ខេត្តស្ទឹងត្រែង ៖ ផ្ទះសង់ពីឈើប្រក់ដែកស័ង្កសីទំហំ៥ម៉ែត្រ ទទឹង៦ម៉ែត្រមួយខ្នងបានដួលរលំបះជើងឡើងលើខូចខាតទាំងស្រុងដោយសារព្យុះភ្លៀងមួយប្រាវកាលពីវេលាម៉ោង១០និង២៥នាទីយប់ថ្ងៃទី១០ កញ្ញា ២០១២ នៅចំណុចអូរខ្លុង ភូមិរាជានុកូល សង្កាត់ស្ទឹងត្រែង ។
បុរសហេង យិន អាយុ៣៨ឆ្នាំ ជាកម្មករស្នាក់នៅស៊ីឈ្នួលដាំដំឡូងនៅក្នុងដីឡូត៍របស់ប្រជាពលរដ្ឋម្នាក់នៅក្នុងខេត្តស្ទឹងត្រែង បានរៀបរាប់ថា នៅវេលាខាងលើមានភ្លៀងខ្យល់ខ្លាំង រូបខ្លួនជាប់រវល់ក្នុងពិធីបុណ្យសពអ្នកភូមិ ចំណែកប្រពន្ធ និងកូនសម្រាកនៅក្នុងផ្ទះដោយមិនដឹងថា មានភ្លៀង និងខ្យល់ខ្លាំងបណ្តាលឱ្យប៉ើងផ្ទះទាំងដុលតែមិនបណ្តាលឱ្យកូន និងប្រពន្ធរងរបួសទេ ។
ស្ត្រីយី ចាន់ថេង អាយុ៣៧ឆ្នាំ ត្រូវជាប្រពន្ធបរបស់បុរសខាងលើបានប្រាប់បន្ថែមថា ខ្លួនគ្រាន់ជាអ្នកស៊ីឈ្នួលដាំដំឡូងឱ្យគេប៉ុណ្ណោះ នៅពេលកើតហេតុខ្លួនរួមជាមួយនឹងកូនតូចៗបីនាក់ទៀតកំពុងសម្រាកនៅលើផ្ទះហើយមេឃក៏ចាប់ធ្លាក់ភ្លៀងខ្លាំង និងខ្យល់ខ្លួនបានប្រឹងបើកទ្វារនាំកូនចេញក្រៅតែទ្វារមិនអាចបើកបានរហូតធ្វើឱ្យដួលរលំ និងប៉ើងដូចបាល់ខ្លួនក៏បាននាំកូនលូនចេញពីក្នុងផ្ទះនោះមកវិញ តែមិនបណ្តាលឱ្យអ្នកណាម្នាក់រងរបួសអ្វីឡើយ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ