ខេត្តតាកែវ ៖ ជាមួយនឹងចំនួនសាកលវិទ្យាល័យឯកជនបានកើនឡើងជាលំដាប់នោះចំនួនសិស្សដែលបានប្រឡងជាប់សញ្ញាបត្រមធ្យមសិក្សាជារៀងរាល់ឆ្នាំក៏មានការកើនឡើងដែរទាំងបឋមភូមិនិងទុតិយភូមិ ។
លោក នុត ខុន ប្រធានមន្ទីរអប់រំយុវជន និងកីឡាខេត្តមានប្រសាសន៍ថា បេក្ខជនប្រឡងយកសញ្ញាបត្រមធ្យមសិក្សាឆ្នាំ២០១១និង២០១២នេះ យើងសម្រេចបានផ្នែកបឋមភូមិ(ឌីប្លូម)នៅឆ្នាំ២០១១មកចុះឈ្មោះ១១.៤៥៥នាក់ (ស្រី៥.០០៤នាក់) មកប្រឡង១១.២៥៦នាក់ (ស្រី៤.៩២០នាក់) ប្រឡងជាប់ចំនួន១០.៥១៧នាក់ (ស្រី៤.៧៤៨នាក់) គិតជាភាគរយស្មើ៩៣,៤៣% ។ នៅឆ្នាំ២០១២ ផ្នែកបឋមភូមិដដែល បេក្ខជនមកចុះឈ្មោះ១០.៤៦០នាក់ (ស្រី៤.៦២៣នាក់) បេក្ខជនមកប្រឡងចំនួន១០.២៣៥នាក់ (ស្រី៤.៥២០នាក់) បេក្ខជនប្រឡងជាប់៩.៦៨១នាក់ (ស្រី៤.៣៩៨នាក់) ស្មើ៩៤,៥៩% ។
លោកប្រធានមន្ទីរអប់រំយុវជន និងកីឡាខេត្តបានបន្តទៀតថា ចំពោះលទ្ធផលនៃការប្រឡងយកសញ្ញាបត្រមធ្យមសិក្សាទុតិយភូមិ(បាក់ឌុប)នៅឆ្នាំ២០១១ បេក្ខជនមកចុះឈ្មោះមាន១០.០២៥នាក់ (ស្រី៣.៧៥០នាក់)មកប្រឡង៩.៨៦១នាក់ (ស្រី៣.៦៩២នាក់)បេក្ខជនប្រឡងជាប់ចំនួន៨.១១១នាក់ (ស្រី៣២៥២នាក់) ស្មើ៨២,២៥% ។ ចំណែកនៅឆ្នាំ២០១២នេះ បេក្ខជនមកចុះឈ្មោះ១០.៣១៧នាក់ (ស្រី៤.១៤០នាក់) មកប្រឡង១០.២៧៩នាក់ (ស្រី៤.១៣៦នាក់) បេក្ខជនប្រឡងជាប់៩.៣៣៨នាក់ (ស្រី៣.៩៤១នាក់) ។ បើប្រៀបធៀបទៅនឹងឆ្នាំ២០១១ សិស្សដែលប្រឡងជាប់ក្នុងឆ្នាំ២០១២ នេះគឺជាប់លើសជាង១.០០០នាក់ឯណោះ ស្មើនឹង៩០,៨៥% ។
លោកនុត ខុន បញ្ជាក់ថា សិស្សដែលប្រឡងជាប់ហើយទទួលបាននិទ្ទេសល្អក៏មានចំនួនកើនឡើងដែរ ក្នុងនោះនិទ្ទេសAមានចំនួន៣នាក់ (ស្រីម្នាក់) និទ្ទេសBមាន១៨៤នាក់ (ស្រី៩២នាក់) និទ្ទេសCមានចំនួន១.៦៥៨នាក់ (ស្រី៨៨៨នាក់) និទ្ទេសDមានចំនួន៣.៨៨៧នាក់ (ស្រី១.៧៦៥នាក់) និទ្ទេសEមានចំនួន៣.៦០៦នាក់ (ស្រី១.១៩៥នាក់) ។ នេះជាចំនួនមួយដ៏ល្អ ព្រោះសិស្សដែលខិតខំរៀនសូត្រនឹងទទួលបានលទ្ធផលបែបនេះ ៕
ចែករំលែកព័តមាននេះ