ខេត្តកំពង់ស្ពឺ ៖ ព្រះអនុគណស្រុកគងពិសីនាមសូ ចាន់ គង់នៅវត្តសាលព្រឹក្ស ហៅវត្តខ្នា ស្រុកគងពិសី កាលពីថ្ងៃទី៨ កញ្ញា បានទទួលសំបុត្រអនាមិកមួយបានសរសេរគំរាមមានខ្លឹមសារថា ខ្លួននឹងបរិហាកេរ្តិ៍ឱ្យអស់ពីអនុគណសង្ឃស្រុកគងពិសី ហើយដើម្បីជាថ្នូរកុំឱ្យលេចឮនោះត្រូវលោកប្រគល់ប្រាក់១៥០ដុល្លារឱ្យពួកខ្លួន បើពុំដូចនោះទេពួកគេនឹងធ្វើការបំផ្លាញកុដិបំផ្លាញវត្តអារាម ដោយគប់គ្រាប់បែកសម្លាប់នៅក្នុងវត្តសាលព្រឹក្ស ហើយពួកខ្លួនរត់ចូលព្រៃពុំអាចរកឃើញឡើយ ។
ការគំរាមតាមរយៈសំបុត្រនេះត្រូវបានព្រះអនុគណសូ ចាន់ បានរាយការណ៍ដល់សមត្ថកិច្ចនិងអាជ្ញាធរដែនដីមានមន្ត្រីប៉ូលិស កងរាជអាវុធហត្ថស្រុករួមទាំងលោកអភិបាលស្រុកគងពិសីផងដែរដើម្បីស្វែងរកម្ចាស់សំបុត្រគំរាមនេះ ព្រោះលោកមិនធ្លាប់មានរឿងជាមួយឧបាសកឧបាសិកាណាម្នាក់ឡើយ ។
ព្រះេតជគុណសូ ចាន់មានថេរដីការថា ទំនងជារឿងទំនាស់មួយទាក់ទិននឹងអាស្រមប្រាសាទថ្មរាប ជ្រោះចេក នៅស្រុកគងពិសីរឿងទំនាស់ទៅនឹងការសាងសង់អាស្រមប្រាសាទថ្មរាប ជ្រោះចេកនេះ លោកតាអាចារ្យហោ គុណ អាយុ៧៩ឆ្នាំ ជាអ្នកផ្តួចផ្តើមសុំដីកសាងអាស្រមនេះតាំងពីឆ្នាំ១៩៩៩ ត្រូវបានអភិបាលស្រុកគងពិសី ធម្មការស្រុកនិងឧបាសកឧបាសិកាជាច្រើនបានគាំទ្រ ។ តាអាចារ្យបានរៀបរាប់ថា ការសាងសង់អាស្រមប្រាសាទថ្មរាបនៅជ្រោះចេកនេះស្ថិតនៅលើទឹកដីភូមិបឹង ឃុំស្រង់ ស្រុកគងពិសី ដោយមានការឯកភាពប្រគល់ឱ្យធ្វើទីតាំងអាស្រមនេះលើផ្ទៃដីទំហំ៩០mទៅទល់ជើងភ្នំដែលនៅមានព្រៃឈើ ។ ដូច្នេះការសាងសង់កន្លងទៅបានសម្រេចលើប្រាសាទថ្មមួយទំហំ4mX4m(បួនជ្រុង)ធ្វើសាលាឆាន់ទំហំ12mX21mហើយជាស្ថាពរ និងធ្វើព្រះវិហារទំហំ6mX9mពុំទាន់ចាក់ដី មានកុដិសង់ពីថ្មទំហំ2mX3m ជាអាស្រមក្បែរសាលាឆាន់ រួមទាំងការសង់បង្គន់អនាម័យចំនួន២ដោយធ្វើប្រព័ន្ធលូទឹកផង ។ ដូច្នេះការសុំកសាងអាស្រមប្រាសាទថ្មរាបនេះនៅជ្រោះចេកស្រុកគងពិសីបានសាងសង់តាំងពីឆ្នាំ១៩៩៩មក គឺសម្រេចសមិទ្ធផលដូចខាងលើបន្តអភិវឌ្ឍន៍រហូតឆ្នាំ២០១២នេះ ។
លោកតាអាចារ្យហោ គុណ បន្តថា ដោយពុំមានភាពកក់ក្តៅដិតដល់ក្នុងការងារទទួលឧបាសកឧបាសិកាចូលទៅធ្វើបុណ្យសំណាក់ធម៌នៅទីនោះក៏សម្រេចឯកភាពឱ្យឈ្មោះប្រាក់ ច្រេស បួសជាសង្ឃគង់ចាំអារាម និងអាស្រមនោះរហូតមក តែសង្ឃអង្គនោះពុំគោរពគោលការណ៍ជាសង្ឃតែងនាំប្រពន្ធកូនមកគ្រប់គ្រងបច្ច័យពីបុណ្យទាន ពុំព្រមកសាងបន្ត ហើយនាំប្រពន្ធរស់នៅលើអាស្រមនេះទៀតទើបអំឡុងដើមឆ្នាំ២០១២នេះសង្ឃប្រាក់ ច្រេសត្រូវព្រះធម្មវិន័យចូលរួមបានឯកភាពផ្សឹកជាគ្រហស្តវិញ ។ ប៉ុន្តែដោយមានការសណ្តោសផងព្រះតេជគុណសូ ចាន់ អនុគណស្រុកអនុញ្ញាតិសុំឱ្យតែចេញពីអាស្រមមកកាន់វត្តសាលព្រឹក្សហៅវត្តខ្នាជិតគ្នាគ្រាន់បានណែនាំពីវិន័យធម៌ឡើងវិញ ។ ប៉ុន្តែប្រាក់ ច្រេស ពុំព្រមសឹក និងពុំព្រមចាកចេញពីអាស្រមប្រាសាទថ្មរាបនោះទេហើយថែមទាំងបិទទ្វារវត្តពុំឱ្យឧបាសកឧបាសិកាចូលធ្វើបុណ្យទានរហូតតាំងពីចូលព្រះវស្សាមក ពុំមានអ្នកណាចូលវត្តបានឡើយនិងបានគំរាមទាំងព្រះតេជគុណសូ ចាន់ ពុំឱ្យនិមន្តទៅជិតអាស្រមទៀតផង។ រឿងរ៉ាវទំនាស់ក្នុងមូលហេតុគ្រប់គ្រងអាស្រមប្រាសាទថ្មរាបជ្រោះចេកនេះនៅតែបន្តភាពតានតឹងរហូតពុំអាចដោះស្រាយបានទើបថ្ងៃទី៨ កញ្ញា ក៏ឃើញមានគេនាំលិខិតគំរាមមួយប្រគល់ដល់ព្រះអនុគណសូ ចាន់ ទារប្រាក់១៥០ដុល្លារជាថ្នូរនិងការមិនបរិហាកេរ្តិ៍រួមទាំងការយកគ្រាប់បែកគប់កម្ទេចអារាមទៀត ។ ទាក់ទិននិងសំបុត្រគំរាមដល់ព្រះអនុគណនេះរហូតមកដល់ថ្ងៃនេះអាជ្ញាធរស្រុកកំពុងតាមស្រាវជ្រាវនៅឡើយ ៕
ចែករំលែកព័តមាននេះ