រាជធានីភ្នំពេញ ៖ គណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ (គ.ជ.អ.ប) បានបើកកិច្ចប្រជុំលើកទី៧ នៅសាលប្រជុំទីស្តីការក្រសួងមហាផ្ទៃកាលពីព្រឹកថ្ងៃទី៦ កញ្ញា ២០១២ ក្រោមអធិបតីភាពលោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ និងជាប្រធាន គ.ជ.អ.ប និងលោកឧបនាយករដ្ឋមន្ត្រី គាត ឈន់ រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ។
លោកឧបនាយករដ្ឋមន្ត្រី ស ខេង បានថ្លែងក្នុងពិធីបើកកិច្ចប្រជុំលើកទី៧ នៃ គ.ជ.អ.ប នោះថា ជារួមអាចវាយតម្លៃបានថា សកម្មភាព និងសមិទ្ធផលដែលសម្រេចបាននៅក្នុង៨ខែដើមឆ្នាំ២០១២ នេះគឺជាវឌ្ឍនភាពដ៏សំខាន់មួយបន្ថែមទៀតក្នុងការជំរុញឱ្យដំណើរការកំណែទម្រង់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិអាចបោះជំហានទៅមុខស្របតាមទស្សនៈវិស័យនៃគោលនយោបាយ យុទ្ធសាស្ត្រ និងគោលការណ៍នានាដែលបានកំណត់នៅក្នុងក្របខណ្ឌយុទ្ធសាស្ត្រស្តីពីកំណែទម្រង់វិមជ្ឈការ និងវិសហមជ្ឈការច្បាប់រៀបចំអង្គការ និងកម្មវិធីជាតិរយៈពេល១០ឆ្នាំ ។ ក្នុងរបៀបវារៈនៃកិច្ចប្រជុំនេះលេខាធិការដ្ឋាន គ.ជ.អ.ប បានរាយការណ៍អំពីវឌ្ឍនភាព និងបញ្ហាប្រឈមនៃកិច្ចដំណើរការកំណែទម្រង់នៅក្នុងឆមាសទី១ នៃឆ្នាំ២០១២ ។ ទន្ទឹមនឹងការសម្រេចបាននូវវឌ្ឍនភាពគួរជាទីមោទនភាពនេះក៏នៅមានបញ្ហាប្រឈមជាច្រើនដែលត្រូវផ្តោតការយកចិត្តទុកដាក់ដោះស្រាយ ដើម្បីជំរុញឱ្យកិច្ចដំណើរការកំណែទម្រង់សម្រេចបាននូវគោលដៅរយៈពេលវែងដែលបានកំណត់នៅក្នុងច្បាប់រៀបចំអង្គការ និងកម្មវិធីជាតិ ។
ចាប់ពីដើមឆ្នាំ២០១១ មកយើងបានខិតខំប្រឹងប្រែងយ៉ាងខ្លាំងដើម្បីជំរុញដល់ការរៀបចំនូវអនុក្រឹត្យស្តីពីការរៀបចំ និងការប្រព្រឹត្តទៅនៃមូលនិធិក្រុង-ស្រុក រហូតទទួលបាននូវការអនុម័តដោយរាជរដ្ឋាភិបាលកាលពីខែមីនា ២០១២ ។
ព័ត៌មានលំអិតនឹងផ្សាយជូននៅពេលក្រោយ នៅលើទំព័រកាសែតកោះសន្តិភាព និងនៅតាមវិទ្យុសំឡេងកោះសន្តិភាព FM 87.75 រាជធានីភ្នំពេញ, FM 87.5 ខេត្តបាត់ដំបង៕
ចែករំលែកព័តមាននេះ