ខេត្តព្រះវិហារ ៖ ពលរដ្ឋខ្មែរម្នាក់បានរងរបួសជាទម្ងន់ក្នុងចំណោមគ្នីគ្នា៤០នាក់ ដែលរងការបាញ់ប្រហារពីសំណាក់ទាហានសៀម ត្រូវចំខ្នងធ្លាយមកពោះ ។ ហេតុការណ៍នេះបានកើតឡើងកាលពីវេលាម៉ោង៨ព្រឹកថ្ងៃទី១២ កញ្ញា ខណៈប្រជាពលរដ្ឋខ្មែរប្រមាណ៤០នាក់លួចឡើងទៅលើខ្នងភ្នំដងរែកខាងកើតច្រកអានសេះ ក្នុងស្រុកជាំក្សាន្ត ចូលក្នុងទឹកដីសៀមកាប់ឈើគ្រញូង ប៉ុន្តែទើបចូលដល់ដីសៀមបានជម្រៅប្រហែល១គីឡូម៉ែត្រ ក៏ត្រូវទាហានសៀមបាញ់រះមកលើតែម្តង ។
តាមប្រភពព័ត៌មានថា ពេលនោះពលរដ្ឋខ្មែរទាំងអស់នេះបានរត់យកតែប្រាសអាយុរៀងៗខ្លួន ចំណែកអ្នករងគ្រោះត្រូវបានអ្នករត់តាមក្រោយឃើញដួលសន្លប់ក៏នាំគ្នាចាប់អូសរត់មកដល់ចំណុចស ក្នុងដីខ្មែរ ទើបនាំគ្នាសែងចុះពីលើភ្នំនាំយកមកកាន់មណ្ឌលសុខភាពស្រុកជាំក្សាន្ត និងបញ្ជូនបន្តមកមន្ទីរពេទ្យបង្អែក១៦មករា ក្រុងព្រះវិហារនៅវេលាម៉ោង៨យប់ថ្ងៃដដែល ។ បុរសដែលរងរបួសនេះ ឈ្មោះស្រី សំណាង អាយុ៣១ឆ្នាំ រស់នៅស្រុកពារាំង ខេត្តព្រៃវែង ត្រូវបានក្រុមគ្រូពេទ្យសង្គ្រោះ និងធ្វើការវះកាត់នៅក្នុងមន្ទីរពេទ្យបង្អែក១៦មករា ក្រុងព្រះវិហារ ។
ជុំវិញពលរដ្ឋខ្មែរប្រមាណ៤០នាក់ លួចឡើងភ្នំដងរែកចូលដីសៀមកាប់ឈើគ្រញូងនេះបើតាមបុរសឈ្មោះឡេង សាក់ ត្រូវជាបងថ្លៃជនរងគ្រោះ រស់នៅភូមិសែនរុងរឿង២ ឃុំទឹកក្រហម ស្រុកជាំក្សាន្ត ឱ្យដឹងថា ជនរងគ្រោះជាប្អូនថ្លៃគាត់បានមកពីស្រុកជាមួយឪពុកក្មេក និងស្នាក់នៅជាមួយគាត់បាន៣ថ្ងៃ ក៏ឮថាមានគេបបួលឡើងភ្នំ ។ ពេលនោះរូបគាត់មិនបានចាប់អារម្មណ៍ទេ លុះដល់ព្រឹកថ្ងៃកើេតហេតុ ទើបដឹងថាប្អូនថ្លៃត្រូវរបួសនៅលើខ្នងភ្នំ ក៏នាំគ្នាឡើងភ្នំនៅចំណុចខាងកើតច្រកអានសេះ ចំណុចកម្ពស់៧៦០ម៉ែត្រទៅសែងប្អូនថ្លៃចុះពីលើភ្នំ តាមផ្លូវចាស់ដែលពួកសៀមធ្វើសម្រាប់ដឹកឈើពីក្នុងទឹកដីកម្ពុជានៅក្នុងឆ្នាំ១៩៩០ ។
តាមការបញ្ជាក់ពីអ្នករត់រួចជីវិតឱ្យដឹងថា ពួកគេមិនទាន់ដឹងថាបាត់ខ្លួនប៉ុន្មាននាក់នៅឡើយទេ ព្រោះពេលរត់មកវិញ ឃើញតែមួយចំនួននៅបាត់មួយចំនួនទៀត ។ ឯការចូលដីសៀមនេះគឺស៊ីឈ្នួលកាប់ឈើគ្រញូងយកមកលក់ឱ្យថៅកែម្នាក់ឈ្មោះរិទ្ធ រស់នៅភូមិធម្មជាតិ ។
ពាក់ព័ន្ធនឹងការលួចឆ្លងដែនខុសច្បាប់ចូលដីសៀមរហូតដល់មានគ្រោះថ្នាក់នេះត្រូវបាន លោកឧត្តមសេនីយ៍ត្រីសោម បុប្ផារ័ត្ន មេបញ្ជាការតំបន់ប្រតិបត្តិការសឹករងព្រះវិហារទទួលទិសព្រំដែនក្នុងតំបន់ច្រកទ្វារអានសេះប្រាប់កោះសន្តិភាពតាមទូរស័ព្ទថា ករណីពលរដ្ឋខ្មែរលួចឡើងភ្នំឆ្លងដែនតាមព្រៃនៅក្នុងភូមិសាស្ត្ររបស់លោកគ្រប់គ្រង គឺមិនមានទេ តែបើពួកគេលួចឡើងចំណុចផ្សេង លោកក៏មិនអាចដឹងបានដែរ ។ លោកឧត្តមសេនីយ៍បញ្ជាក់ថា កងកម្លាំងរបស់លោក ដែលប្រចាំការតាមចំណុចឈរជើងមិនមានឃើញពលរដ្ឋខ្មែរណាម្នាក់ឡើងតាមភូមិសាស្ត្រនោះឡើយ ។
ចំណែក ឈ្មោះរិទ្ធ ដែលជាអ្នកប្រមូលទិញឈើគ្រញូងក្នុងភូមិធម្មជាតិបានប្រាប់កោះសន្តិភាពតាមទូរស័ព្ទថា លោកពិតជាមានកម្មករជាង២០នាក់ ក្នុងការឡើងកាប់ឈើគ្រញូងនៅតំបន់ច្រកអានសេះប្រាកដមែន តែកម្មករដែលស៊ីឈ្នួលលោកមិនមានអ្នកណាម្នាក់បាត់ខ្លួនទេ គឺត្រឡប់មកវិញអស់ហើយ ៕
ចែករំលែកព័តមាននេះ