ខេត្តពោធិ៍សាត់ ៖ ព្រឹកថ្ងៃទី៦ កញ្ញា ២០១២ សមត្ថកិច្ចបានស្រាវជ្រាវដឹងច្បាស់ថា ករណីអគ្គិភ័យនៅឃុំត្រពាំងជង ស្រុកបាកាន កាលពីម្សិលមិញនេះ គឺបណ្តាលមកពីភ្ញៀវចូលចាក់សាំងម៉ូតូកេះដែកកេះជក់បារី ខណៈពេលកម្មករកំពុងបូមសាំង ។ អគ្គិភ័យនេះបានធ្វើឱ្យឆេះផ្ទះអស់ចំនួន៣ខ្នង សរុបការខូចខាតអស់ប្រមាណជាង២០ម៉ឺនដុល្លារសហរដ្ឋអាមេរិក ។ នេះបើតាមការផ្តល់ព័ត៌មានពីលោកវរសេនីយ៍ត្រី ប៉ែន ទុង អធិការនគរបាលស្រុកបាកាន ។
លោកប៉ែន ទុង បញ្ជាក់ប្រាប់ថា អគ្គិភ័យនេះផ្តើមចេញពីផ្ទះប្រជាពលរដ្ឋឈ្មោះទឹម ទូច ភេទប្រុស អាយុ៥៧ឆ្នាំ មានទីតាំងជាប់ខ្លោងទ្វារចូលវត្តបាកាន ដែលបើកស្ថានីយលក់ប្រេងផង បញ្ចូលអាគុយផង និងគ្រប់គ្រងកាប៊ីនភ្លើងចែកចាយក្នុងឃុំត្រពាំងជង ទីរួមស្រុកបាកានផង ។ តាមការស្រាវជ្រាវឱ្យដឹងថា មូលហេតុដែលបង្កឱ្យកើតមានអគ្គិភ័យនេះមុខដំបូង គឺមានភ្ញៀវម្នាក់មិនចំណាំមុខចូលចាក់សាំងម៉ូតូ ។ ពេលចាក់រួចបុរសនោះហុចលុយឱ្យ តែដោយសារម្ចាស់ស្ថានីយ និងកម្មកររវល់បូមសាំងបញ្ចូលដប និងប៊ីដុងមិនទាន់បានយកភ្លាម ពេលនោះបុរសអ្នកចាក់សាំងក៏ឆ្លៀតឱកាសជក់បារីមួយដើមសិន ទើបបណ្តាលឱ្យឆាបឆេះ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ