ក្រុងប៉ោយប៉ែត ៖ បុគ្គលិកក្រុមហ៊ុនកាស៊ីណូត្រូពីកាណា ប្រមាណជិត១០០នាក់ បានស្វែងរកដំណោះស្រាយមួយនៅសាលាក្រុងប៉ោយប៉ែត នៅព្រឹកថ្ងៃទី១០ ខែកញ្ញា ជុំវិញការទាមទារលក្ខខណ្ឌការងារចំនួន២១ចំណុច ។
តាមការអះអាងពីលោកម៉ម រិទ្ធី អនុប្រធានស្តីទីសហព័ន្ធសហជីពវិស័យទេសចរណ៍ខេត្តសៀមរាប និងជាតំណាងក្រុមបុគ្គលិកកាស៊ីណូត្រូពីកាណាបានឱ្យដឹងថា
ក្រុងប៉ោយប៉ែត ៖ បុគ្គលិកក្រុមហ៊ុនកាស៊ីណូត្រូពីកាណា ប្រមាណជិត១០០នាក់ បានស្វែងរកដំណោះស្រាយមួយនៅសាលាក្រុងប៉ោយប៉ែត នៅព្រឹកថ្ងៃទី១០ ខែកញ្ញា ជុំវិញការទាមទារលក្ខខណ្ឌការងារចំនួន២១ចំណុច ។
តាមការអះអាងពីលោកម៉ម រិទ្ធី អនុប្រធានស្តីទីសហព័ន្ធសហជីពវិស័យទេសចរណ៍ខេត្តសៀមរាប និងជាតំណាងក្រុមបុគ្គលិកកាស៊ីណូត្រូពីកាណាបានឱ្យដឹងថា ក្រុមបុគ្គលិកកាស៊ីណូត្រូពីកាណា ដែលគ្រោងធ្វើកូដកម្មនៅថ្ងៃទី២៥ ខែសីហា កន្លងមកនេះបានធ្វើលិខិតដល់អាជ្ញាធរ និងសមត្ថកិច្ចពាក់ព័ន្ធក្រុងប៉ោយប៉ែតខេត្តបន្ទាយមានជ័យ និងចម្លងជូនដល់រដ្ឋមន្ត្រីក្រសួងការងារផងដែរ ប៉ុន្តែនៅថ្ងៃទី២៣ ខែសីហា មុនពេលកំណត់ធ្វើកូដកម្ម២ថ្ងៃ លោកង៉ោ ម៉េងជ្រូន អភិបាលក្រុងបានហៅក្រុម្បុគ្គលិក និងតំណាងសហជីពកម្មករទៅរកដំណោះស្រាយ ។ ពេលនោះដោះស្រាយបានចំនួន១៣ចំណុចតូចៗ ហើយបានសន្យារកដំណោះស្រាយនៅព្រឹកថ្ងៃទី១០ កញ្ញា ជាបន្តទៀត ។
នៅព្រឹកថ្ងៃទី១០ កញ្ញា ក៏មានការកោះហៅក្រុមបុគ្គលិក និងតំណាងសហជីពកម្មករប្រមាណ១០០នាក់ចូលប្រជុំរកដំណោះស្រាយផងដែរ ក្រោមអធិបតីភាពលោកង៉ោ ម៉េងជ្រូន អភិបាលក្រុង តែមិនអនុញ្ញាតឱ្យក្រុមអ្នកសារព័ត៌មានចូលថតរូប និងស្តាប់កិច្ចប្រជុំរកដំណោះស្រាយនេះឡើយ គឺអភិបាលក្រុងប៉ោយប៉ែតបិទសិទ្ធិអ្នកកាសែត ។ កិច្ចប្រជុំរកដំណោះស្រាយរវាងក្រុមតំណាងកម្មករកាស៊ីណូត្រូពីកាណា និងក្រុមបុគ្គលិកទាំងអស់នោះបានធ្វើឡើងចាប់ពីម៉ោង៨និង៣០នាទីព្រឹករហូតដល់វេលាម៉ោងប្រមាណជិត២រសៀលថ្ងៃដដែលនៅតែមិនទាន់រកដំណោះស្រាយបញ្ចប់បានឡើយ ។ ក្រុមបុគ្គលិកបម្រើការនៅក្នុងកាស៊ីណូត្រូពីកាណានោះបាននិយាយប្រាប់អ្នកកាសែតថា កិច្ចប្រជុំរកដំណោះស្រាយនេះមិនអាចទៅរួចឡើយ ដោយអាជ្ញាធរក្រុងមិនមានចេតនាជួួយសម្រួលដល់ពួកគេជាបុគ្គលិក ហើយកិច្ចប្រជុំនេះដែររកដំណោះស្រាយបានសរុបចំនួន១៨ចំណុចតែប៉ុណ្ណោះ ។ នៅសល់៣ចំណុចដែលតានតឹងនោះមិនអាចរកដំណោះស្រាយបានឡើយ ។
បុគ្គលិកបម្រើការនៅកាស៊ីណូត្រូពីកាណាដែលនាំគ្នាតវ៉ានេះបានបង្ហើបឱ្យដឹងថា ចំពោះ៣ចំណុចដែលតានតឹងនេះគឺក្រុមហ៊ុនបានដកបុគ្គលិកបម្រើការងារនៅក្នុងនោះចេញចំនួន៣នាក់ ដោយគ្មានមូលហេតុ ទី១ឈ្មោះសាត សែប ភេទប្រុស ទី២ឈ្មោះឡាយ បូរ៉ែន ភេទប្រុស និងទី៣ ឈ្មោះហេង គឹមហៀង ភេទស្រី ។ ជនទាំង៣នាក់ គឺជាតំណាងដែលពួកគេជាបុគ្គលិកគាំទ្រសុំកុំឱ្យដកចេញដោយគ្មានមូលហេតុតាមតែអំពើចិត្ត តែតំណាងក្រុមហ៊ុនបដិសេធ ។
កិច្ចប្រជុំនេះបានពន្យាពេលទៅថ្ងៃទី២២ កញ្ញា ខាងមុខដើម្បីរកដំណោះស្រាយបន្តទៀតផងដែរ ។ នេះចាត់ទុកជាលើកទី១ហើយ ដែលនិយោជិតបម្រើការងារនៅក្នុងវិស័យកាស៊ីណូមានការតវ៉ា និងព្រមានពីការធ្វើកូដកម្ម ដែលកន្លងមកមានតែកម្មករដែលធ្វើការនៅតាមរោងចក្រវាយណភណ្ឌប៉ុណ្ណោះ ដែលតែងតែផ្ទុះរឿងនូវការធ្វើកូដកម្មជាបន្តបន្ទាប់ ៕
ចែករំលែកព័តមាននេះ