត្តកំពង់ស្ពឺ រង់ចាំក្រុមគ្រួសារមកទទួល ៕
ចែករំលែកព័តមាននេះ