រាជធានីភ្នំពេញ ៖ កម្មការិនីរោងចក្រកាត់ដេរយីហោអេកអិលអឹភើរឹលចំនួនជាង៥០នាក់បានដួលសន្លប់ជាបន្តបន្ទាប់ និងត្រូវបានគេបញ្ជូនទៅកាន់មន្ទីរពេទ្យព្រះកុសុមៈ ដើម្បីសង្គ្រោះបន្ទាន់ ហើយមូលហេតុនៃការដួលសន្លប់នោះមិនទាន់ត្រូវបានគេដឹងនៅឡើយទេ ។ ហេតុការណ៍នោះ បានកើតឡើងកាលពីវេលាម៉ោង១និង៣០នាទីរសៀលថ្ងៃទី១៣ កញ្ញាដែលរោងចក្រកាត់ដេរខាងលើនោះមានទីតាំងស្ថិតនៅក្នុងភូមិក្បាលដំរី សង្កាត់កាកាប ខណ្ឌពោធិ៍សែនជ័យ ។
តាមប្រភពព័ត៌មានបានឲ្យដឹងថា នៅមុនពេលកើតហេតុក្រុមកម្មការិនីខាងលើបាននាំគ្នាធ្វើការងារតាំងពីព្រឹកមិនមានបញ្ហាអ្វីកើតឡើងនោះទេ ហើយពួកគេបានធ្វើការរហូតដល់ថ្ងៃត្រង់ទើបនាំគ្នាចេញហូបបាយ និងសម្រាកបានមួយសន្ទុះក៏ដល់ម៉ោងចូលធ្វើការវិញ ។ លុះពេលចូលធ្វើការបានរយៈពេលជាងមួយម៉ោងប៉ុណ្ណោះ មានកម្មការិនីម្នាក់ដែលកំពុងអង្គុយដេរសុខៗស្រាប់តែប្រកាច់ធ្លាក់ពីកៅអីទៅក្រោមតុម៉ាស៊ីនដេររួចក៏សន្លប់បាត់ស្មារតីតែម្តង ។ បន្ទាប់ពីមានហេតុការណ៍បែបនេះកើតឡើងបានធ្វើឲ្យមានការជ្រួលច្របល់ពេញរោងចក្រហើយកម្មការិនីដែលស្ថិតនៅក្បែរនោះមានការភ័យតក់ស្លុតក៏បានដួលសន្លប់ជាបន្តបន្ទាប់គ្នា ឯអ្នកខ្លះទៀតដែលមិនទាន់សន្លប់បាននាំគ្នារត់សម្រុកចេញពីរោងចក្រទាំងភ័យស្លន់ស្លោបំផុត ។ ក្រោយពេលកើតហេតុកម្មការិនីដែលសន្លប់ទាំងនោះត្រូវបានគេហៅរថយន្តសាមុយដឹកទៅកាន់មន្ទីរពេទ្យព្រះកុសុមៈ និងមន្ទីរពេទ្យផ្សេងៗទៀត ដើម្បីសង្គ្រោះភ្លាមៗដែរ ។
ប្រភពដដែលបានបន្តថា គេមិនទាន់ដឹងពីមូលេហតុនៃការដួលសន្លប់នោះនៅឡើយទេ ហើយកម្មការិនីដែលដួលសន្លប់នោះភាគច្រើន ស្ថិតនៅផ្នែកដេរមិនសូវមានផ្នែកផ្សេងៗក្រៅពីនោះទេ ។ ប៉ុន្តែទោះបីបែបណាគេមានការសង្ស័យថា ការសន្លប់នោះបណ្តាលមកពីបរិយាកាសនិងបរិស្ថាននៅក្នុងបរិវេណរោងចក្រនោះមិនល្អ ឬបណ្តាលមកពីក្លិនជាតិគីមីនៅក្នុងក្រណាត់ផង គួបផ្សំនឹងការធ្វើការថែមម៉ោងហួសកម្លាំងផងដែរ ។
កម្មការិនីទាំងនោះបាននិយាយថា ពួកគេមានអាការងងឹតមុខតឹងទ្រូងថប់ដង្ហើមនិងទន់ដៃជើង បន្ទាប់មកក៏បានដួលសន្លប់លែងដឹងខ្លួន ខ្លះទៀតរកកលចង់ក្អួតចង្អោរពិបាកទ្រាំថែមទៀតផង មិនដឹងថាបណ្តាលមកពីមូលហេតុអ្វីនោះឡើយ ។
តាមប្រភពពីមន្ទីរពេទ្យព្រះកុសុមៈបានឲ្យដឹងថា នៅក្នុងមន្ទីរពេទ្យនោះមានការបញ្ជូនកម្មការិនីទៅសង្គ្រោះចំនួន៣២នាក់ ក្នុងនោះមានបុរសម្នាក់ផងដែរ ឯមួយចំនួនទៀត គឺយកទៅកាន់មន្ទីរពេទ្យផ្សេងទៀត ។ បន្ទាប់ពីបញ្ជូនទៅដល់ទីនោះក្រុមគ្រូពេទ្យបានធ្វើការជួយសង្គ្រោះយ៉ាងដុតដៃដុតជើងទើបកម្មការិនីរងគ្រោះមួយចំនួនមានអាការធូរស្រាលឡើងវិញតែក្នុងរយៈពេលមួយម៉ោងក្រោយប៉ុណ្ណោះ ។ ទោះបីយ៉ាងណា ទាក់ទិនទៅនឹងហេតុការណ៍នោះក្រុមគ្រូពេទ្យនៅមិនទាន់បញ្ជាក់ពីមូលហេតុនៅឡើយទេ ៕
ចែករំលែកព័តមាននេះ