ខេត្តបាត់ដំបង ៖ អតីតទណ្ឌិតម្នាក់ត្រូវកម្លាំងការិយាល័យប្រឆាំងគ្រឿងញៀន នៃស្នងការដ្ឋាននគរបាលខេត្តចាប់ខ្លួនជាថ្មីទៀតកាលពីព្រឹកថ្ងៃទី១០ កញ្ញា ២០១២ ក្នុងគ្រាដែលកំពុងដោះដូរថ្នាំញៀននៅចំណុចចំណតរថយន្តផ្សារបឹងឈូក ក្នុងសង្កាត់ស្វាយប៉ោ ក្រុងបាត់ដំបង ដែលជននេះទើបចេញពីគុកខេត្តបន្ទាយមានជ័យ បាន១០ថ្ងៃប៉ុណ្ណោះ ក្រោយពីត្រូវជាប់គុកចំនួនជាង៦ឆ្នាំរួចមក ។
មន្ត្រីនគរបាលការិយាល័យប្រឆាំងគ្រឿងញៀនបានឱ្យដឹងថា ជនសង្ស័យឈ្មោះអាន កូស៊ីន អាយុ២៨ឆ្នាំ នៅភូមិព្រៃទទឹង ឃុំជ្រៃ ស្រុកថ្មគោល ជាអតីតទណ្ឌិតធ្លាប់ជាប់គុកនៅខេត្តបន្ទាយមានជ័យ ។ សមត្ថកិច្ចនិយាយថា ជននេះត្រូវបានឃាត់ខ្លួននៅចំណុចចំណតរថយន្តផ្សារបឹងឈូក ក្នុងក្រុងបាត់ដំបង ខណៈដែលកំពុងដោះដូរថ្នាំញៀន ហើយត្រូវបានរឹបអូសថ្នាំញៀនមេតំហ្វេតាមីនប្រភេទ «ទឹកកក»ចំនួន១កញ្ចប់តូចជាវត្ថុតាង ។
ក្រោយពេលត្រូវចាប់ខ្លួនអតីតអ្នកទោសខេត្តបន្ទាយមានជ័យ ឈ្មោះអាន កូស៊ីន បាននិយាយថា ខ្លួនធ្លាប់ជាប់គុកនៅខេត្តបន្ទាយមានជ័យ ចំនួនជាង៦ឆ្នាំពីបទ «ប្លន់ប្រេង» ហើយខ្លួនទើបចេញពីគុកបានប្រហែល១០ថ្ងៃ ដោយមិនទាន់បានចូលផ្ទះផង ក៏ត្រូវសមត្ថកិច្ចខេត្តបាត់ដំបងចាប់ខ្លួនជាថ្មីម្តងទៀតពាក់ព័ន្ធនឹងថ្នាំញៀន ។ ជននេះបានសារភាពថា ពេលខ្លួនចេញពីពន្ធនាគារខេត្តបន្ទាយមានជ័យ ខ្លួនបាននាំយកថ្នាំញៀននេះចេញមកជាមួយ មានន័យថា ជននេះបាននាំយកថ្នាំញៀនចេញពីគុកខេត្តបន្ទាយមានជ័យ លុះពេលបានត្រូវដោះលែងក៏យកមកលក់នៅខេត្តបាត់ដំបងជាថ្មីទៀត ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ