រាជធានីភ្នំពេញ ៖ ក្រុមការងារចុះជួយ សង្កាត់ទួលសង្កែ ឫស្សីកែវ គីឡូម៉ែត្រលេខ៦ និងសង្កាត់ស្វាយប៉ាក ខណ្ឌឫស្សីកែវ ត្រូវបានធ្វើពិធីប្រកាសតែងតាំង និងកែសម្រួលសមាសភាព កាលពីវេលារសៀលថ្ងៃទី៨ កញ្ញា ឆ្នាំ២០១២ ក្រោមអធិបតីភាពលោកអ៊ុំ សារឹទ្ធ ប្រធានក្រុមការងារចុះជួយខណ្ឌឫស្សីកែវ ។ ពិធីនេះបានរៀមចំឡើងនៅមជ្ឈមណ្ឌលម៉ូដេន៥ ក្នុងសង្កាត់ឫស្សីកែវ ខណ្ឌ
រាជធានីភ្នំពេញ ៖ ក្រុមការងារចុះជួយ សង្កាត់ទួលសង្កែ ឫស្សីកែវ គីឡូម៉ែត្រលេខ៦ និងសង្កាត់ស្វាយប៉ាក ខណ្ឌឫស្សីកែវ ត្រូវបានធ្វើពិធីប្រកាសតែងតាំង និងកែសម្រួលសមាសភាព កាលពីវេលារសៀលថ្ងៃទី៨ កញ្ញា ឆ្នាំ២០១២ ក្រោមអធិបតីភាពលោកអ៊ុំ សារឹទ្ធ ប្រធានក្រុមការងារចុះជួយខណ្ឌឫស្សីកែវ ។ ពិធីនេះបានរៀមចំឡើងនៅមជ្ឈមណ្ឌលម៉ូដេន៥ ក្នុងសង្កាត់ឫស្សីកែវ ខណ្ឌឫស្សីកែវ ដោយមានការចូលរួមពីប្រធាន អនុប្រធានក្រុមការងារចុះជួយខណ្ឌឫស្សីកែវ សង្កាត់ ភូមិ និងសមាជិក សមាជិកា យ៉ាងច្រើនកុះករ ។
តាមសេចក្តីសម្រេច លោកឃ្លាំង ហួត ជាប្រធានគណបក្សខណ្ឌឫស្សីកែវ ត្រូវបានតែងតាំងកែសម្រួលជាប្រធានក្រុមការងារចុះជួយសង្កាត់គីឡូម៉ែត្រលេខ៦ លោកកូប ស្លេះ សមាជិកគណៈអចិន្រៃ្តយ៍គណបក្សខណ្ឌត្រូវបានតែងតាំងកែសម្រួលជាប្រធានក្រុមការងារចុះជួយសង្កាត់ទួលសង្កែ លោកស្រីទូច សារ៉ុម អភិបាលរងរាជធានីភ្នំពេញ ត្រូវតែងតាំងកែសម្រួលជាប្រធានក្រុមការងារចុះជួយសង្កាត់ឫស្សីកែវ លោកហ៊ុល សាភា ត្រូវបានតែងតាំង កែសម្រួលជាអនុប្រធានក្រុមការងារចុះជួយខណ្ឌទទួលបន្ទុកសម្របសម្រួលសង្កាត់ស្វាយប៉ាក និងលោកប្រាក់ ចាន់ណា ត្រូវតែងតាំងកែសម្រួលជាប្រធានក្រុមការងារចុះជួយសង្កាត់ស្វាយប៉ាក។
លោកឃ្លាំង ហួត ប្រធានគណៈកម្មាធិការបក្សខណ្ឌឫស្សីកែវ បានឱ្យដឹងថា ក្នុងសេចក្តីសម្រេចមានក្រុមការងារច្រើនណាស់នៅតាមសង្កាត់ និងភូមិ សូមឱ្យមានទាំងបរិមាណ និងគុណភាពសំខាន់គឺឆន្ទៈត្រូវរួមគ្នាបំពេញកាតព្វកិច្ច និងដណ្តើមជ័យជម្នះជូនបក្ស ។ កន្លងមកនៅក្នុងរាជធានីភ្នំពេញគណបក្សប្រជាជនកម្ពុជាដណ្តើមបានជោគជ័យលើសលប់តែសម្រាប់ការបោះឆ្នោតជ្រើសរើសសមាជិករដ្ឋសភានៅឆ្នាំ២០១៣ ខាងមុខនេះ យើងត្រូវដណ្តើមឱ្យបាន៩អាសនៈ។ដូចនេះសូមឱ្យក្រុមការងារចុះជួយសង្កាត់នីមួយៗ ត្រូវយកចិត្តទុកដាក់និងពិនិត្យពីកម្លាំងក្រុមការងាររបស់ខ្លួនជួបប្រជុំដាក់ផែនការឱ្យបានច្បាស់លាស់ ។
លោកឃ្លាំង ហួត បានបញ្ជាក់ថា ដើម្បីទទួលបានជោគជ័យក្រុមការងារទាំងអស់ត្រូវរួមសាមគ្គីគ្នា ធ្វើអ្វីៗគិតពីប្រយោជន៍បក្ស និងប្រជាពលរដ្ឋមិនសម្រាប់បុគ្គលណាម្នាក់ឡើយ ។ក្រុមការងារត្រូវផ្សាព្វផ្សាយជំរុញប្រជាពលរដ្ឋទៅចុះឈ្មោះ ពិនិត្យបញ្ជីឈ្មោះបោះឆ្នោតថាតើសមាជិក សមាជិការបស់យើងបានចុះឈ្មោះឬនៅ? ព្រមទាំងធ្វើល្អជាមួយប្រជាពលរដ្ឋ និងផ្សព្វផ្សាយឱ្យប្រជាពលរដ្ឋបានយល់កាន់តែច្បាស់ពីសមិទ្ធផល និងស្នាដៃដ៏ធំធេងក្រោមការដឹកនាំរបស់គណបក្សប្រជាជនកម្ពុជា ហើយនាំគ្នាបោះឆ្នោតជូនគណបក្សប្រជាជនកម្ពុជាដើម្បីជាកាដូជូនសម្តេចអគ្គមហាសេនាបតីតេជោ ហ៊ុន សែន បានធ្វើជានាយករដ្ឋមន្រ្តីនៅឆ្នាំ២០១៣ក៏ដូចជាអាណត្តិក្រោយៗទៀត ។
លោកឧកញ៉ាអូស្មាន ហាស្សាន់ អនុប្រធានក្រុមការងារចុះជួយខណ្ឌឫស្សីកែវ ក៏បានសំណូមពរដល់ក្រុមការងារទាំងអស់ត្រូវយកចិត្តទុកដាក់ចំពោះការចុះឈ្មោះ និងពិនិត្យឈ្មោះរបស់បងប្អូនខ្មែរអ៊ិស្លាមឱ្យបានត្រឹមត្រូវ ដោយសារឈ្មោះអ៊ិស្លាមមានសូរស័ព្ទខុសពីឈ្មោះខ្មែរដែលកន្លងមកតែងខុសឈ្មោះ ។ បើមានថ្លោះធ្លោយនោះ ទោះបីបងប្អូនជាសមាជិកបក្ស និងស្រឡាញ់បក្សអស់ពីបេះដូងក៏គ្មានឱកាសបានបោះឆ្នោត ជូនបក្សដែលនោះវាគួរឱ្យសោកស្តាយណាស់ ។ ការបោះឆ្នោតជ្រើសរើសតំណាងរាស្រ្តសំខាន់ណាស់ បើឈ្នះយើងគ្រប់គ្រងទាំងនីតិប្បញ្ញតិ្ត និងនីតិប្រតិបត្តិ ។
លោកអ៊ុំ សារឹទ្ធ ប្រធានក្រុមប្រឹក្សាការងារចុះជួយខណ្ឌឫស្សីកែវ បានឱ្យដឹងថា នៅសល់តែ១០ខែទៀតទេដល់ពេលបោះឆ្នោតជ្រើសរើសសមាជិករដ្ឋសភាហើយ ។ ការប្រកាសតែងតាំងកែសម្រួលក្រុមការងារនេះគឺជាការធ្វើបច្ចុប្បន្នភាពឱ្យក្រុមការងារម្នាក់ៗធ្វើការងារជូនគណបក្សតែមួយកន្លែងដើម្បីបង្កើនភាពឈ្នះរបស់គណបក្សនៅក្នុងរាជធានីភ្នំពេញឱ្យបាន៩អាសនៈដែលមុនមានតែ៨អាសនៈ ។ ដូចនេះក្នុងរាជធានីភ្នំពេញត្រូវដណ្តើមឱ្យបានចំនួនជាង២ម៉ឺនសំឡេងថែមទៀតដែលតាមខណ្ឌនីមួយៗត្រូវរកឱ្យបានជាង២ពាន់សំឡេង ។
លោកអ៊ុំ សារឹទ្ធ បានឱ្យដឹងថា កាលបោះឆ្នោតកន្លងមកយើងទទួលបានជោគជ័យ លទ្ធផលនោះវាធានាបានលើការគ្រប់គ្រងនៅថ្នាក់ក្រោមជាតិ តែសម្រាប់ការបោះឆ្នោតឆ្នាំ២០១៣នេះគឺជ្រើសរើសរដ្ឋសភាគ្រប់គ្រងថ្នាក់ជាតិ ត្រូវដណ្តើមឱ្យបាន ។ ការងាររដ្ឋអំណាច និងការងារបក្សត្រូវដើរទន្ទឹមគ្នា ត្រូវគិតពីសន្តិសុខ សុវត្តិភាពជូនប្រជាជនដែលគោលនយោបាយភូមិ សង្កាត់មានសុវត្ថិភាពត្រូវអនុវត្តន៍ឱ្យបាន ធានាសន្តិសុខ និងផ្តល់សេវាសាធារណៈឱ្យបានល្អ ។
ជំរុញការអភិវឌ្ឍមូលដ្ឋានទៅតាមសំណូមពរ និងការសន្យាដោយក្រុមការងារទាំងអស់ត្រូវប្រើប្រាស់កម្លាំងសរុប ធនធានសរុប និងមធ្យោបាយសរុប ធ្វើយ៉ាងណាដណ្តើមឱ្យបានជោគជ័យជូនបក្ស ។ ក្នុងឱកាសនោះ ក្រុមការងារក៏បានផ្តល់លិខិតថ្លែងអំណរគុណដល់ក្រុមការងារសង្កាត់ដែលបានជួយឧបត្ថម្ភបក្ស គាំទ្របក្សផងដែរ ៕
ចែករំលែកព័តមាននេះ