ខេត្តបន្ទាយមានជ័យ ៖ ស្របពេលនៅខេត្តស្រះកែវប្រទេសថៃដែលមានភូមិសាស្ត្រជាប់គ្នាតាមព្រំដែនកំពុងរងការលិចលង់ដោយសារទឹកជំនន់នោះប្រជាពលរដ្ឋក្នុងសង្កាត់ពីរនៅខាងត្បូងផ្លូវជាតិលេខ៥ក្នុងក្រុងប៉ាយប៉ែតកំពុងព្រួយបារម្ភនឹងទឹកជំនន់ និងនៅចំពោះមុខក៏មានការលិចលង់បណ្តើរៗហើយ ។
ឈ្មោះឆែម រឿន នៅភូមិយាង សង្កាត់និមិត្តបានប្រាប់ថា ទឹកជំនន់ឆ្នាំនេះដូចជាឡើងលឿនព្រោះថា នៅពេលដែលក្រុមគ្រួសាររបស់គាត់កំពុងសម្រាកក្នុងផ្ទះលុះនៅប្រហែលជាម៉ោង១រំលងអធ្រាត្រថ្ងៃទី១០ កញ្ញា ស្រាប់តែសើមខ្នង ហើយគាត់បានស្រវេស្រវ៉ានាំកូនចៅឡើងទៅលើផ្លូវនិងនាំគ្នាយកអីវ៉ាន់ចេញពីផ្ទះនៅរកទីទួលសុវត្ថិភាពទាំងយប់ ។
ចំណែកប្រជាពលរដ្ឋឈ្មោះនាង ខុន ក៏បានប្រាប់ថា នៅភូមិយាងថ្មីសង្កាត់និមិត្តក៏ជួបគ្រោះទឹកជំនន់រយៈពេល២ឆ្នាំមកហើយដែរ តែឆ្នាំនេះទឹកជំនន់ដែលមកពីថៃបានជន់លិចលឿនបណ្តាលឱ្យលិចសម្ភារនិងអីវ៉ាន់ ស្ទើរតែយកមិនទាន់ បណ្តាលឱ្យលិចផ្ទះសម្បែងប្រជាពលរដ្ឋនៅខាងត្បូងផ្លូវជាតិលេខ៥ចន្លោះផ្លូវដែកប្រមាណជា៥ទៅ៦ផ្ទះនិងកំពុងលិចជាបណ្តើរៗ។ លោកប៉ាល ស៊ីថា ចៅសង្កាត់និមិត្តមានប្រសាសន៍ថា នៅសង្កាត់និមិត្តលោកបានដឹងថាដំបូងគឺទឹកបានលិចជាបណ្តើរៗប្រមាណ២ភូមិមានភូមិយាងថ្មី ភូមិខៃដន ហើយកំពុងចាប់ផ្តើមលិចតាមភូមិដែលជាប់អូរព្រំដែនខណៈពេលដែលខេត្តស្រះកែវប្រទេសថៃកំពុងត្រូវបានលិចលង់ដោយសារទឹកភ្លៀងហូរមកពីតំបន់ខាងលើ ។
លោកចុង ផែត អភិបាលរងខេត្តបន្ទាយមានជ័យមានប្រសាសន៍ថា នៅពេលដែលខេត្តស្រះកែវប្រទេសថៃដែលជាប់ព្រំដែនកម្ពុជា ខេត្តបន្ទាយមានជ័យគឺពិតជាមានការព្រួយបារម្ភខ្លាចទឹកលិចតាមបណ្តាស្រុកនិងក្រុងជាប់ជាយដែនដូចគ្នា ហើយអាជ្ញាធរកំពុងយកចិត្តទុកដាក់ណែនាំប្រជាពលរដ្ឋនិងមានវិធានការជួយដល់ពួកគាត់ឱ្យបានទាន់ពេលវេលា ។
ទឹកជំនន់ ទឹកភ្លៀង នៅខេត្តព្រះវិហារ
ជំនន់ទឹកភ្លៀងនៅក្នុងខេត្តព្រះវិហារឆ្នាំ២០១២ នេះក៏ដូចជាបណ្តាឆ្នាំមុនៗដែរបានឡើងជនលិចភូមិករអ្នកស្រុកមួយចំនួន ដែលរស់នៅតាមដងស្ទឹងសែន។ ចំពោះទឹកជំនន់ទឹកភ្លៀងនៅក្នុងខេត្តឆ្នាំនេះ តាមការបញ្ជាក់ឲ្យដឹងពីមន្ទីរ ធនធានទឹក និងឧតុនិយមខេត្ត ថាទឹកភ្លៀងបានចាប់ផ្តើមធ្លាក់ខ្លាំងតាំងពីចុងខែសីហា រហូតមកដល់ដើមខែកញ្ញាទើបទឹកភ្លៀងបានថយចុះវិញ តែទឹកជំនន់ នៅតែមានការជន់លិចស្រែចម្ការ អ្នកស្រុកមួយចំនួន ដែលរស់នៅតាមបណ្តោយមាត់ស្ទឹងសែនដែលក្នុងនោះមានស្រុកចំនួន៤ និងក្រុង១មាន ១-ស្រុកគូលែន ២-ស្រុកត្បែង មានជ័យ ៣-ស្រុកជ័យសែន ៤-ស្រុករវៀង និងក្រុងព្រះវិហារ ប៉ុន្តែមន្ទីរធនធានទឹក និងឧតុនិយមខេត្តបានឲ្យដឹងដែរថាឆ្នាំនេះ ត្បិតមានទឹកជំនន់ ប៉ុន្តែមកដល់ពេលនេះទឹកជំនន់មិនទាន់គំរាមឲ្យមានមហន្តរាយដូចកាលពីឆ្នាំមុនៗទេ ។
លោកចាប គុយ ប្រធានមន្ទីរធនធានទឹក និងឧតុនិយមខេត្តព្រះវិហារ បានបញ្ជាក់ប្រាប់ កោះសន្តិភាពនៅរសៀលថ្ងៃទី១០ កញ្ញា ថា មកដល់ពេលនេះទឹកជំនន់បានឡើងជនលិចផ្ទៃដីស្រែចម្ការ និងលំនៅឋានអ្នកស្រុក រស់នៅជាប់មាត់ស្ទឹងសែនបន្តិចបន្ទួចប៉ុណ្ណោះ តែរយៈពេលជិតមួយសប្តាហ៍កន្លងមកនេះផ្ទៃមេឃបាន ស្រឡៈ។ លោកប្រធានមន្ទីរ បានបញ្ជាក់ថា ចាប់ពីពេលនេះទៅបើមិនមានភ្លៀងធ្លាក់ខ្លាំងទេ ទឹកជំនន់នឹងស្រកទៅវិញ។ លោកអ៊ុន ចាន់ដា អភិបាលរងខេត្តព្រះវិហារ ទទួលបន្ទុកគ្រោះមហន្តរាយខេត្ត បានមានប្រសាសន៍ឲ្យដឹងថា ឆ្នាំនេះមានទឹកជំនន់ តែមិនមែនដោយសារតែមានភ្លៀងធ្លាក់ច្រើន គ្របដណ្តប់លើផ្ទៃភូមិសាស្រ្តខេត្តទាំងមូលទេ គឺមានទឹកជំនន់ដោយសារមានភ្លៀងធ្លាក់ខ្លាំង នៅតាមបណ្តោយជួរភ្នំដងរែកដែលមានប្រវែង១២៩គីឡូម៉ែត្រ ដែលហូរចាក់មកក្នុងស្ទឹងសែនតែមួយកាលពីចុងខែសីហាកន្លងទៅ ទើបបណ្តាលឲ្យមានការជន់លិចលំនៅឋានស្រែចម្ការប្រជាពលរដ្ឋបន្តិចបន្ទួច មិនប៉ះពាល់អ្វីធំដុំនោះទេ។
លោកអភិបាលរងខេត្តបន្តថា ទោះបីជា យ៉ាងណា អាជ្ញាធរខេត្តបានត្រៀមលក្ខណៈ និងជូនដំណឹងដល់ប្រជាពលរដ្ឋទាំងអស់ ដែលរស់នៅតាមដងស្ទឹងសែន ខាងលើសុំឲ្យមានការប្រុងប្រយ័ត្ន។ ដោយឡែកអាជ្ញាធរខេត្តបានត្រៀមលក្ខណៈជាមួយសាខាកាកបាទក្រហម និងថ្នាក់ កណ្តាល ដើម្បីជួយសង្គ្រោះដល់ប្រជាពលរដ្ឋ ក្នុងករណីមានមហន្តរាយពីទឹកជំនន់នេះនឹងអាចកើតមានធំធេងណាមួយ។
ទឹកជន់លិចសាលាខេត្តសុខោទ័យកម្ពស់ប្រហែល១ម៉ែត្រកាលពីថ្ងៃទី១០ កញ្ញា ដោយសារទឹកហូរពីតំបន់ភ្នំ
តាមទីភ្នាក់ងារព័ត៌មានរបស់ថៃពីខេត្តសុខោទ័យផ្សាយឱ្យដឹងថា ស្ថានភាពការណ៍ទឹកជំនន់នៅទីក្រុងសុខោទ័យ កាលពីថ្ងៃទី១០ កញ្ញា កន្លងមក នៅតែជួបវិបត្តិជាបន្តបន្ទាប់ ដោយក្រុមហ៊ុន ហាងទំនិញ ក្នុងទីក្រុងត្រូវបានទឹកជន់លិចខ្ពស់ជាង១ម៉ែត្រនិងផ្លូវជាច្រើនខ្សែក្នុងទីក្រុងត្រូវកកស្ទះ ។
ដោយឡែកសាលារៀននៅក្នុងទីក្រុងចំនួន៥កន្លែងត្រូវផ្អាកការរៀនសូត្រជាបណ្តោះអាសន្ន ។ សម្រាប់នៅទីប្រជុំជននានាក្នុងទីក្រុងប្រជាជនរមែងទទួលការលំបាកវេទនានិងខឹងសម្បាដោយសារទឹកហូរពីទីខ្ពស់មក លិចក្នុងទីក្រុងក្នុងបរិមាណកើនខ្ពស់ជាបន្តបន្ទាប់ ។
ក្រៅពីនេះ ទីតាំងសំខាន់ៗរបស់មន្ត្រីជាច្រើនកន្លែងដូចជាសាលាខេត្ត តុលាការខេត្ត និងសាលាស្រុកសុខោទ័យត្រូវបានទឹកជនលិចជាង៥០សង្ទីរម៉ែត្រផងដែរ។ ការជន់លិចនៅប្រទេសថៃនេះក៏កំពុងបង្កឱ្យតំបន់ព្រំដែនកម្ពុជា អាចក្លាយជាតំបន់ជន់លិចបន្ទាប់ ព្រោះស្ថិតនៅខាងក្រោម ៕
ចែករំលែកព័តមាននេះ